ដោយ៖ សែម ប្រាក់ដាវ
 

ភ្នំពេញ៖ អ្នកជំនាញនៃអាជ្ញាធរជាតិអប្សរា កំពុងសម្អាត និងជួសជុលវត្ថុសិល្បៈ ដែលបានពីការធ្វើកំណាយ នៅទំនប់ខាងត្បួង ឈៀងខាងលិចនៃស្រះស្រង់ ចំនួន ១ ០៥៥ សមុច្ច័យ។ វត្ថុសិល្បៈដែលបានរកឃើញនៅក្នុងការធ្វើកំណាយបុរាណវិទ្យាភាគច្រើន ជារូបចម្លាក់ព្រះពុទ្ធ។

 

ការសម្អាតវត្ថុសិល្បៈទាំងនេះ ប្រព្រឹត្តទៅនៅសារមន្ទីរព្រះនរោត្តមសីហនុ-អង្គរ នឹងដាក់តាំងបង្ហាញជាសាធារណៈ ក្នុងកំឡុងពេលតាំងពិព័រណ៌មិនអចិន្ត្រៃយ៍ផងដែរ។  ជាមួយគ្នានេះ លោកស្រី បេ ស៊ីនួន មន្ត្រីបច្ចេកទេសនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា លើកឡើងថា វត្ថុសិល្បៈចំនួន ១ ០៥៥សមុច្ច័យ ភាគច្រើនជារូបចម្លាក់ព្រះពុទ្ធ ស្ថិតក្នុងសតវត្សទី១២ និងទី១៣នៃគ្រឹស្តរាជ និងសម័យក្រោយអង្គរ។  
 

បន្ថែមពីនេះ ក្រុមការងារនៃអាជ្ញាធរជាតិអប្សរា កំពុងសម្អាតកម្រិតមធ្យម ដោយសារវត្ថុធ្វើពីលោហៈ មានការខូចខាតជាច្រើន។ ការខូចខាតទាំងនេះ រួមមាន រុំព័ទ្ធទៅដោយកំណកដីក្តាំង, ស្នឹមព័ណ៌បៃតង, ពុកផុយ, សឹក, ច្រែស, ស្នាមប្រេះ និងបាក់ជាបំណែក។ 
 

ក្រៅពីនេះ សាធារណជនដែលចង់ស្វែងយល់កាន់តែច្បាស់ ពីវិធីសាស្ត្រសម្អាតវត្ថុសិល្បៈទាំងនេះ អាចទៅទស្សនាដោយផ្ទាល់ ការតាំងពិព័រណ៌មិនអចិន្ត្រៃយ៍ នៅសារមន្ទីរព្រះនរោត្តមសីហនុអង្គរ។ គួរបញ្ជាក់ដែរសារមន្ទីរ បើកឱ្យភ្ញៀវទេសចរជាតិ និងអន្តរជាតិ ចូលទស្សនាចាប់ពីថ្ងៃអង្គារ ដល់ថ្ងៃអាទិត្យ ម៉ោង៨:៣០នាទីព្រឹក ដល់ម៉ោង៤:៣០ល្ងាច៕