អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
រឿងហេតុគួរឲ្យតក់ស្លុតមួយបានកើតឡើងនៅឯទឹកដីជប៉ុន ដោយឪពុកម្នាក់បានចាក់សម្លាប់កូនប្រុសខ្លួនឯង។ សារព័ត៌មានជប៉ុន បានផ្សាយថា បុរសនោះចាក់សម្លាប់កូនប្រុស ដោយសារតែកូនប្រុសខ្លួនមិនបានរៀនសូត្រ សម្រាប់ត្រៀមប្រលងចូលអនុវិទ្យាល័យ។ 
សារព័ត៌មានក្នុងស្រុកជប៉ុន ចុះផ្សាយនៅថ្ងៃទី២៣ ខែសីហា ថា បុរសវ័យ៤៨ឆ្នាំម្នាក់ បានចាក់សម្លាប់កូនប្រុសដែលមានអាយុ១២ឆ្នាំ បន្ទាប់ពីបុរសជាឪពុកនោះ មិនសប្បាយចិត្តនឹងកូនប្រុស ដែលមិនបានរៀនសម្រាប់ត្រៀមប្រលងចូលអនុវិទ្យាល័យឯកជនមួយកន្លែងក្នុងទីក្រុង Nagoya។ សារព័ត៌មាន NHK ផ្សាយថា Kengo Satake សារភាពថា រូបគេបានឈ្លោះជាមួយកូនប្រុស ដ្បិតកូនប្រុស មិនបានរៀនត្រៀមសម្រាប់ប្រលង។
ប៉ូលិសប្រចាំតំបន់ Aichi ក្នុងទីក្រុង Nagoya បានប្រាប់ទីភ្នាក់ងារព័ត៌មាន AFP ថា បន្ទាប់ពីកើតហេតុ កុមារ Ryota ត្រូវបានបញ្ជូនទៅកាន់មន្ទីរពេទ្យកាលពីថ្ងៃទី២១ ខែសីហា ប៉ុន្តែរូបគេបានបាត់បង់ជីវិត ដោយសារខ្សោះឈាម។ អ្នកនាំពាក្យប៉ូលិសម្នាក់ ក៏និយាយដែរថា បុរសជាឪពុកបានចាក់កូនប្រុសរបស់ខ្លួន ត្រង់ដើមទ្រូងដោយប្រើកាំបិត ហើយក៏ត្រូវចាប់ខ្លួន។
បុរស Kengo Satake បានប្រាប់ប៉ូលិសថា រូបគេចាក់កូនប្រុសនឹងកាំបិត គឺជារឿងអចេតនាប៉ុណ្ណោះ។ មួយវិញទៀត សារព័ត៌មាន NHK បានស្រង់សំដីអ្នកដែលស្គាល់គ្រួសារខាងលើ ថា កុមារ Ryota មានបំណងចូលរៀនសាលាឯកជននាំមុខគេនៅតំបន់ Aichi ហើយឪពុករបស់គេ តែងតែបន្ទោសរូបគេលើការសិក្សារហូតមក។ ចំណែកសារព័ត៌មាន Asahi Shimbun ផ្សាយដែរថា ពេលកើតហេតុ ម្ដាយកុមារនេះ ស្ថិតនៅកន្លែងធ្វើការឯណោះ ទើបមិនដឹងថា ប្ដីរបស់ខ្លួន ចាក់សម្លាប់កូនប្រុស។
តាមពិតទៅ ការប្រលងចូលរៀនសាលាល្បីឈ្មោះ គឺជាការប្រជែងដ៏តានតឹងសម្រាប់ពលរដ្ឋជប៉ុន។ ការចូលរៀននៅសាលាល្បីឈ្មោះ ជាកត្តាដ៏សំខាន់ដែលមានឥទ្ធិពលដល់អនាគតរបស់ក្មេងៗជប៉ុន ដែលនេះតម្រូវឲ្យពួកគេត្រូវប្រឹងប្រែងរៀនត្រៀម ដើម្បីប្រលងជាប់សាលាល្អ។ ជាមួយគ្នានោះ ឪពុកម្ដាយភាគច្រើន ក៏បានបង្ខំកូនរបស់ខ្លួន ដែលនោះជាការដាក់សម្ពាធខ្លាំងលើកុមារជប៉ុន៕
Tag:
ជប៉ុន
© រក្សាសិទ្ធិដោយ thmeythmey.com
