អន្តរជាតិ
ឡាវ ដាក់ក្តីសង្ឃឹមខ្ពស់លើគម្រោងផ្លូវរថភ្លើងជាមួយនឹងចិន
× រដ្ឋាភិបាលក្រុងវៀងចន្ទន៍ បង្ហាញក្តីរំពឹងខ្ពស់ និងវិជ្ជមានចំពោះគម្រោងផ្លូវរថភ្លើងឡាវ-ចិន ថា នឹងផ្តល់អត្ថប្រយោជន៍ជាច្រើនសម្រាប់ឡាវ ដើម្បីពង្រឹងហេដ្ឋារចនាសម្ព័ន្ធសេដ្ឋកិច្ចឲ្យរឹងមាំ, សមិទ្ធផលនៃកិច្ចសហប្រតិបត្តិការនិងយុទ្ធសាស្ត្រតភ្ជាប់, ការបង្កើនវិនិយោគបរទេស និងកាត់បន្ថយតម្លៃនៃការផលិតផងដែរ។
យោងតាមរបាយការណ៍របស់ក្រសួងសាធារណការ និងដឹកជញ្ជូនឡាវ ដែលបានចុះផ្សាយដោយភ្នាក់ងារព័ត៌មានរដ្ឋឡាវ KPL នៅថ្ងៃទី២៤ ខែសីហា គម្រោងផ្លូវរថភ្លើងឡាវ-ចិន នឹងជួយឡាវធានាឲ្យមានហេដ្ឋារចនាសម្ព័ន្ធសេដ្ឋកិច្ចរឹងមាំ ដែលអាចជំរុញឲ្យឡាវ សម្រេចដល់គោលដៅនៃការប្រែក្លាយពី«ប្រទេសដែលគ្មានសមុទ្រមួយសោះទៅជាប្រទេសដែលមានការតភ្ជាប់»។ ហើយគម្រោងនោះ ក៏នឹងជួយក្នុងការសម្រេចយុទ្ធសាស្ត្រនៃការតភ្ជាប់ និងប្រតិបត្តិការខាងក្រៅ ជាមួយនឹងបណ្តាប្រទេសអាស៊ាន និងចិនរបស់ឡាវផងដែរ។
របាយការណ៍ដដែលនោះ ក៏បានបន្ថែមដែរថា គម្រោងរថភ្លើង នឹងក្លាយជាឧបករណ៍ដ៏សំខាន់សម្រាប់ការទាក់ទាញវិនិយោគបរទេស ដែលជាលទ្ធផល គម្រោងនោះ ក៏ជំរុញឲ្យមានការកើនឡើងនៃផលទុន បច្ចេកវិទ្យាទំនើប និងធនធានមនុស្សនៅក្នុងប្រទេសផងដែរ។ លើសពីនេះទៅទៀត គម្រោងរថភ្លើងរយៈចម្ងាយនោះ ក៏នឹងជួយលើកកម្ពស់កិច្ចសហប្រតិបត្តិការពាណិជ្ជកម្ម ទេសចរណ៍ និងបង្កើនការងារកាន់តែច្រើនទៀតផង។
សូមជម្រាបផងដែរថា គម្រោងផ្លូវរថភ្លើងឡាវ-ចិនរយៈពេលប្រាំឆ្នាំ បានចាប់ផ្តើមដំណើរការសាងសង់តាំងពីចុងឆ្នាំ២០១៥មកម្ល៉េះ។ គម្រោងផ្លូវរថភ្លើងនេះ មានចម្ងាយសរុប ៤២៧.២គីឡីម៉ែត ដែលជាការតភ្ជាប់ពីព្រំដែនឡាវ-ចិនរហូតដល់រដ្ឋធានីវៀងចន្ទន៍នៃប្រទេសឡាវ៕
© រក្សាសិទ្ធិដោយ thmeythmey.com