អន្តរជាតិ
អេហ្ស៊ីប ៖ ឪពុករៀបការកូនប្រុស ១២ ឆ្នាំជាមួយក្មេងស្រី ១០ ឆ្នាំ ដើម្បីប្រមូលលុយចំណងដៃ
×![]()
ដោយ: ធីតា
ក្មេងប្រុសជាសិស្សសាលាអាយុ ១២ ឆ្នាំម្នាក់បានរៀបការជាមួយនឹងក្មេងស្រីអាយុ ១០ ឆ្នាំ ដែលជាញាតិសន្តានរបស់ខ្លួន ព្រោះតែឪពុកចង់ប្រមូលលុយចំណងដៃមកវិញ។ ពួកគេទាំងពីរត្រូវបានចាត់ទុកថា ជាគូស្វាមីភរិយាដ៏វ័យក្មេងបំផុតក្នុងពិភពលោក។
Faris Abdul Aziz បានរៀបការជាមួយគូដណ្តឹង និងជាញាតិសន្តានរបស់ខ្លួនអាយុ ១០ ឆ្នាំឈ្មោះ Nancy នៅក្នុងភូមិមួយដែលស្ថិតនៅភាគខាងជើងទីក្រុង Cairo កាលពីថ្ងៃសុក្រនេះ ដោយមានភ្ញៀវអញ្ជើញចូលរួមរាប់រយនាក់។ សារព័ត៌មានក្នុងស្រុកបានស្រង់សម្តីរបស់ឪពុកកូនប្រុសថា គាត់សម្រេចចិត្តរៀបចំពិធីមង្គលការនេះមុនកំណត់ ពីព្រោះគាត់មានបំណងប្រមូលយកចំណងដៃវិញ។ កន្លងមក គាត់បានចងដៃអ្នកភូមិជាច្រើនរយនាក់មកហើយ វាដល់ពេលវេលាហើយដែលគាត់ត្រូវយកមកវិញ។
គូស្វាមីភរិយាវ័យក្មេងនេះមិនបានចុះសំបុត្រអាពាហ៍ពិពាហ៍ទេ ដោយសារពួកគេមិនទាន់គ្រប់អាយុ ១៨ ឆ្នាំនៅឡើយ។ គ្រួសារទាំងពីរបានត្រឹមតែចុះកិច្ចសន្យាមួយជាមួយគ្នាប៉ុណ្ណោះ។ មេធាវីជនជាតិអេហ្ស៊ីបម្នាក់បានចាត់ទុកថា គ្រួសារទាំងសង្ខាងបានប្រព្រឹត្តបទឧក្រិដ្ឋ ព្រោះពួកគេបានបង្កគ្រោះថ្នាក់ដល់ជីវិតរបស់ក្មេង៕
ប្រភព៖ Emirates News
© រក្សាសិទ្ធិដោយ thmeythmey.com
