អន្តរជាតិ
នយោបាយអន្តរជាតិ
ហ៊ីឡារី គ្លីនតុន ក្លាយជាបេក្ខជនប្រធានាធិបតីស្ត្រីដំបូងក្នុងប្រវត្តិសាស្ត្រអាមេរិកតំណាងបក្សប្រជាធិបតេយ្យ
×![]()
ដោយ: ថ្មីៗ
ចុងក្រោយលោកស្រី ហ៊ីឡារី គ្លីនតុន បានទទួលការតែងតាំងពីបក្សជាផ្លូវការជាបេក្ខជនប្រធានាធិបតីជាផ្លូវការក្នុងសមាជបក្សថ្ងៃអង្គារទី ២៦ កក្កដា នៅរដ្ឋ Pennsylvania ។ អ្វីសំខាន់ អតីតរដ្ឋមន្ត្រីការបរទេសនេះបានក្លាយបេក្ខជនប្រធានាធិបតីស្ត្រីតំណាងឲ្យបក្សប្រជាធិបតេយ្យដំបូងបំផុតក្នុងប្រវត្តិសាស្ត្រអាមេរិកនាពេលជាង២០០ឆ្នាំមកនេះ។
ក្រោយចំណាយពេលយ៉ាងច្រើន និងឆ្លងកាត់ការប្រកួតប្រជែងយ៉ាងស្វិតស្វាញជាមួយសមាជិកព្រឹទ្ធសភារដ្ឋ Vermont លោក ប៊ែនី សេនដឺ លោកស្រី ហ៊ីឡារី គ្លីនតុន បានទទួលការតែងតាំងពីបក្សជាផ្លូវការហើយក្នុងសមាជបក្សនៅទីក្រុង Philadelphia ។ វាក្លាយជាព្រឹត្តិការណ៍ ប្រវត្តិសាស្ត្រអាមេរិកហើយ ដែលអ្នកនយោបាយស្ត្រីក្លាយជាបេក្ខជនប្រធានាធិបតីតំណាងឲ្យបក្សនយោបាយធំៗ។
យោងតាមទីភ្នាក់ងារ ព័ត៌មាន Reuters មុនមានការសម្រេចការតែងតាំង គូប្រជែងលោកស្រី លោក ប៊ែនី សេនដឺ បានថ្លែងប្រាប់ប្រធានសមាជបក្ស ឲ្យជ្រើសរើសលោកស្រី ហ៊ីឡារី គ្លីនតុនជាបេក្ខជនតំណាងបក្សសម្រាប់ប្រកួតប្រជែងយកតំណែងប្រធានាធិបតី។ នេះមានន័យថា លោកស្រី ត្រូវប្រកួតប្រជែងជាមួយលោក ដូណាល់ ត្រាំ ក្នុងការបោះឆ្នោតប្រធានាធិបតីថ្ងៃ ៨ខែវិច្ឆិកាខាងមុខ។
សូមបញ្ជាក់បន្តិចដែរ តាមរយៈការប្រកួតប្រជែងក្នុងបក្សកន្លងមក លោកស្រី ហ៊ីឡារី គ្លីនតុន រកបានប្រតិភូចំនួនរហូតដល់ ២៨៤២ ច្រើនជាងចំនួនកំណត់ ២៣៨៣។ ចំណែកលោក ប៊ែនី សេនដឺ បានទទួលប្រតិភូត្រឹម ១៨៦៥ប៉ុណ្ណោះ។
ត្រលប់មកវិញ មុនមានការប្រកាសតែងតាំងលោកស្រី ហ៊ីឡារី គ្លីនតុន លោក ប៊ែនី សេនដឺ ក៏បានកោតសរសើរលោកស្រី ហ៊ីឡារី គ្លីនតុន ហើយអំពាវនាវឲ្យអ្នកគាំទ្រក៏ដូចជាអ្នកគាំទ្របក្សប្រជាធិបតេយ្យទូទៅគាំទ្រលោកស្រី ហ៊ីឡារី គ្លីនតុន នៅពេលខាងមុខ។ លោកសង្កត់ធ្ងន់ថា បក្សប្រជាធិបតេយ្យចាំបាច់ត្រូវផ្តួលលោក ដូណាល់ ត្រាំ ហើយលោកស្រី គ្លីនតុន ត្រូវតែក្លាយជាប្រធានាធិបតីអាមេរិក។ គេចាត់ទុកថា វាជាសកម្មភាពមួយដើម្បីជួយបង្រួបបង្រួមបក្ស និងឈានទៅផ្តួលបក្សសាធារណរដ្ឋដែលដឹកនាំដោយលោក ដូណាល់ ត្រាំ។
ម្សិលមិញនេះដែរ ស្ត្រីទីមួយលោកស្រី Michelle Obama ក៏បានចេញមុខផ្តល់សុន្ទរកថាក្នុងសមាជបក្សដែរ ដោយលោកស្រីបានសម្តែងការគាំទ្រនិងកោតសរសើរលោកស្រី ហ៊ីឡារី គ្លីនតុន ហើយវាយប្រហារលោក ដូណាល់ ត្រាំ ដោយប្រយោល។ លោកស្រី បានបញ្ជាក់ថា អតីតរដ្ឋមន្ត្រីការបរទេសហ៊ីឡារី គ្លីនតុន បានធ្វើឲ្យប្រជាជនអាមេរិកជំនាន់ក្រោយជឿជាក់ថា ស្ត្រីម្នាក់អាចក្លាយជាប្រធានាធិបតីអាមេរិកបានដែរ។ អ្វីដែលគួរឲ្យចាប់អារម្មណ៍ សុន្ទរកថារយៈពេលជាង ១០នាទីរបស់លោកស្រី Michelle បានធ្វើឲ្យអ្នកទស្សនាសរសើរឥតដាច់ពីមាត់ ហើយសុន្ទរកថានេះជួយលើកប្រជាប្រិយភាពលោកស្រី ហ៊ីឡារី គ្លីនតុន និងទម្លាក់ប្រជាប្រិយភាពលោក ដូណាល់ ត្រាំ ៕
© រក្សាសិទ្ធិដោយ thmeythmey.com
