ជាតិ
បទវិភាគ
បញ្ហាសុវត្ថិភាព និងអនាម័យនៃម្ហូបអាហារកំពុងបំផ្លាញជីវិតខ្មែរ!
× ភ្នំពេញ៖ បញ្ហាគុណភាព អនាម័យក្នុងការផលិតនិងការលក់ដូរ និងសុវត្ថិភាពនៃម្ហូបអាហារនៅកម្ពុជា គឺជាបញ្ហាមួយគួរឱ្យកត់សម្គាល់និងព្រួយបារម្ភ ដោយអ្នកដែលចាប់អារម្មណ៍នឹងផលប៉ះពាល់នៃកត្តាទាំងនេះចំពោះសុខភាពសាធារណៈ។ ប៉ុន្តែ ចំពោះអ្នកមិនចាប់អារម្មណ៍ និងប្រជាជនសាមញ្ញវិញ បញ្ហានេះបានក្លាយទៅជារឿងសាមញ្ញទៅហើយ។ ទោះជាមានការរិះគន់និងការចាត់វិធានការខ្លះៗក៏ដោយ ក៏បញ្ហានេះមិនមានការថយចុះដែរ។អ្នកបរិភោគអាហារនិងភេសជ្ជៈខូចគុណភាណនិងខ្វះអនាម័យ បណ្ដាលឱ្យមានជំងឺរាករូស ប្រព័ន្ធការពារក្នុងខ្លួនចុះខ្សោយ ដែលងាយនឹងទទួលជំងឺផ្សេងៗទៀត និងធ្វើឱ្យសុខភាពរបស់ពួកគេចុះខ្សោយ បាត់បង់កម្លាំងពលកម្ម និងធ្វើឱ្យពួកគេកាន់តែក្រីក្រថែមទៀត។
យោងតាមតថភាពសង្គម គេបានសង្កេតឃើញថា នៅទីផ្សារកម្ពុជា តិចឬច្រើននៅមានការចរាចរភេសជ្ជៈ ស្រា ថ្នាំពេទ្យ នំចំណី និងគ្រឿងបរិភោគផ្សេងៗ ដែលខ្វះអនាម័យ គ្មានគុណភាព និងគ្មានសុវត្ថិភាព បើទោះបីមានច្បាប់ និងមានមន្ដ្រីជំនាញទទួលបន្ទុកកិច្ចនេះហើយក៏ដោយ។ ក្រៅពីនេះ យើងក៏សង្កេតក៏ឃើញថា ទឹកបរិសុទ្ធមួយចំនួនដែលផលិតនៅស្រុកខ្មែរ និងកំពុងតែចរាចរនៅលើទីផ្សារនានាភាគច្រើនក៏ខ្វះអនាម័យផងដែរ។ ទាក់ទិននឹងទឹកបរិសុទ្ធខ្វះអនាម័យនេះ អ្នកជំនាញខាងស្រាវជ្រាវទឹកបរិសុទ្ធនៃមជ្ឍមណ្ឌលអនាម័យ បានថ្លែងថា ទឹកបរិសុទ្ធដែលផលិតនៅកម្ពុជាយើងនេះ ទោះជាយ៉ាងណាក៏ដោយ ក៏វាមិនទទួលបានអនាម័យត្រឹមត្រូវដែរ ពីព្រោះយើងធ្វើដោយដៃផ្ទាល់ ហើយសំបកដបដែលប្រើប្រាស់ច្រើនលើក ក៏លាងមិនស្អាត គួបផ្សំនឹងកន្លែងផលិតមានទឹកប៉ប៉ិចប៉ប៉ាច់ និងអាចមានមេរោគ។
យោងតាមការពិនិត្យសង្កេត និងការវិភាគ យើងអាចនិយាយបានថា ការចរាចរទំនិញប្រភេទនេះនៅទីផ្សារកម្ពុជា ហាក់ដូចជាមានលក្ខណៈងាយស្រួល ពីព្រោះ៖
1. ទំនិញប្រភេទនេះអាចមានតម្លៃថោក សមល្មមតាមប្រាក់ចំណូលទាបរបស់ប្រជាជនខ្មែរភាគច្រើន
2. ប្រជាជនខ្មែរមួយចំនួន ពុំយកចិត្តទុកដាក់លើក្បួនរក្សាអនាម័យ និងមិនទាន់យល់ច្បាស់ពីផលប៉ះពាល់ គ្រឿងបរិភោគផ្សេងៗដែលខ្វះអនាម័យ ខូចគុណភាព និងគ្មានសុវត្ថិភាព។
3. ប្រជាពលរដ្ឋខ្មែរភាគច្រើន ពុំទាន់យល់ច្បាស់ពីសញ្ញា ឬលក្ខណៈសម្គាល់ផ្សេងៗ ដែលទាក់ទងនឹងទំនិញខូចគុណភាព ឬទំនិញហួសពេលកំណត់ប្រើប្រាស់។
4. ទីផ្សារនៅកម្ពុជា មានលក្ខណៈរាយប៉ាយ ស្មុគស្មាញ និងខ្វះសណ្ដាប់ធ្នាប់ ដែលពិបាកត្រួតពិនិត្យ។
5. ការផ្សព្វផ្សាយអំពីការអប់រំស្ដីពីលក្ខណៈសម្គាល់ និងផលប៉ះពាល់នៃទំនិញខូចគុណភាព ទំនិញហួសពេលកំណត់ប្រើប្រាស់ ចំពោះប្រជាពលរដ្ឋខ្មែរ មិនទាន់មានលក្ខណៈទូលំទូលាយនិងនិរន្តរភាពនៅឡើយ។
6. ការត្រួតពិនិត្យលើទំនិញទាំងនេះពីមន្ដ្រីជំនាញពាក់ព័ន្ធ ពុំទាន់សព្វជ្រុងជ្រោយ និងមិនទាន់មាននិរន្ដរភាពនៅឡើយ។
7. អ្នកលក់មួយចំនួនគិតតែពីប្រាក់ចំណេញ ដោយមិនគិតពីសុខភាពសារណៈ និងសីលតម្លៃទេ។
8. របាំងនៃអំពើពុករលួយ ដែលនាំឱ្យអ្នកប្រព្រឹត្តល្មើសមិនរាងចាលនិងបន្តប្រព្រឹត្តខុសតទៅទៀត។
លើសពីនេះទៀត យើងសង្កេតឃើញនៅមានម្ហូប អាហារ បន្លែ ផ្លែឈើ ត្រី សាច់... ដែលគេដាក់លក់ដោយខ្វះអនាម័យ និងមានដាក់ជាតិគីមីទៀតផង ដូចជា ការដាក់ថ្នាំឱ្យមានពណ៌ស ថ្នាំសម្រាប់ឱ្យនៅស្រស់បានយូរ ថ្នាំឱ្យសរសៃគុយទាវ មី ប្រហិត ស្វិតល្អ...) ។ បើយើងពិនិត្យមើល តាមផ្សារលក់ម្ហូបនានានៅក្នុងព្រះរាជាណាចក្រកម្ពុជា ម្ហូបចំណីនានាត្រូវបានគេដាក់លក់ដោយហាលខ្យល់ ហាលធូលី ដោយពុំមានគ្របអ្វីទាំងអស់។ លើសពីនេះទៀត នៅតាមកន្លែងលក់បាយម្ហូបនានា ដែលគេធ្វើឡើងសម្រាប់លក់ឱ្យអ្នកដែលមានប្រាក់ចំណូលទាប ដូចជា អ្នករត់រឺម៉ក អ្នករត់ម៉ូតូឌុប កម្មករ។ល។ ភាគច្រើន គេពុំយកត្រី សាច់ បន្លែ ដែលមានគុណភាពល្អមកប្រើប្រាស់ទេ គេជ្រើសរើសយកតែរបស់ណាដែលមានតម្លៃថោកប៉ុណ្ណោះ និងស្ទើរតែចង់ខូចគុណភាពទៅហើយ ឯការដាក់លក់ទៀតសោតក៏ខ្វះអនាម័យដែរ ដូចជា មានធូលីហុយចូល និងមានរុយរោម ជាដើម។ ទោះជាយ៉ាងនេះក៏ដោយ ក៏យើងបានសង្កេតឃើញថា ការលក់បាយម្ហូបប្រភេទនេះ គឺលក់ដាច់ជាងហាងធំៗទៅទៀត។ ហេតុអ្វីបានជាម្ហូបចំណីទាំងនេះនៅតែលក់ដាច់? ចម្លើយអាចមានដូចខាងក្រោម៖
1. ប្រជាពលរដ្ឋខ្មែរភាគច្រើនរៀបចំការហូបចុកតាមទម្លាប់ ច្រើនជាងការហូបចុកតាមរបៀបអនាម័យ
2. ប្រជាពលរដ្ឋខ្មែរមួយចំនួន ពុំទាន់ចាប់អារម្មណ៍ខ្លាំងទៅលើការថែរក្សាសុខភាព
3. ប្រជាពលរដ្ឋខ្មែរមួយចំនួន មិនចាប់អារម្មណ៍ខ្លាំងនឹងផលប៉ះពាល់នៃអាហារប្រភេទនេះចំពោះសុខភាព
4. តម្លៃម្ហូបប្រភេទនេះថោកជាងម្ហូបនៅក្នុងភោជនីយដ្ឋានធំៗ
5. ពលរដ្ឋខ្មែរ ភាគច្រើនមានប្រាក់ចំណូលទាប
6. គ្មានជម្រើសផ្សេង ដោយសារគ្មានលទ្ធភាព
ដូច្នេះ សូមពលរដ្ឋខ្មែរ មេត្ដាបង្កើនការប្រុងប្រយ័ត្នខ្ពស់ ពីព្រោះ ការបរិភោគបន្លែ ផ្លែឈើ ត្រី សាច់...ដែលមានដាក់ជាតិគីមីលើសកម្រិតសុវត្ថិភាព ការបរិភោគប្ហូបអាហារដែលខ្វះអនាម័យ និងការប្រើប្រាស់ភេសជ្ជៈ ទឹកបរិសុទ្ធដែលមានមេរោគ ម្ហូប ចំណី ថ្នាំពេទ្យ ដែលខូចគុណភាព និងផុតកំណត់ពេលប្រើប្រាស់ នាំឱ្យអ្នកបរិភោគ និងអ្នកប្រើប្រាស់មានជំងឺរាករូស ប្រព័ន្ធការពារក្នុងខ្លួនចុះខ្សោយ ដែលងាយនឹងទទួលជំងឺផ្សេងៗទៀត និងធ្វើឱ្យសុខភាពរបស់ពួកគេចុះខ្សោយ។ កត្ដានេះហើយ ដែលធ្វើឱ្យពួកគេបាត់បង់កម្លាំងពលកម្ម និងធ្វើឱ្យពួកគេកាន់តែក្រីក្រថែមទៀត។
ការលើកឡើងនូវចំណុចអាក្រក់មួយចំនួនខាងលើនេះ មិនមែនមានន័យថា ទំនិញគ្រប់ប្រភេទ និងម្ហូប អាហារ បន្លែ ផ្លែឈើ ត្រី សាច់។ល។ សុទ្ធតែខូចគុណភាព ហួសពេលកំណត់ប្រើប្រាស់ និងខ្វះអនាម័យនោះទេ ហើយក៏មិនមានន័យថា អ្នកលក់ទាំងអស់សុទ្ធតែអាក្រក់ដែរ។ ការលើកឡើងនេះ គ្រាន់តែចង់បញ្ជាក់ថា នៅក្នុងសង្គមខ្មែរបច្ចុប្បន្ន ក្រៅពីចំណុចល្អ ក៏មានចំណុចអាក្រក់ដូចបានរៀបរាប់ខាងលើនេះដែរ។
ដើម្បីទបស្កាត់ និងកាត់បន្ថយនូវអំពើអសីលធម៌ទាំងនេះ យើងត្រូវពង្រឹងសីលធម៌សង្គម ពង្រឹងការអនុវត្ដច្បាប់ បង្កើនការយកចិត្ដទុកដាក់លើការត្រួតពិនិត្យគុណភាព អនាម័យ និងសុវត្ថិភាពទំនិញ ព្រមទាំងពង្រីកបន្ថែមនូវការអប់រំ ការផ្សព្វផ្សាយដល់ប្រជាពលរដ្ឋខ្មែរទូទៅ ពីក្បួនរក្សាអនាម័យ លក្ខណៈសម្គាល់ និងផលប៉ះពាល់នៃទំនិញខូចគុណភាព ចំណីអាហារខ្វះអនាម័យ និងបន្លែ ផ្លែឈើ ត្រី សាច់ ដែលមានដាក់ជាតិគីមីលើសកម្រិតសុវត្ថិភាព៕
© រក្សាសិទ្ធិដោយ thmeythmey.com