បទយកការណ៍ / បទសម្ភាសន៍
ទីផ្សាររថយន្តលក់ដាច់ខ្លាំង នៅពេលពលរដ្ឋមានប្រាក់ចំណូលប្រចាំឆ្នាំ២៥០០ដុល្លារអាមេរិក
× ភ្នំពេញ៖ ទីផ្សាររថយន្តលក់ដាច់ខ្លាំង នៅពេលពលរដ្ឋមានប្រាក់ចំណូលប្រចាំឆ្នាំ២៥០០ដុល្លារ អាមេរិកក្នុង ម្នាក់ៗ។ ប្រាក់ចំណូលពលរដ្ឋប្រចាំឆ្នាំម្នាក់ជាង១ពាន់ដុល្លារអាមេរិក គឺសម្រាប់ទីផ្សារម៉ូតូ។ ពលរដ្ឋខ្មែរមានប្រាក់ចំណូលប្រចាំឆ្នាំជាង១២០០ដុល្លារអាមេរិកនៅ ឆ្នាំ២០១៥នេះ។ ស្របពេលដែលក្រុមហ៊ុនរថយន្តថ្មីកំពុងបង្ហាញវត្តមាននៅក្នុងប្រទេសក ម្ពុជានោះ ក្រុមហ៊ុន ស្តារ អូតូ (ខេមបូឌា) លីមីតធីត ដែលជាក្រុមហ៊ុនអន្តរជាតិដ៏ធំមួយ ក៏ត្រូវបានបង្កើតឡើងនៅចុងឆ្នាំ២០១៤ និងដើមខែមករាឆ្នាំ២០១៥ នៅរាជធានីភ្នំពេញ។ នេះគឺជាក្រុមហ៊ុនតែមួយគត់ដែលទទួលបានសិទ្ធិផ្តាច់មុខពីក្រុមហ៊ុន Daimler AG នៅប្រទេសអាល្លឺម៉ង់ ក្នុងការនាំចូល ចែកចាយ ដាក់លក់ ប្តូរគ្រឿងបន្លាស់ ថែទាំ និងជួសជុលនូវគ្រប់ប្រភេទម៉ូដែលនៃរថយន្តម៉ាក Mercedes-Benz។ ក្រុមហ៊ុន ស្តារ អូតូ (ខេមបូឌា) លីមីតធីត ជាក្រុមហ៊ុនតែមួយគត់ដែលមានសិទ្ធិប្រើប្រាស់លើស្លាកសញ្ញា (Logo) របស់ Mercedes-Benz ប្រចាំនៅព្រះរាជាណាចក្រកម្ពុជា។ ដើម្បីជ្រាបព័ត៌មានលម្អិត សូមអញ្ជើញអានបទសម្ភាសន៍រវាងលោក គី សុខលីម អគ្គនាយកសារព័ត៌មានអេឡិចត្រូនិកថ្មីៗ និងលោក លោក James Zemke អគ្គនាយកក្រុមហ៊ុន ស្តារ អូតូ (ខេមបូឌា) លីមីតធីត ដូចតទៅ៖
លោក គី សុខលីម៖ ហេតុអ្វីបានជាក្រុមហ៊ុន Star Auto ស្តារ អូតូ (ខេមបូឌា) លីមីតធីតរបស់លោកចាប់ផ្តើមបើកការិយាល័យ ឬសេវាលក់រថយន្តម៉ាកល្បីៗរបស់ក្រុមហ៊ុន Mercedes-Benz នៅពេលនេះ? ហេតុដូចម្តេចក៏មិនបើកកាលពី១០ ឬ២០ឆ្នាំមុន?
លោក James Zemke៖ តាមពិតទៅវា មិនមែនជាការសម្រេចចិត្តរបស់យើងតែម្នាក់ឯងនោះទេ។ យើងគឺជាក្រុមហ៊ុនឯករាជ្យដែលមានតួនាទីជួយចែកចាយលក់រថយន្តជូន ក្រុមហ៊ុន Mercedes-Benz។ ក្រុមហ៊ុន ស្តារ អូតូ (ខេមបូឌា) លីមីតធីត របស់យើងត្រូវបានបង្កើតឡើងនៅចុងឆ្នាំ២០១៤ និងដើមខែមករាឆ្នាំ២០១៥ នៅរាជធានីភ្នំពេញ។ វាគឺជាក្រុមហ៊ុនតែមួយគត់ដែលទទួលបានសិទ្ធិផ្តាច់មុខពីក្រុមហ៊ុន Daimler AG នៅប្រទេសអាល្លឺម៉ង់ ក្នុងការនាំចូល ចែកចាយ ដាក់លក់ ប្តូរគ្រឿងបន្លាស់ ថែទាំ និងជួសជុលនូវគ្រប់ប្រភេទម៉ូដែលនៃរថយន្តម៉ាក Mercedes-Benz និងជាក្រុមហ៊ុនតែមួយគត់ដែលមានសិទ្ធិប្រើប្រាស់លើស្លាកសញ្ញា (Logo) របស់ Mercedes-Benz ប្រចាំនៅព្រះរាជាណាចក្រកម្ពុជា។ មុនខែមករាឆ្នាំ២០១៥ ក្រុមហ៊ុន Daimler AG នៅប្រទេសអាល្លឺម៉ង់ បានប្រគល់សិទ្ធិឲ្យក្រុមហ៊ុនក្នុងស្រុកមួយឈ្មោះថា ក្រុមហ៊ុន ហ៊ុង ហ៊ាប (កាំបូឌា) ចំកាត់ (Hung Hiep Cambodia Co., Ltd.) ជាអ្នកជួយលក់បន្តនៅក្នុងប្រទេសកម្ពុជា។ ប៉ុន្តែចាប់ពីពេលនេះទៅ គឺក្រុមហ៊ុនរបស់យើង Star Auto ជាអ្នកមានសិទ្ធិផ្តាច់មុខម្តងដែលគ្មានពាក់ព័ន្ធអ្វីទៅនឹងក្រុមហ៊ុន Hung Hiep ទេ។
Star Auto ជាបុត្រសម្ព័ន្ធរបស់ក្រុមហ៊ុន លៃ ស៊ីង ហុង ហ្គ្រូប (Lei Shing Hong Group) ដែលជាក្រុមហ៊ុនដ៏ធំជាងគេនៅទីក្រុងហុងកុងមានបទពិសោធជាងសែសិប(៤០) ឆ្នាំក្នុងការចែកចាយរថយន្ត Mercedes-Benz ទៅបណ្តាទីផ្សារអន្តរជាតិធំៗជាច្រើនមានដូចជាប្រទេស អាល្លឺម៉ង់ អូស្ត្រាលី ចិន ហុងកុង កូរ៉េខាងត្បូង ម៉ាឡេស៊ី វៀតណាម តៃវ៉ាន់ និងកម្ពុជាជាដើម។ ឆ្លើយទៅសំណួរដែលសួរថា ហេតុអ្វីបានជា Star Auto មិនចូលមកកាលពី១០ឆ្នាំមុន។ យើងដឹងហើយថា កាលណោះ ទីផ្សារសម្រាប់ Mercedes-Benz នៅតូចណាស់ ពីព្រោះប្រាក់ចំណូលរបស់ពលរដ្ឋខ្មែរនៅមានកម្រិតទាប។ រឿងមួយទៀតដែលខ្ញុំចង់ប្រាប់ដែរនោះ គឺថា នាពេលបច្ចុប្បន្ននេះ យើងកំពុងសាងសង់ អគារតាំងបង្ហាញ និងថែទាំជួសជុលរថយន្ត (Show Room) រថយន្ត Mercedes-Benz ថ្មីដែលធំនិងទំនើបជាងគេបង្អស់នៅកម្ពុជានេះ។
លោក គី សុខលីម៖ នៅទីណាដែរទីតាំងថ្មីនោះលោក?
លោក James Zemke៖ នៅមិនឆ្ងាយប៉ុន្មានពីរង្វង់មូលក្បាលថ្នល់ទេ ពោលគឺនៅក្បែរសាលារៀនអន្តរជាតិ ISPP ថ្មី (ចម្ងាយពី២ទៅ៣គីឡូម៉ែត្រខាងត្បូងឈាងខាងលិចស្ពាន់ក្បាលថ្នល់)។ Show Room របស់រថយន្ត Mercedes-Benz ថ្មីនេះស្ថិតនៅលើមហាវិថីសម្តេច ហ៊ុន សែន (នៅលើបឹងទំពុនចាស់)។
លោក គី សុខលីម៖ តើពេលណាទៅទើបសំណង់អគារ Show Room ត្រូវបានបញ្ចប់?
លោក James Zemke៖ អគារ Show room ថ្មីអាចនឹងបញ្ចប់នៅចុង ឆ្នាំ២០១៦ ឬដើមឆ្នាំ២០១៧ ។
លោក គី សុខលីម៖ រថយន្ត Mercedes-Benz គឺជាប្រភេទរថយន្តប្រណិតដែលមានតម្លៃ ខ្ពស់។ តើលោកគិតថា ពលរដ្ឋខ្មែរមានប្រាក់ដើម្បីទិញដែរឬទេ?
លោក James Zemke៖ នេះគឺជាសំណួរល្អ។ ជាច្រើនឆ្នាំកន្លងមក នៅពេលខ្ញុំចាប់ផ្តើមប្រឡូកក្នុងវិស័យរថយន្តនេះ មានការសិក្សាមួយនិយាយថា ប្រសិនបើប្រាក់ចំណូលរបស់ប្រជាពលរដ្ឋនៃប្រទេសមួយស្ថិតក្នុងកម្រិត ២៥០០ដុល្លារក្នុងមួយឆ្នាំ គេគិតថា ពលរដ្ឋអាចមានលទ្ធភាពទិញរថយន្តបាន។ ប្រាក់ចំណូលប្រចាំឆ្នាំតិចជាងនេះ គឺសម្រាប់ទីផ្សារម៉ូតូ។ នៅកម្ពុជា ប្រាក់ចំណូលប្រចាំឆ្នាំរបស់ប្រជាពលរដ្ឋប្រមាណជាជាង១០០០ដុល្លារ បន្តិច ដូច្នេះហើយបានជាទីផ្សារម៉ូតូកើនឡើងខ្លាំងណាស់ ដល់កំពូលតែម្តង។ តែនេះមិនមែនមានន័យថា គ្មានអ្នកទិញរថយន្តទេនោះ។ មានក្រុមហ៊ុន មានអង្គការត្រូវការរថយន្តដែរ តែចំនួនវានៅមានកម្រិត។ បច្ចុប្បន្នទីផ្សារតូចមែន ប៉ុន្តែសេដ្ឋកិច្ចនៃប្រទេសមួយនេះនឹងរីកចម្រើនជាងនេះបន្តិចម្តងៗ ។ ខ្ញុំដឹងហើយថា ឥឡូវនេះ ទីផ្សារក៏នៅមានកម្រិតដែរ ប៉ុន្តែ នេះជាពេលវេលាដែលយើងត្រូវរៀបចំអ្វីៗគ្រប់យ៉ាងដូចជា៖ បណ្តុះបណ្តាលបុគ្គលិកផ្នែកលក់ បុគ្គលិកផ្នែកជំនាញជួសជុល និង ហើយចាំបាច់សាងសង់អគារថ្មីមួយស្របតាមស្តង់ដារអន្តរជាតិ។ល។
លោក គី សុខលីម៖ ពលរដ្ឋខ្មែរនៅចូលចិត្តប្រើប្រាស់រថយន្តជជុះ នៅឡើយដោយសារប្រាក់ចំណូលរបស់ពួកគេនៅមានកម្រិត។ តើគូប្រកួតប្រជែងរបស់លោកជាក្រុមហ៊ុននាំចូលរថយន្តថ្មី ឬក្រុមហ៊ុននាំចូលរថយន្តជជុះ?
លោក James Zemke៖ ទាំងពីរហ្នឹងតែម្តង។ យើងប្រកួតជាមួយទាំងពីរនេះតែម្តង។ អ្នកទិញមិនបានដឹងច្បាស់ទេថា ទោះបីរថយន្តម៉ាកដូចគ្នាក៏ដោយ តែរថយន្តជជុះ និងរថយន្តថ្មីមានលក្ខណៈខុសគ្នាច្រើនណាស់។
លោក គី សុខលីម៖ រថយន្តលោកនៅទីនេះ ផលិតទាំងអស់នៅក្នុងប្រទេសអាលឺ្លម៉ង់មែនឬទេ?
លោក James Zemke៖ វាអាស្រ័យទៅតាម«ម៉ូដែល»របស់វាដែរ។ រថយន្តខ្លះផលិតនៅក្នុងប្រទេសអាល្លឺម៉ង់ផ្ទាល់ និងរថយន្តខ្លះទៀតផលិតនៅក្នុងប្រទេសអាមេរិក។
លោក គី សុខលីម៖ ក្នុងរយៈពេល៦ខែដើមឆ្នាំ២០១៦នេះ តើក្រុមហ៊ុនលោកលក់រថយន្តដាច់អស់ប៉ុន្មានគ្រឿងដែរ?
លោក James Zemke៖ ចំនួនលក់សរុបទាំងអស់ គឺ១២គ្រឿងក្នុងរយៈពេល៦ខែដើមឆ្នាំ២០១៦នេះ។
លោក គី សុខលីម៖ តើការលក់របស់លោកមានប៉ុន្មានភាគរយនៃទីផ្សារលក់រថយន្តថ្មីនៅកម្ពុជាទាំងមូលប្រចាំឆ្នាំ?
លោក James Zemke៖ អូហ៍នៅតូចដែរ។ នៅក្នុងប្រទេសកម្ពុជា រថយន្តជជុះគ្រប់គ្រងទីផ្សារជាង៩០ភាគរយ។ រថយន្តថ្មីលក់បានតិចជាង១០ភាគរយទេ។ រថយន្តថ្មីចំនួន២៥០០គ្រៀងត្រូវបានគេលក់ជារៀងរាល់ឆ្នាំ។
លោក គី សុខលីម៖ តើលោកត្រូវការ១០ឆ្នាំឬ២០ឆ្នាំទៀតទើបក្រុមហ៊ុនលោកអាចលក់បានចំនួន១០០គ្រឿងក្នុង១ឆ្នាំមែនទេ?
លោក James Zemke៖ មិនយូរដល់អ៊ីចឹងពេកទេ។ យើងអាចលក់បាន១០០គ្រឿងនៅពេលខាងមុខដ៏ឆាប់ៗនេះ។ ហើយក្នុង១០ឬ២០ឆ្នាំទៀត ផលិតផលយើងអាចលក់ដាច់ជាងគេក៏ថាបាន ហើយយើងជឿជាក់ថាយើងនឹងក្លាយជាអ្នកនាំមុខគេក្នុងទីផ្សារថយន្ត ប្រណិតនៅកម្ពុជា។
លោក គី សុខលីម៖ តើរថយន្ត Mercedes-Benz មានតម្លៃប៉ុន្មានដែរលោក?
លោក James Zemke៖ វាអាចមានតម្លៃពីជាង១០ម៉ឺនដុល្លារ ទៅដល់៤០ម៉ឺនដុល្លារអាមេរិក។
លោក គី សុខលីម៖ តើអ្វីទៅជាលក្ខណៈពិសេសរបស់រថយន្ត Mercedes-Benz?
លោក James Zemke៖ លក្ខណៈពិសេសរបស់រថយន្តអាល្លឺម៉ង់ គឺធានាសុវត្ថិភាពខ្ពស់, ប្រើប្រាស់ជាប់យូរ, វិស្វកម្មផលិតកម្មកម្រិតខ្ពស់, រួមចំណែកការពារបរិស្ថានល្អ, ឌីហ្សាញសាមញ្ញ តែគួរឲ្យគយគន់ មានផាសុកភាព តម្រូវគ្រប់វ័យ មានវ័យចំណាស់ វ័យកណ្តាល និងយុវវ័យ ជាដើម…៕
© រក្សាសិទ្ធិដោយ thmeythmey.com