អនុប្រធានាធិបតីអាមេរិក Joe Biden បានបញ្ជាក់ប្រាប់មេដឹកនាំអឺរ៉ុបជាពិសេសបណ្តារដ្ឋនៅតំបន់បាល់ទិកកុំឲ្យភ័យបារម្ភចំពោះការលើកឡើងរបស់បេក្ខជនប្រធានាធិបតីអាមេរិក ដូណាល់ ត្រាំ។ លោកបានពន្យល់ថា រាល់ការលើកឡើងរបស់លោកដូណាល់ ត្រាំ កន្លងមករួមមានទាំងគំរាមទាញអាមេរិកចេញពីណាតូ និងឈប់ការពារអឺរ៉ុបនោះមកពីលោកមិនយល់ពីគោលការណ៍បក្សសម្ព័ន្ធយោធាណាតូ ជាពិសេស«មាត្រា៥» នៃសន្ធិសញ្ញាអាត្លង់ទិកខាងជើង។ លោកបានសង្កត់ធ្ងន់ជាថ្មីថាទោះក្នុងកាលៈទេសៈណាក៏ដោយ ប្រព័ន្ធបក្សពីរ នឹងមិនអនុញ្ញាតឲ្យមានការសម្រេចតាមចិត្តឡើយ ហើយអាមេរិកនៅតែផ្តល់ការគោរពចំពោះបក្សសម្ព័ន្ធយោធាណាតូ ជាពិសេសមាត្រា ៥ ។
យុទ្ធនាការឃោសនាបោះឆ្នោតនៅសហរដ្ឋអាមេរិករយៈពេលកន្លងមកនេះបានក្លាយជាក្តីបារម្ភសម្រាប់មេដឹកនាំអឺរ៉ុបមួយចំនួន ជាពិសេសបណ្តាប្រទេសនៅតំបន់បាល់ទិកដែលជាអតីតរដ្ឋសហភាពសូវៀតនោះ។ នេះក៏ដោយសារ បេក្ខជនប្រធានាធិបតីបក្សសាធាណរដ្ឋលោក ដូណាល់ ត្រាំ អះអាងម្តងជាពីរដឹងថា នៅពេលលោកជាប់ឆ្នោត លោកអាចនឹងទាញសហរដ្ឋអាមេរិកចេញពីណាតូ ឬអាចបោះបង់អឺរ៉ុបខាងកើតឲ្យរុស្ស៊ីផងដែរ។
អ្នកនយោបាយម្នាក់នេះចំណាយពេលយ៉ាងច្រើនរិះគន់បក្សសម្ព័ន្ធយោធាណាតូ និងសមាជិកឯទៀត ដោយលើកហេតុផលថា ណាតូចាស់គំរឹល មិនអាចដោះស្រាយបញ្ហាភេរវកម្មបាន ហើយសមាជិកជាច្រើនដែលពឹងពាក់លើការការពាររបស់អាមេរិកស្ទើរទាំងស្រុងស្ទើមិនចំណាយលុយដូច«ធ្វើនំអត់ម្សៅ»។ សេដ្ឋី ដូណាល់ ត្រាំ យល់ថា អាមេរិកត្រូវខាតបង់ច្រើន ដោយត្រូវចំណាយលុយខ្លួនឯងទៅការពារគេ។ ដូច្នេះ បើលោកជាបឆ្នោតប្រទេសទាំងនោះ ក៏ចាំបាច់ត្រូវបង់លុយថ្លៃការពារបន្ថែមតាមការកំណត់ដូចគ្នាដែរ។
ទុករឿងចាស់មួយឡែកចុះ។ ថ្វីបើលោក ដូណាល់ ត្រាំ ធ្វើឲ្យអឺរ៉ុបភ័យព្រួយដេកមិនលក់បក់មិនល្ហើយក៏ដោយចុះ រដ្ឋបាលលោក បារ៉ាក់ អូបាម៉ា តែងតែប្រឹងនិយាយលួងលោមឲ្យបណ្តាមេដឹកនាំប្រទេសអឺរ៉ុបជាពិសេសសមាជិកណាតូឲ្យឈប់ភ័យខ្លាច។ អាមេរិកមិនទៅណាឡើយ ហើយអាមេរិកក៏មិនបោះបង់អឺរ៉ុប និងណាតូដែរ។
ដូចឃើញស្រាប់ហើយ វត្តមានអនុប្រធានាធិបតីអាមេរិកលោក Joe Biden នៅអឺរ៉ុបដោយលោកបានជួបជជែកជាមួយបណ្តាមេដឹកនាំសមាជិកណាតូ ហើយពន្យល់ពួកគេពីបញ្ហានយោបាយអាមេរិកក្នុងពេលបោះឆ្នោតបច្ចុប្បន្នជាពិសេសពាក់ព័ន្ធសម្តីរបស់លោក ដូណាល់ ត្រាំ។
ដូណាល់ត្រាំ មិនយល់ពីមាត្រា ៥ នៃសន្ធិសញ្ញាអាត្លង់ទិកខាងជើង
ក្នុងពេលថ្លែងសុន្ទរកថានៅថ្ងៃអង្គារទី ២៣ សីហា នៅទីក្រុងរីកាប្រទេសឡេតូនី ដោយឈរនៅជាមួយប្រធានាធិបតី ឡេតូនី, អេស្តូនី និង លីទុយអានី លោក Joe Biden បានរិះគន់លោក ដូណាល់ ត្រាំចាស់ដៃ ដោយលោកអះអាងថា សេដ្ឋីអចលនទ្រព្យនេះមិនយល់ពីតម្លៃណាតូ និងមាត្រា ៥នៃសន្ធិសញ្ញាអាត្លង់ទិកខាងជើងឡើយ។ មូលហេតុនេះហើយទើបបានជា លោកនិយាយផ្តេសផ្តាស មិនដឹងមុខក្រោយ ហើយធ្វើឲ្យគ្រប់គ្នាភ័យបារម្ភបែបនេះ។ តែលោកប្រាប់មេដឹកនាំអឺរ៉ុបកុំបារម្ភព្រោះ ទោះបីដូណាល់ ត្រាំក្លាយជាប្រធានាធិបតីក៏ដោយ ប្រព័ន្ធបក្សពីរមិនអនុញ្ញាតឲ្យប្រធានាធិបតីធ្វើអ្វីតាមចិត្តឡើយ។ អាមេរិកនៅតែរក្សាការប្តេជ្ញាចិត្តក្នុងការរួមរស់ជាមួយណាតូនិងការពារសមាជិកឯទៀតទៅពេលអនាគតខាងមុខ។
យោងតាមសារព័ត៌មាន Politico អនុប្រធានាធិបតីអាមេរិករូបនេះបានលើកឡើងថា៖« ខ្ញុំមិនគិតថា លោក ដូណាល់ ត្រាំ យល់ថា មាត្រា៥នៃសន្ធិសញ្ញាអាត្លង់ទិកខាងជើងវាយ៉ាងម៉េចឡើយ។ ហើយការបន្តទំនាក់ទំនងនិងកិច្ចព្រមព្រៀងរវាងបក្សទាំងពីរនៅអាមេរិក នឹងរក្សាបាននូវការប្តេជ្ញាចិត្តក្នុងការគាំទ្របក្សសម្ព័ន្ធយោធាណាតូ»។
តាមពិតទៅមាត្រា ៥ ជាបទបញ្ញត្តិដែលសំខាន់ជាងគេមួយក្នុងសន្ធិសញ្ញាអាត្លង់ទិកខាងលើជើង។ មាត្រានេះចែងថា «កាលណាមានប្រទេសណាមួយជាសមាជិកណាតូរងការវាយប្រហារពីសត្រូវ សមាជិកទាំងអស់ពោលគឺទាំង ២៨ នាពេលបច្ចុប្បន្ននឹងព្រួតគ្នាការពារសមាជិកដែលរងការវាយប្រហារ។ ប៉ុន្តសម្រាប់លោក ដូណាល់ ត្រាំ មាត្រានេះមិនសំខាន់ឡើយ។ តែអ្វីដែលសំខាន់នោះណាតូ ហួសសម័យក្នុងការប្រើប្រាស់ដើម្បីប្រឆាំងភេរវកម្ម ហើយគ្មានការការពារសមាជិកឡើយ បើពួកគេមិនបំពេញកាតព្វកិច្ចបង់វិភាគទានគ្រប់គ្រាន់តាមកំណត់។ តាមការកំណត់សមាជិកនីមួយៗត្រូវបង់លុយប្រហែល២ភាគរយនៃផលិតផលក្នុងស្រុកសរុបឲ្យបក្សសម្ព័ន្ធយោធាណាតូ ប៉ុន្តែសមាជិកភាគតិចបំផុតដែលបំពេញតាមការកំណត់នេះ។ដូច្នេះហើយវាជាបន្ទុកធំបំផុតមួយសម្រាប់សហរដ្ឋអាមេរិកត្រូវទូលរែក ដ្បិតថាអាមេរិកត្រូវការពារប្រទេសជាសម្ព័ន្ធមិត្តច្រើនទូទាំងពិភពលោកទាំងមូល។
យ៉ាងណាកដ៏ដោយចុះ សម្តីរបស់អ្នកនយោបាយក្នុងពេលបោះឆ្នោតវាអាចខុសឆ្ងាយ ពីអ្វីដែលពួកគេនឹងត្រូវធ្វើនៅពេលដែលខ្លួនកាន់កាប់តំណែងនោះព្រោះវាជាវោហាស័ព្ទនយោបាយដើម្បីទាក់ទាញអ្នកគាំទ្រប៉ុណ្ណោះ។ ដូច្នេះ អ្វីដែល ដូណាល់ ត្រាំ ក៏ដូចជា ហ៊ីឡារី គ្លីនតុន លើកឡើងក្នុងការឃោសនា សុទ្ធតែនឹងអាចប្រែប្រួលក្នុងពេលដែលពួកគេចូលបំពេញការងារមែនទែន។