ការរួបរួមក្នុងសំឡេងតែមួយរបស់អាស៊ានដើម្បីប្រឈមបញ្ហារួម គឺជាកត្តាមួយដ៏សាវន្ត័ដែលអាចជំរុញឲ្យអង្គការអន្តររដ្ឋាភិបាលក្នុងតំបន់មួយនេះអាចធានាពីចីរភាពរបស់ខ្លួនបាន។ តែទន្ទឹមការរួបរួមគ្នានេះ អាស៊ាន ក៏គួរតែមានគោលនយោបាយតុល្យភាពជាមួយនឹងដៃគូសន្ទនារបស់ខ្លួនដើម្បីអាចធានាឲ្យបាននូវទាំងផលប្រយោជន៍ និងការកសាងទំនាក់ទំនងយូរអង្វែងផងដែរ។ ជាក់ស្តែងនោះ គោលនយោបាយអាស៊ានជាមួយនឹងចិន ដែលជាដៃគូពាណិជ្ជកម្មធំបំផុតរបស់អាស៊ាន ហើយក៏ជាភាគីជម្លោះដ៏ធំជាមួយនឹងសមាជិកខ្លួន ត្រូវតែមានការថ្លឹងថ្លែងដើម្បីចៀសវាងពីការខាតប្រយោជន៍ ដែលហៅថា Negative Sum Game។ ដោយឡែកសម្រាប់សេចក្តីថ្លែងការណ៍រួមរដ្ឋមន្ត្រីការបរទេសលើកទី៤៩វិញ មានលក្ខណៈល្អប្រសើរកម្រិតណាដែរចំពោះទំនាក់ទំនងចិននិងអាស៊ាន?
រដ្ឋមន្ត្រីការបរទសអាស៊ាននៅថ្ងៃចន្ទទី២៥ ខែកក្កដា កន្លងទៅ បានចេញសេចក្តីថ្លែងការណ៍រួមមួយ(Joint Communiqué) ក្រោយបញ្ចប់កិច្ចប្រជុំរដ្ឋមន្ត្រីការបរទេសលើកទី៤៩ ក្នុងក្រុងវៀងចន្ទន៍ ប្រកបដោយផ្លែផ្កា។ តែមុនពេលនឹងចេញជាលទ្ធផលនេះ ក្រុងវៀងងចន្ទន៍ បានក្លាយជាសមរភូមិការទូតមួយដ៏ក្តៅដែលកើតផ្ទុះចេញពីជំហរផ្សេងគ្នាលើបញ្ហាសមុទ្រចិនខាងត្បូង ជាពិសេសនោះ លើសាលក្រមសមុទ្រចិនខាងត្បូងរបស់ហ្វីលីពីន។ ភាពចម្រូងចម្រាសនោះគឺ កម្ពុជា បន្តរក្សាគោលជំហរមិនប្រែប្រួលក្នុងការបដិសេធមិនចូលរួមចេញសេចក្តីថ្លែងការណ៍រួមឡើយ ប្រសិន ហ្វីលីពីន ដែលប្រកៀកស្មារជាមួយនឹងវៀតណាម ចង់ដាក់បទបញ្ញត្តិទាក់ទងនឹងសាលក្រមនោះ នៅក្នុងសេចក្តីថ្លែងការណ៍របស់អាស៊ានដើម្បីជាយន្តការលើការវិវត្តនៃបញ្ហាសមុទ្រចិនខាងត្បូងនោះ។
យ៉ាងណាក៏ដោយចុះ ព្យុះភ្លៀងការទូត និងចំណោទបញ្ហាដែលថាប្រវត្តិសាស្ត្រអាស៊ានអាចនឹងជាន់ដានចាស់ដូចឆ្នាំ២០១២ក្នុងការមិនអាចចេញសេចក្តីថ្លែងការណ៍ដោយសារការខ្វែងគំនិតគ្នាលើបញ្ហាអធិបតេយ្យសមុទ្រចិនខាងត្បូង ត្រូវបង្ហាញ និងបញ្ចប់ ដោយសមាជិកទាំងដប់ បានសម្របសម្រួលគ្នាហើយផ្តើមពង្រឹងសាមគ្គីភាព និងឯកច្ឆន្ទភាពឡើងវិញដើម្បីរក្សាផលប្រយោជន៍ និងទំនាក់ទំនង។ សក្ខីកម្មត្រូវបានបង្ហាញតាមរយៈសេចក្តីថ្លែងការណ៍រួមនៃកិច្ចប្រជុំរដ្ឋមន្ត្រីការបរទេសលើកទី៤៩ សេចក្តីថ្លែងការណ៍រដ្ឋមន្ត្រីការបរទេសអាស៊ានស្តីពីការរក្សាសន្តិភាព ស្ថិរភាព សន្តិសុខ និងសេចក្តីថ្លែងការណ៍រួមរដ្ឋមន្ត្រីការបរទេសអាស៊ាន-ចិនលើការអនុវត្តឲ្យបានពេញលេញ និងប្រសិទ្ធភាពនៃសេចក្តីថ្លែងការណ៍ស្តីពីភាគីក្រមប្រតិបត្តិសមុទ្រចិនខាងត្បូង (DoC)។
សូមរម្លឹកជាថ្មីផងដែរថា មុនពេលនៃការចេញសេចក្តីថ្លែងការណ៍នេះ កម្ពុជា ដែលមិនមែនជាភាគីជម្លោះផលប្រយោជន៍សមុទ្រចិនខាងត្បូងអ្វីសោះ បានរងការរិះគន់ខ្លាំងពីសំណាក់មជ្ឈដ្ឋានអន្តរជាតិ និងកាសែតបរទេសមួយចំនួន ដោយពួកគេមើលឃើញថា ជំហរកម្ពុជា មានលក្ខណៈលម្អៀង និងផ្គាប់ចិត្តចិនដែលជាសម្ព័ន្ធមិត្តដ៏ជិតស្និទ្ធមួយនៅក្នុងតំបន់។ ការរិះគន់បន្តកើតឡើងកាន់តែខ្លាំង បន្ទាប់ពីចិនបានប្រកាសផ្តល់ជំនួយឥតសំណងដល់កម្ពុជាប្រមាណ៦០០លានដុល្លារសម្រាប់រយៈពេល៣ឆ្នាំ ដែលក្រុងប៉េកាំង បានបញ្ជាក់ថាជំនួយនោះមិនជាប់ពាក់ព័ន្ធនឹងរឿងនយោបាយអ្វីឡើយ តែដើម្បីជួយកម្ពុជាក្នុងការអភិវឌ្ឍសង្គម។
ត្រឡប់មកនិយាយវិញពីគោលជំហរកម្ពុជានោះគឺ កម្ពុជា បានប្រកាសជាងមួយខែមុនការប្រកាសសាលក្រមរបស់មជ្ឈត្តកម្មអន្តរជាតិក្រុងឡាអេ ដោយប្រមុខរាជរដ្ឋាភិបាលកម្ពុជាបានថ្លែងថា កម្ពុជាមិនចូលរួមចេញសេចក្តីថ្លែងការណ៍ពាក់ព័ន្ធសាលក្រមសមុទ្រចិនខាងត្បូងឡើយ បើទោះបីលទ្ធផលនោះសម្រេចឲ្យចិនឬហ្វីលីពីន ឈ្នះក៏ដោយ។
បន្ថែមពីនេះ ប្រមុខរាជរដ្ឋាភិបាលកម្ពុជា ក៏បានបញ្ជាក់ផងដែរថា កម្ពុជា មានជំហរបីចំណុចលើបញ្ហានេះ។ សម្តេចនាយករដ្ឋមន្ត្រីកម្ពុជា ហ៊ុន សែន នៅថ្ងៃទី២០ខែមិថុនាកន្លងទៅ បានថ្លែងបញ្ជាក់ពីគោលជំហររបស់កម្ពុជាបីចំណុចដែលសម្តេច អះអាងថាជាគោលជំហរអព្យាក្រឹត្យលើបញ្ហាសមុទ្រចិនខាងត្បូង។ ជំហរទាំងនោះ គឺភាគីពាក់ព័ន្ធដោះស្រាយជម្លោះ (១) ដោយប្រើយន្តការអាស៊ាន-ចិន ដើម្បីអនុវត្តឲ្យបានពេញលេញនូវសេចក្តីថ្លែងការណ៍ស្តីពីភាគីក្រមប្រតិបត្តិសមុទ្រចិនខាងត្បូង(DoC) (២) ខិតខំតាក់តែងក្រមប្រតិបត្តិសមុទ្រចិនខាងត្បូង(CoC)រវាងអាស៊ាន-ចិន និង (៣) ប្រទេសពាក់ព័ន្ធត្រូវដោះស្រាយ ដោយជជែកពិភាក្សាគ្នាដោយផ្ទាល់។
គួរដល់ពេលបញ្ឈប់គំនិតទុទ្ទិដិ្ឋនិយមខ្លះលើជំហរកម្ពុជាទាក់ទងគោលនយោបាយការបរទេសលើបញ្ហាសមុទ្រចិនខាងត្បូង?
យ៉ាងណាក៏ដោយចុះ ចម្លើយ បានបញ្ជាក់យ៉ាងច្បាស់តាមរយៈសក្ខីកម្មខាងលើគឺ សេចក្តីថ្លែងការណ៍រដ្ឋមន្ត្រីការបរទេសអាស៊ាន មិនមានអ្វីខុសគ្នាទៅនឹងគោលជំហររបស់កម្ពុជាឡើយ។ ជាងនេះទៅទៀត វា ក៏មានន័យដែរថា សមទ្ធិផលកម្ពុជាក្នុងពេលធ្វើជាប្រធានអាស៊ានឆ្នាំ២០០២ ក៏នៅតែបន្តលើកឡើងជាមូលដ្ឋានដ៏សារវន្ត័សម្រាប់ជាយន្តការជម្លោះសមុទ្រចិនខាងត្បូងដោយមិនត្រឹមតែរវាងចិន និងហ្វីលីពីនប៉ុណ្ណោនោះទេ តែសម្រាប់ភាគីជម្លោះផ្សេងទៀតដែលរួមមានព្រុយណេ ម៉ាឡេស៊ី និងវៀតណាមផងដែរ។
ផ្ទុយទៅវិញ បើសមាជិកអាស៊ានជម្នះដាក់បញ្ចូលបទញ្ញត្តិសាលក្រមសមុទ្រចិនខាងត្បូងនៅក្នុងសេចក្តីថ្លែងការណ៍ គឺអាស៊ានត្រូវតែទទួលនូវលទ្ធផលមួយដែលបានដឹងទុកជាមុន គឺការជាន់ដានប្រវត្តិសាស្ត្រឆ្នាំ២០១២។ ហើយនេះ វា មិនត្រឹមតែបង្ហាញពីកម្សោយនៃស្ថាប័នប៉ុណ្ណោះនោះទេ តែ វា ក៏ផ្តល់ព្យសនកម្មដល់ទំនាក់ទំនងរវាងអាស៊ាន និងចិនផងដែរ ដ្បិតជំហរនោះ បានបង្ហាញពីការចូលរួមប្រឆាំងចិនដូច្នេះឯង។ នេះ ក៏មិនមែនមានន័យដែរថា មិនចេញសេចក្តីថ្លែងការណ៍គាំទ្រសាលក្រម គឺដើម្បីផ្គាប់ចិនដែរ តែដើម្បីទុកឱកាសឲ្យចិននិងហ្វីលីពីន ឬភាគីពាក់ព័ន្ធផ្សេងទៀតដោះស្រាយជាមួយគ្នាដោយផ្ទាល់ដូចដែលបានបញ្ជាក់នៅក្នុងប្រការ៤ និង៥នៃ DoC។
សូមជម្រាបផងដែរថា នៅថ្ងៃទី១២ ខែកក្កដាកន្លងទៅ តុលាការអន្តរជាតិក្រុងឡាអេ នៃប្រទេសហូឡង់ បានប្រកាសសាលក្រមសមុទ្រចិនខាងត្បូងតាមបណ្តឹងរបស់ហ្វីលីពីនដោយបកស្រាយថាការទាមទារដោយប្រើផែនទីប្រាំបួនត្រេរបស់ចិន(Nine- dash-line) និងសកម្មភាពមួយចំនួនរបស់ចិននៅក្នុងសមុទ្រចិនខាងត្បូង មិនមានមូលដ្ឋានផ្នែកច្បាប់ឡើយ ពោលគឺសកម្មភាពរបស់ចិន បានបំពាននឹងច្បាប់។
ចិន បានប្រកាសជាច្រើនលើកច្រើនសារមកហើយថា ចិន មិនទទួលស្គាល់យុត្តាធិការរបស់មជ្ឈត្តកម្មអន្តរជាតិនោះទេ និងថែមទាំងប្រកាសមោឃភាពជាលក្ខណៈឯកតោភាគីទៀតផង។ អ្វីដែលចិនអាចធ្វើបាននោះគឺ ដោះស្រាយតាមការចរចា និងពិគ្រោះយោបល់ជាលក្ខណៈទ្វេភាគី។ បន្ថែមពីនេះ ចិន ប្រកាសថា មិនបោះបង់សំណង់របស់ខ្លួននៅក្នុងតំបន់ជម្លោះដោយពាក់កណ្តាលផ្លូវ ហើយនឹងប្រើគ្រប់មធ្យោបាយដើម្បីការពារដែនអធិបតេយ្យ និងការគំរាមផ្សេងៗទៀតផងដែរ។ គេអាចនិយាយបានថា «កុំឈ្លោះជាមួយស្រី កុំក្តីជាមួយចិន»។
នយោបាយ និងសេដ្ឋកិច្ចរវាងអាស៊ាន-ចិន ដើរជាមួយគ្នា
ដូចបានបញ្ជាក់ បើទោះជាចិនមិនដែលទទួលស្គាល់ពីយុត្តាធិការរបស់មជ្ឈត្តកម្មអន្តរជាតិក៏ដោយ ចិន ក៏មិនដែលនៅស្ងៀមឲ្យមជ្ឈដ្ឋានអន្តរជាតិ បន្ទោសខ្លួន ពោលគឺត្រឹមតែសាលក្រមរបស់តុលាការអន្តរជាតិ បានធ្វើឲ្យចិន បាក់មុខនៅក្នុងសហគមន៍អន្តរជាតិមិនតិចនោះទេ។ ក្នុងន័យនេះ ប្រសិនបើអាស៊ាន ចូលរួមចេញសេចក្តីថ្លែងការណ៍ប្រឆាំងចិនទៀតនោះ វា នឹងធ្វើចិន កាន់តែនៅមិនស្ងៀម និងអាចប៉ះពាល់ដល់ទំនាក់ទំនងអាស៊ាន-ចិន និងចិនជាមួយរដ្ឋអាស៊ាននីមួយៗទៀតផងដែរ ជាពិសេសនោះ គឺផលប្រយោជន៍ សេដ្ឋកិច្ច និងពាណិជ្ជកម្មតែម្តង។
សូមជម្រាបផងដែរថា ចិន បានចាប់ដំណើរការនៃការសុំជាដៃគូសន្ទនារបស់អាស៊ាននៅឆ្នាំ១៩៩១ និងបានក្លាយជាដៃគូសន្ទនាពេញសិទ្ធិនៅឆ្នាំ១៩៩៦។ ជារឿងដែលមិនអាចប្រកែកបាននោះ រយៈពេលជាង២ទសវត្សរ៍មកនេះ ចិន បានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចអាស៊ាន និងប្រទេសកំពុងអភិវឌ្ឍន៍នៅក្នុងតំបន់អាស៊ីអាគ្នេយ៍។
តាមការអះអាងរបស់លោក Xu Bu អគ្គរដ្ឋទូតចិនប្រចាំអាស៊ាន ទំហំពាណិជ្ជកម្មរវាងចិនមកកាន់អាស៊ាន បានកើនដល់៤៧២ពាន់លានដុល្លារនៅឆ្នាំ២០១៥ ដែលទំហំនេះ ធ្វើឲ្យចិន នៅតែជាដៃគូពាណិជ្ជកម្មធំបំផុតរបស់អាស៊ានដដែលខណៈទំហំ ពាណិជម្មអាស៊ានទៅកាន់ចិន នៅលំដាប់ទី៣ដដែលផងដែរនោះ។ ចិន បានក្លាយជាដៃគូពាណិជ្ជកម្មធំបំផុតរបស់ អាស៊ានចាប់តាំងពីឆ្នាំ២០០៩មក។ និយាយឲ្យខ្លីទៅ ដង្ហើមសេដ្ឋកិច្ចអាស៊ាន ពឹងផ្អែកទៅលើចិនខ្លាំង។
បើក្រឡេកទៅមើលទំហំពាណិជ្ជកម្មទ្វេភាគីរវាងចិន និងអាស៊ានវិញម្តងនោះ យើងឃើញថា កម្ពុជា មានទំហំពាណិជ្ជកម្មតូចជាងបណ្តាប្រទេសអាស៊ានផ្សេងទៀតនោះទេ។ បើយោងតាម
Focus Economics (ស្ថាប័នព្យាករណ៍សេដ្ឋកិច្ចមួយដ៏ល្បីដែលមានទីស្នាក់ការកណ្តាលនៅ Barcelona នៃប្រទេសអេស្ប៉ាញ) ប្រទេសសមាជិកអាស៊ានមានទំហំពាណិជ្ជកម្មជាមួយចិននៅក្នុងឆ្នាំ២០១៥ (គិតតែការនាំចេញទៅចិន)ក្នុងទំហំដូចជា ព្រុយណេ ១.៤ពាន់លានដុល្លារ, កម្ពុជា ៣.៨ពាន់លានដុល្លារ, ឥណ្ឌូនេស៊ី ៣៤.៣ ពាន់លានដុល្លារ, ឡាវ ១.៣ ពាន់លានដុល្លារ, មីយ៉ាន់ម៉ា ៩.៤ ពាន់លានដុល្លារ, ម៉ាឡេស៊ី ៤៤.២ ពាន់លានដុល្លារ, ហ្វីលីពីន ២៦.៧ពាន់លានដុល្លារ, សិង្ហបុរី ៥៣.១ ពាន់លានដុល្លារ ថៃ ៣៨.៣ ពាន់លានដុល្លារ និងវៀតណាម ៦៦.៤ ពាន់លានដុល្លារ។ នេះ ក៏មានន័យដែរថា បើទំនាក់ទំនងអាស៊ាន និងចិន មិនល្អនោះ ប្រទេសដែលប៉ះពាល់ខ្លាំងជាងគេមិនមែនកម្ពុជាឡើយ តែប្រទេសអាស៊ានមួយចំនួនដែលមានទំនាក់ទំនងពាណិជ្ជកម្មធំជាមួយនឹងចិននោះទេ។
ក្រៅពីទំនាក់ទំនងពាណិជ្ជកម្ម តាមរយៈកិច្ចសហប្រតិបត្តិការជាមួយចិន អាស៊ាន និងរដ្ឋអាស៊ាន ក៏ទទួលបានផលប្រយោជន៍ជាច្រើន ពីគម្រោង និងគំនិតផ្តួចផ្តើមដែលបង្កើតឡើងដោយចិនក្នុងដំណើរអភិវឌ្ឍន៍សេដ្ឋកិច្ចរបស់អាស៊ានផងដែរ។ គំនិតផ្តួចផ្តើមទាំងនោះ មានដូចជា គំនិតផ្តួចផ្តើមខ្សែក្រវ៉ាត់មួយ និងវិថីមួយ (OBOR = One Belt One Road) ធនាគារវិនិយោគហេដ្ឋារចនាសម្ព័ន្ធអាស៊ី (AIIB) និងភាពជាដៃគូសេដ្ឋកិច្ចក្នុងតំបន់គ្រប់ជ្រុងជ្រោយ (RCEP) ដែលជាកិច្ចព្រមព្រៀងពាណិជ្ជកម្មដ៏ធំមួយដែលចិន និងអាស៊ាន គ្រោងនឹងបញ្ចប់ការចរចានៅឆ្នាំ២០១៦នេះជាដើម៕