អន្តរជាតិ
រុស្ស៊ីដកយន្តហោះចម្បាំងចេញពីអ៊ីរ៉ង់វិញ ខណៈអ៊ីរ៉ង់ថា រុស្ស៊ីបំពានទំនុកចិត្ត
× រុស្ស៊ីបានប្រកាសថា ខ្លួនបានសម្រេចគោលដៅរបស់ខ្លួនហើយក្នុងការប្រើប្រាស់មូលដ្ឋានទ័ពអ៊ីរ៉ង់ដើម្បីវាយប្រហារក្រុមភេរវជននៅស៊ីរី។ បច្ចុប្បន្ននេះយន្តហោះចម្បាំងនិងទម្លាក់គ្រាប់បែកទាំងអស់ចាក់ចេញពីអ៊ីរ៉ង់អស់ហើយ តែក្រុងម៉ូស្គូអះអាងថា អនាគតរុស្ស៊ីអាចនឹងប្រើប្រាស់មូលដ្ឋានទ័ពអ៊ីរ៉ង់ទៀត។ យ៉ាងណាមិញ វាហាក់ដូចជារហ័សពេក ដែលរុស្ស៊ីដកសព្វាវុធចេញពីអ៊ីរ៉ង់។ គេមានមន្ទិលសង្ស័យថា អ៊ីរ៉ង់និងរុស្ស៊ីមានការទាស់ទែងខ្វែងគំនិតគ្នារឿងប្រើប្រាស់មូលដ្ឋានទ័ពអ៊ីរ៉ង់ដើម្បីវាយប្រហារក្រុមភេរវជននេះ។ កន្លងមកសមាជិកសភាអ៊ីរ៉ង់ខ្លះថា កិច្ចព្រមព្រៀងឲ្យរុស្ស៊ីប្រើប្រាស់ទឹកដីអ៊ីរ៉ង់រំលោភរដ្ឋធម្មនុញ្ញ ហើយប្រមុខការទូតអ៊ីរ៉ង់ក៏រិះគន់ការផ្សព្វផ្សាយព័ត៌មានពាសវាលពាសកាលនិង អួតអាងពីការទទួលបានសិទ្ធិប្រើប្រាស់មូលដ្ឋានទ័ពអ៊ីរ៉ង់ខ្លាំងពេក។
សូមស្តាប់ការបកស្រាយរបស់លោក សៅ ផលនិស្ស័យ៖
គិតទៅមិនដល់មួយសប្តាហ៍ស្រួលបួលផង រុស្ស៊ីស្រាប់ប្រកាសដកយន្តហោះទម្លាក់គ្រាប់បែក Tu-22M3 និងយន្តហោះចម្បាំង Su-34 ជាច្រើនគ្រឿងចេញពីមូលដ្ឋានទ័ព Hamedan នៅភាគខាងលិចប្រទេសអ៊ីរ៉ង់ទៅកាន់ទឹកដីខ្លួនវិញ។ បើតាមសម្តីអ្នកនាំពាក្យក្រសួងការពារជាតិរុស្ស៊ី Igor Konashenkov ដែលស្រង់សម្តីដោយសារព័ត៌មាន RT នៅថ្ងៃចន្ទ ទី ២២ សីហា រុស្ស៊ីដកសព្វាវុធចេញដោយសារខ្លួនសម្រេចគោលដៅហើយ ហើយកិច្ចសហប្រតិបត្តិការនាពេលអនាគតអាចនឹងត្រូវធ្វើឡើងដោយផ្អែកលើការប្រឆាំងភេរវកម្មនិងបញ្ហានៅស៊ីរី។
សូមទាញការចាប់អារម្មណ៍បន្តិចដែរ។ រុស្ស៊ីប្រកាសថាយន្តហោះចម្បាំងខ្លួនចេញវាយប្រហារពីទឹកដីអ៊ីរ៉ង់នៅថ្ងៃ ១៦ សីហាកន្លងទៅ ហើយរដ្ឋាភិបាលក្រេមឡាំងក៏បញ្ជាក់ផងដែរថា វាមិនមែនជាប្រតិបត្តិការអចិន្ត្រៃយ៍ឡើយ។ ភ្លាមៗក្រោយរុស្ស៊ីបង្អួតយន្តហោះចម្បាំងនិងយន្តហោះទម្លាក់គ្រាប់ដែលហោះហើរចេញពីអ៊ីរ៉ង់មកកម្ទេចក្រុមភេរវជន អាមេរិកបានចោទរុស្ស៊ីថា វាអាចរំលោភដំណោះស្រាយក្រុមប្រឹក្សាសន្តិសុខអង្គការសហប្រជាជាតិ 2231 ពាក់ព័ន្ធការផ្ទេរអាវុធទៅអ៊ីរ៉ង់។ ប៉ុន្តែរុស្ស៊ីបានតបវិញថា វាមិនប៉ះពាល់ដល់ដំណោះស្រាយអង្គការសហប្រជាជាតិឡើយព្រោះវាមិនមែនជាការលក់អាវុធឲ្យអ៊ីរ៉ង់។ ហើយវាក៏មិនត្រូវការការអនុញ្ញាតពីអង្គការសហប្រជាជាតិជាមុនដែរ ព្រោះវាជាកិច្ចព្រមព្រៀងទ្វេភាគីដែលឈរលើគោលការណ៍គោរពគ្នាទៅវិញទៅមករវាងភាគីអ៊ីរ៉ង់និងរុស្ស៊ី។
យ៉ាងណាក៏ដោយចុះ ការដកទ័ពចេញភ្លាមៗនេះមិនមែនជារឿងសាមញ្ញឡើយ។ វាបញ្ជាក់ថា រុស្ស៊ី និងអ៊ីរ៉ង់អាចមានបញ្ហាអាក់អន់ស្រពន់ចិត្តជាមួយគ្នារឿងប្រើប្រាស់មូលដ្ឋានទ័ពនេះ។ ថ្វីបើអ៊ីរ៉ង់ និងរុស្ស៊ីសុទ្ធតែអះអាងថា វាធ្វើឡើងក្រោមកិច្ចព្រមព្រៀងទ្វេភាគី និងមិនអចិន្ត្រៃយ៍ក៏ដោយ តែពេលមួយសប្តាហ៍វាខ្លីខ្លាំង ហើយគេក៏ឃើញមានប្រតិកម្មពីខាងរដ្ឋាភិបាលអ៊ីរ៉ង់ដែរ។
១.រុស្ស៊ីអួតអាងពេករឿងប្រើប្រាស់មូលដ្ឋានទ័ពអ៊ីរ៉ង់រហូតភ្លេចរក្សាការសម្ងាត់
អ្វីដែលគួរឲ្យកត់សម្គាល់ ប្រព័ន្ធផ្សព្វផ្សាយរុស្ស៊ីបានព្យាយាមគូសបញ្ជាក់ថា រុស្ស៊ីបានក្លាយជាប្រទេសដំបូងហើយដែលអាចមានសិទ្ធិប្រើប្រាស់មូលដ្ឋានទ័ពអ៊ីរ៉ង់ដើម្បីប្រយុទ្ធចាប់តាំងពីសង្គ្រាមលោកលើកទី២មកនោះ។ ហើយរុស្ស៊ីក៏ព្យាយាមបង្ហាញទៅកាន់លោកខាងលិចផងដែរថា រុស្ស៊ីកាន់តែមានឥទ្ធិពលខ្លាំងនៅមជ្ឈិមបូព៌ាហើយនៅពេលនេះ។ ប៉ុន្តែអ៊ីរ៉ង់ទំនងជាមិនសូវពេញចិត្តឡើយ។ ថ្វីបើជាមិត្តជិតស្និទ្ធក៏ដោយ អ៊ីរ៉ង់មិនចង់ឲ្យរុស្ស៊ីអួតអាង ផ្សព្វផ្សាយពាសវាលពាសកាលពីប្រតិបត្តិការរបស់ខ្លួនខុសរបៀបរបបឡើយ។ បើសិនអាចរក្សាការសម្ងាត់ ឬនៅស្ងៀម វាជាការល្អ។
ទាក់ទិនបញ្ហានេះ រដ្ឋមន្ត្រីការពារជាតិ អ៊ីរ៉ង់ Hossein Dehghan ក៏បាននិយាយផ្លែផ្កាឲ្យរុស្ស៊ីដែលបញ្ចេញព័ត៌មានពាសវាលពាសកាលដោយមិនរក្សាការសម្ងាត់នោះដែរ។ យោងតាមសារព័ត៌មាន The New York Times ប្រមុខការពារជាតិរូបនេះហៅសកម្មភាពរបស់ក្រុងម៉ូស្គូដែលមិនរក្សាការសម្ងាត់ថាជា«ការក្បត់ការទុកចិត្តរវាងភាគីទាំងពីរ» ថែមទៀត។
លោកបានបន្តថា៖«យើងមិនបានផ្តល់មូលដ្ឋានទ័ពឲ្យរុស្ស៊ីឡើយ ហើយពួកគេក៏មិនអាចនៅទីនេះរហូតដែរ។ នេះក៏ដោយសារភាគីគ្មានកិច្ចព្រមព្រៀងជាលាយលក្ខណ៍អក្សរឡើយ។ វាត្រឹមជាការអនុញ្ញាត បណ្តោះអាសន្នប៉ុណ្ណោះ»។
ដោយឡែក ខាងសារព័ត៌មានរុស្ស៊ី RT មិនរៀបរាប់ច្រើនឡើយ ហើយមិនស្រង់សម្តីរដ្ឋមន្ត្រីការពារជាតិអ៊ីរ៉ង់ពាក់ព័ន្ធកិច្ចព្រមព្រៀងនេះដូចសារព័ត៌មាន The New York Times ឡើយ ។ គេគ្រាន់តែបញ្ជាក់ថា កងទ័ពអាកាសរុស្ស៊ីបញ្ចប់ភារកិច្ចរបស់ខ្លួនហើយ ហើយម្យ៉ាងទៀតរុស្ស៊ីក៏អាចនឹងប្រើប្រាស់មូលដ្ឋានទ័ពនៅអ៊ីរ៉ង់នៅខាងមុខទៀតផងដែរ។
អាចថា វារឿងត្រឹមត្រូវដែរ ព្រោះរុស្ស៊ីហាក់បីដូចជាព្យាយាមផ្សព្វផ្សាយបញ្ហានេះខ្លាំងហួសហេតុពេក រហូតភ្លេចគិតថា វាជារឿងរសើបសម្រាប់អ៊ីរ៉ង់ ព្រោះវាជារឿងចម្រូងចម្រាសសម្រាប់សហគមន៍អន្តរជាតិ និងក្នុងស្រុកផងដែរ។ ការអនុញ្ញាតឲ្យបរទេសប្រើប្រាស់ទឹកដីធ្វើសកម្មភាពយោធាជារឿងរសើបនៅអ៊ីរ៉ង់ចាប់តាំងពីប្រទេសនេះផ្តួលរំលំរបបរាជានិយមនិងបង្កើតសាធារណរដ្ឋឥស្លាមឆ្នាំ ១៩៧៩នោះ។ដូចឃើញស្រាប់ សមាជិកសភាអ៊ីរ៉ង់មួយចំនួនអះអាងផងដែរថា កិច្ចព្រមព្រៀងអ៊ីរ៉ង់ជាមួយរុស្ស៊ីពាក់ព័ន្ធការប្រើប្រាស់មូលដ្ឋានទ័ពអ៊ីរ៉ង់ វារំលោភរដ្ឋធម្មនុញ្ញអ៊ីរ៉ង់។
២.អាមេរិកព្រមានបំពាក់អាវុធក្រុមឧទ្ទាម បើរុស្ស៊ីបន្តវាយប្រហារលើក្រុមឧទ្ទាមទៀត
កាលពីសប្តាហ៍មុនរុស្ស៊ីបង្កើនការវាយប្រហារលើទីក្រុង Aleppo និង Idlib (អៃដឺលីប) ដើម្បីកម្ចាត់ក្រុមភេរវជនរដ្ឋឥស្លាម និងក្រុម Jabhat al-Nusra ផង។ហើយក្រសួងការពារជាតិរុស្ស៊ីថា ប្រតិបត្តិការនេះបានសម្លាប់ក្រុមភេរវជនច្រើននាក់ថែមទៀតផង។ ប៉ុន្តែអាមេរិកនៅចោទថារុស្ស៊ីបានឆ្លៀតសំពោងទាំងក្រុមឧទ្ទាមដែលខ្លួនគាំទ្រនៅក្នុងទីក្រុង Aleppo ។
យោងតាមសារព័ត៌មាន CNN រដ្ឋមន្ត្រីការបរទេសលោក ចន ឃែរី បានព្រមានរុស្ស៊ី និងកងទ័ពរដ្ឋាភិបាលលោក បាសា អាល់អាសាដផងដែរ ជុំវិញការបន្តវាយប្រហារលើទីតាំងកងទ័ពឧទ្ទាមស៊ីរី។ ប្រមុខការទូតរូបនេះបានអះអាងថា អាមេរិកអាចនឹងបំពាក់សព្វាវុធដល់ក្រុមប្រដាប់អាវុធទាំងនោះ ដើម្បីតទល់ជាមួយកងទ័ពអាសាដ និងរុស្ស៊ី។
ចំណែកមេទ័ពអាមេរិកថ្មីប្រចាំអ៊ីរ៉ាក់ និងស៊ីរី Stephen Townsend ក៏បានព្រមានរុស្ស៊ីនិងស៊ីរីផងដែរពាក់ព័ន្ធការវាយប្រហារលើក្រុមឧទ្ទាមនេះ។ លោកបារម្ភថា វាអាចនឹងបង្កគ្រោះថ្នាក់ដល់កងកម្លាំងពិសេសអាមេរិកនៅភាគខាងជើងប្រទេសស៊ីរីនោះ។ ហើយលោកបានប្តេជ្ញាថា លោកនឹងការពារកងកម្លាំងពិសេសរបស់អាមេរិក បើសិនទ័ពអាសាដហ៊ានវាយប្រហារតំបន់ខាងលើនោះ៕
© រក្សាសិទ្ធិដោយ thmeythmey.com