English-Français
ជាតិ
ទីផ្សារអចលនទ្រព្យទ្រឹង តែអ្នកជំនួញសង្ឃឹមលើទីផ្សារអ្នកចូលនិវត្តន៍បរទេស
× ភ្នំពេញ៖ ស្ថានភាពអចលនទ្រព្យនៅក្នុងប្រទេសកម្ពុជានៅពេលនេះ ហាក់បីដូចជានៅទ្រឹង មានន័យថា ទីផ្សាទំនងជាខ្វះអ្នកទិញ ហើយអ្នកលក់មានចំនួនច្រើនពេក។ និយាយឲ្យខ្លី គឺថា ការផ្គត់ផ្គង់ច្រើន តែតម្រូវការតិច។ លោក Anthony Galliano, អ្នកជំនួញជនជាតិអាមេរិកកាំងនៅកម្ពុជានៃ Group CEO និងជាអ្នកទទួលខុសត្រូវនៃក្រុមហ៊ុនភ្នាក់ងារផ្សព្វផ្សាយពាណិជ្ជកម្ម Jump Digital Cambodia អត្ថាធិប្បាយថា ទីផ្សារអចលនទ្រព្យហាក់នៅទ្រឹង ហើយការផ្គត់ផ្គង់អាចនឹងច្រើនជាងតម្រូវការនៅឆ្នាំខាងមុខទៀតនេះ។
ដើម្បីជ្រាបព័ត៌មានលម្អិត សូមអញ្ជើញស្តាប់បទសម្ភាសន៍ជាភាសាអង់គ្លេសរវាងលោក គី សុខលីម អគ្គនាយកសារព័ត៌មានថ្មីៗ និង លោក Anthony Galliano, អ្នកជំនួញជនជាតិអាមេរិកកាំងនៅកម្ពុជានៃ Group CEO និងជាអ្នកទទួលខុសត្រូវនៃក្រុមហ៊ុនភ្នាក់ងារផ្សព្វផ្សាយពាណិជ្ជកម្ម Jump Digital Cambodia ដូចតទៅ៖
ទីផ្សារអចលនទ្រព្យចាប់ផ្តើមទ្រឹង ហើយការផ្គត់ផ្គង់នឹងច្រើនលើសតម្រូវការនៅឆ្នាំខាងមុខ ជាពិសេស នៅទីក្រុងភ្នំពេញ។ នេះ គឺជាការទស្សន៍ទាយរបស់លោក Anthony Galliano, អ្នកជំនួញជនជាតិអាមេរិកកាំងនៅកម្ពុជានៃ Group CEO និងជាអ្នកទទួលខុសត្រូវនៃក្រុមហ៊ុនភ្នាក់ងារផ្សព្វផ្សាយពាណិជ្ជកម្ម Jump Digital Cambodia ដែលបានមកបោះទុនរកស៊ីនៅក្នុងប្រទេសកម្ពុជាអស់រយៈពេលជាច្រើនឆ្នាំមកហើយ។
សម្រាប់លោក Anthony Galliano, ឥឡូវនេះ ការផ្គត់ផ្គង់ក៏ដូចជាច្រើនគួរសមណាស់ដែរ។ ហើយវារឹតតែច្រើនថែមទៀតនៅ១ឆ្នាំ ឬ២ឆ្នាំខាងមុខទៀតនេះ។ លោកគិតថា តម្លៃវានឹងចាប់ផ្តើមធ្លាក់ចុះនៅពេលដែលការផ្តត់ផ្គង់នឹងច្រើនជាងតម្រូវការ។ លោក Anthony Galliano កត់សម្គាល់ថា អ្នកវិនិយោគមិនគួរសាងសង់ច្រើននៅទីក្រុងភ្នំពេញទៀតទេ ព្រោះវាដូចជាច្រើនជ្រុកពេកហើយ តែបើនៅតាមខេត្តមួយចំនួនដូចជា បាត់ដំបង សៀមរាប ក្រុងព្រះសីហនុ ឱកាសដូចជានៅមានល្អ។
ទីផ្សារអចលនទ្រព្យដូចជាប្រឈមនឹងបញ្ហាខ្លះ តែលោក Anthony Galliano ដូចជាមិនមានគំនិតទុទិដ្ឋិនិយមខ្លាំងពេកទេ។ សម្រាប់រូបលោក តម្លៃអចលនទ្រព្យថយចុះ អ្នកទិញរឹតតែមានឱកាសកាន់តែល្អ។ លោកផ្តល់យោបល់ថា៖«វារឹតតែល្អសម្រាប់អ្នកទិញក្នុងរយៈពេល១ ឬ២ឆ្នាំខាងមុខទៀត»។
ទោះបីជាទីផ្សារអចលនទ្រព្យទំនងជាធ្លាក់ចុះនាថ្ងៃខាងមុខក៏ដោយ ក៏លោក Anthony Galliano ដូចជានៅតែមានក្តីសង្ឃឹមច្រើនទៅវិញ។ ក្តីសង្ឃឹមរបស់លោក គឺពឹងផ្អែកនៅទីផ្សារនៃអ្នកចូលនិវត្តន៍ជនបរទេស ដូចជា ជនជាតិជប៉ុន តៃវ៉ាន់…សម្រាប់លោក Anthony Galliano, កម្ពុជា គឺជាទឹកដីល្អសម្រាប់អ្នកចូលនិវត្តន៍បរទេស ពីព្រោះ តម្លៃនៃការរស់នៅកម្ពុជាថោក សុវត្ថិភាពល្អ អាកាសធាតុល្អ ឆ្នេរល្អ ពលរដ្ឋខ្មែររាក់ទាក់។ កាលពីមុនឡើយ អ្នកចូលនិវត្តន៍បរទេសភាគច្រើនសំឡឹងមើលដែនដីនៃប្រទេសថៃ តែពេលនេះ ថៃហាក់ដូចជាចាល់ច្រើនពេកសម្រាប់អ្នកចូលនិវត្តន៍បរទេស ដូច្នេះ បច្ចុប្បន្ននេះ អ្នកចូលនិវត្តន៍បរទេសកំពុងសំឡឹងមើលទីផ្សារនៃប្រទេសកម្ពុជា ទីដែលពួកគេអាចរស់នៅបានដ៏សុខសាន្ត។ សូមបញ្ជាក់ថា ជនបរទេសអាចទិញផ្ទះសម្បែងអចលនទ្រព្យនៅក្នុងប្រទេសកម្ពុជា ចាប់ពីជាន់ទី១ឡើងទៅ។ ទីផ្សារ Condo គឺឆ្លើយតបយ៉ាងពិតប្រាកដចំពោះតម្រូវការជនបរទេស និងជាពិសេស អ្នកចូលនិវត្តន៍បរទេស៕
© រក្សាសិទ្ធិដោយ thmeythmey.com