អន្តរជាតិ
នយោបាយអន្តរជាតិ
លោក Sarkozy នឹងប្រឡូកចូលប្រជែងតំណែងប្រធានាធិបតីបារាំងជាថ្មី
× អតីតប្រធានាធិបតីបារាំង លោក Nicolas Sarkozy បានបង្ហាញមហិច្ឆតារបស់លោក ក្នុងការត្រលប់ទៅកាន់វិមាន Elysee ដោយបានប្រកាសថា លោកនឹងចូលរួមប្រជែងការបោះឆ្នោតប្រធានាធិបតី ដែលគ្រោងធ្វើនៅឆ្នាំ២០១៧។ លោក Sarkozy នឹងស្វែងរកការតែងតាំងជាបេក្ខជនពីសំណាក់គណបក្សរបស់លោក មុននឹងចាប់ផ្ដើមយុទ្ធនាការស្វែងសំឡេងឆ្នោត។
«ខ្ញុំបានសម្រេចចិត្តធ្វើជាបេក្ខជនសម្រាប់ការបោះឆ្នោតប្រធានាធិបតីឆ្នាំ២០១៧។» នេះជាការប្រកាសរបស់លោក Nicolas Sarkozy អតីតប្រធានាធិបតីបារាំង ដែលកំពុងស្វែងរកកាន់តំណែងខ្ពស់បំផុតនេះជាលើកទីពីរ។ លោក Sarkozy បានសរសេរដូចនេះលើបុព្វកថានៃសៀវភៅថ្មីរបស់លោក ដែលមានចំណងជើងថា Tout pour la France (All for France)។ ជំហានបន្ទាប់នោះ គឺលោកត្រូវការការឯកភាពពីគណបក្សសម្រាប់ក្លាយជាបេក្ខជនមួយរូប។
លោក Sarkozy ដែលបានចាញ់ប្រធានាធិបតីបច្ចុប្បន្នលោក Francois Hollande គឺជាអ្នករិះគន់លោក Hollande យ៉ាងចាស់ដៃ បន្ទាប់ពីការវោលចូលឆាកនយោបាយវិញក្នុងឆ្នាំ២០១៤។ បុរសវ័យ៦១ឆ្នាំរូប បានវាយប្រហារខ្លាំងលើការដឹកនាំរបស់លោក Hollande ជាពិសេសលើបញ្ហាសន្តិសុខ ខណៈដែលបារាំងរងការវាយប្រហារភេរវកម្មយ៉ាងញឹកញាប់។ លោកទទូចឲ្យមានការពង្រឹងបញ្ហាអន្តោប្រវេសន៍ រឹតបន្តឹងការបោសសម្អាតជនសង្ស័យរដ្ឋឥស្លាម ក៏ដូចជាបញ្ឈប់ការធ្លាក់ចុះនៃអត្តសញ្ញាណបារាំងដែរ។
ទីប្រឹក្សារបស់លោក Sarkozy បានប្រាប់ទីភ្នាក់ងារព័ត៌មាន AFP ថា លោក Sarkozy លាលែងតំណែងជាប្រធានបក្សសាធារណរដ្ឋ នៅថ្ងៃទី២២ ខែសីហាដើម្បីផ្ដោតលើយុទ្ធនាការបោះឆ្នោត។ ចំណែកលោក Sarkozy ផ្ទាល់ក៏បានសរសេរលើបណ្ដាញសង្គម Twitter ថា សៀវភៅដែលនឹងចេញផ្សាយពេលខាងមុខ គឺជាចំណុចចាប់ផ្ដើមហើយ។ លោកបន្តថា ប្រាំឆ្នាំបន្ទាប់ នឹងពោរពេញទៅដោយគ្រោះថ្នាក់ ប៉ុន្តែក្ដីសង្ឃឹមក៏មានដែរ។
ក្នុងដំណើឆ្ពោះទៅកាន់ការបោះឆ្នោតឆ្នាំ២០១៧ លោក Sarkozy ត្រូវប្រជែងនឹងបេក្ខជនផ្ទៃក្នុងបក្សជាមុនសិន ដោយលោកត្រូវប្រជែងជាមួយនឹងអតីតនាយករដ្ឋមន្ត្រី លោក Alain Juppe ដែលត្រូវគេមើលឃើញថា ជាមនុស្សនិយមកណ្ដាល ស្របពេលលោក Sarkozy ជាអ្នកអភិរក្សនិយម។ ប៉ុន្តែប្រជាប្រិយភាពរបស់លោក Sarkozy ហាក់កើនឡើងមួយកម្រិត ដោយសារតែគោលនយោបាយប្រឆាំងនឹងចលនាឥស្លាមជ្រុលនិយម និងអន្តោប្រវេសន៍។
ប្រសិនបើលោក Sarkozy ទទួលជោគជ័យក្នុងបក្ស លោកទំនងជាត្រូវប្រជែងជាលើកទីពីរ ទល់នឹងលោក Hollande ដ្បិតលោក Hollande ក៏បានបង្ហាញបំណងប្រជែងកៅអីប្រធានាធិបតីបារាំងសម្រាប់អាណត្តិទីពីរដែរ។ ក្រៅពីលោក Hollande លោក Sarkozy ក៏ត្រូវប្រជែងជាមួយបេក្ខជនស្ដាំនិយមលោកស្រី Marine Le Pen ដែលត្រូវកត់សម្គាល់ថា ជាបេក្ខជនមានសក្ដានុពលម្នាក់ដែរនោះ៕
Tag:
បារាំង
Nicolas Sarkozy
© រក្សាសិទ្ធិដោយ thmeythmey.com