អន្តរជាតិ
តួកគីទារលុយពីអឺរ៉ុបជុំវិញបញ្ហាជនភៀសខ្លួន ក្រោយអឺរ៉ុបរិះគន់រឿងរដ្ឋប្រហារ
× ភាពតានតឹងរវាងតួកគី និងអឺរ៉ុប កាន់តែឡើងកម្ដៅហើយ បន្ទាប់ពីអឺរ៉ុបរិះគន់ និងព្រមានបង្អាក់ការចូលជាសមាជិករបស់តួកគី ត្បិតតួកគី ចង់អនុវត្តទោសប្រហារជីវិតឡើងវិញ ក្រោយការធ្វើរដ្ឋប្រហារមិនជោគជ័យថ្ងៃទី១៥ ខែកក្កដា។ តួកគី បានប្រតិកម្មខ្លាំងចំពោះរឿងនេះ និងបានទារលុយពីសហភាពអឺរ៉ុប ដែលសន្យាឲ្យតួកគីក្នុងកិច្ចព្រមព្រៀងទប់ស្កាត់លំហូរជនភៀសខ្លួន។
នៅក្រោយការរិះគន់របស់ប្រធានគណៈកម្មការអឺរ៉ុបជុំវិញបញ្ហានៅតួកគី ប្រធានាធិបតីតួកគី លោក Recep Tayyip Erdogan បានឆ្លើយតបនឹងការរិះគន់នេះយ៉ាងខ្លាំង។ ប្រធានាធិបតីតួកគី បានស្នើឲ្យសហភាពអឺរ៉ុប បង់ប្រាក់ដែលខ្លួនបានសន្យាទៅក្រុងអង់ការ៉ា ដែលជាផ្នែកមួយនៃកិច្ចព្រមព្រៀងជនភៀសខ្លូនរវាងតួកគី និងអឺរ៉ុប ក្នុងគោលដៅទប់ស្កាត់លំហូរជនភៀសខ្លួន និងជួយសាងសង់លំនៅដ្ឋានដល់ជនភៀសខ្លួននៅតួកគី។
ក្នុងន័យរិះគន់អឺរ៉ុប លោកប្រធានាធិបតី Erdogan និយាយថា តួកគីមិនទាន់បានទទួលលុយចំនួន៣.៣ពាន់លានដុល្លារ ជាជំនួយសន្យាផ្ដល់ដោយអឺរ៉ុបនោះទេ។ ក្នុងបទសម្ភាសន៍ជាមួយប្រព័ន្ធផ្សព្វផ្សាយ ARD លោក Erdogan បានបញ្ជាក់ថា៖«សួរពួកគេ (អឺរ៉ុប) ទៅ! តើពួកគេមានបង់ប្រាក់ឬនៅ? ប៉ុន្តែជនភៀសខ្លួនបីលាននាក់ បន្តនៅតួកគីនៅឡើយ។ តើមានរឿងអ្វីកើតឡើង ប្រសិនបើយើងឲ្យពួកគេ ហូរទៅអឺរ៉ុប?»
បើតាមសារព័ត៌មាន Sputnik ប្រធានាធិបតីតួកគីបន្ថែមថា សហភាពអឺរ៉ុបមិនស្មោះត្រង់នោះទេ។ ប្រធានាធិបតីរូបនេះថែមទាំងអះអាងថា ការសាងសង់លំនៅដ្ឋាន និងការជួយផ្សេងៗដល់ជនភៀសខ្លួនមកពីស៊ីរី និងអ៊ីរ៉ាក់ តម្រូវឲ្យរដ្ឋាភិបាលតួកគីចំណាយលុយដល់ទៅជាង១១ពាន់លានដុល្លារឯណោះ។ ទាក់ទិនការអនុញ្ញាតឲ្យប្រជាជនតួកគីចូលអឺរ៉ុបមិនចាំបាច់មានទិដ្ឋាការនោះ លោក Erdogan ជឿថា អឺរ៉ុប ក៏មិនធ្វើតាមការប្ដេជ្ញាចិត្តរបស់ខ្លួននោះដែរ។
សូមរម្លឹកថា ថ្លែងតាមទូរទស្សន៍បារាំង France 2 ប្រធានគណៈកម្មការអឺរ៉ុប ហ្សង់-ក្លូដ ចាំងកឺ (Jean-Claude Juncker) រិះគន់ការបោសសម្អាតរបស់លោក Erdogan ក្រោយរដ្ឋប្រហារមិនបានសម្រេច។ លោក បញ្ជាក់ថា៖« ខ្ញុំជឿថា ក្នុងស្ថានភាពបច្ចុប្បន្ន តួកគី គឺមិនអាចក្លាយជាសមាជិកអឺរ៉ុបបានទេ ហើយរយៈពេលវែងទៅមុខ ក៏អ៊ីចឹងដែរ»។ លោកបន្តថា ប្រសិនបើតួកគី នៅតែអនុវត្តទោសប្រហារជីវិត អឺរ៉ុបនឹងបញ្ឈប់ការចូលជាសមាជិករបស់តួកគីមិនខានឡើយ។
ភ្លាមៗក្រោយការលើកឡើងដូចនេះ រដ្ឋមន្ត្រីការបរទេសតួកគី ក៏បានឆ្លើយតបនឹងការព្រមានរបស់ប្រធានគណៈកម្មការអឺរ៉ុបវិញដែរ។ រដ្ឋមន្ត្រីការបរទេសតួកគី លោក Mevlut Cavusoglu បានប្រាប់ Haberturk TV ថា អឺរ៉ុប មិនអាចគំរាមតួកគី ដោយសារតែការអនុវត្តទោសប្រហារជីវិតឡើងវិញបានទេ៕
Tag:
តួកគី
អឺរ៉ុប
ជនភៀសខ្លួន
រដ្ឋប្រហារ
© រក្សាសិទ្ធិដោយ thmeythmey.com