ជាតិ
នយោបាយជាតិ
សម្ដេច ហេង សំរិន ប្រាប់សម្ដេច ស ខេង ឲ្យបង្ហាញបញ្ជីរាយឈ្មោះជនបរទេសស្របច្បាប់នៅកម្ពុជា
× ប្រធានរដ្ឋសភាសម្ដេច ហេង សំរិន បានចំណារលើលិខិតតំណាងរាស្ត្រគណបក្សសង្គ្រោះជាតិ បញ្ជូនទៅរដ្ឋមន្ត្រីក្រសួងមហាផ្ទៃ សម្ដេច ស ខេង ដើម្បីស្នើសុំបញ្ជីរាយឈ្មោះជនបរទេសទាំងអស់ ដែលបានទទួលសញ្ជាតិខ្មែរស្របច្បាប់ ដោយមានព្រះរាជក្រឹត្យបញ្ជាក់ត្រឹមត្រូវ។
ក្នុងលិខិតរបស់តំណាងរាស្ត្រគណបក្សសង្គ្រោះជាតិដែលបានបញ្ជូនទៅក្រសួងមហាផ្ទៃ តាមរយៈសម្ដេច ហេង សំរិន នៅថ្ងៃទី២៤ សីហានេះបានបញ្ជាក់ដូច្នេះថា៖« ដើម្បីកុំឲ្យមានការសង្ស័យខុស ពីចំនួនជនអន្តោប្រវេសន៍ខុសច្បាប់ ដែលទទួលបានអត្តសញ្ញាណបណ្ណសញ្ជាតិខ្មែរ តាមរយៈអំពើពុករលួយ ឬ ការធ្វេសប្រហែសរបស់ក្រសួងមហាផ្ទៃនោះ យើងខ្ញុំស្នើសុំ សម្ដេចក្រឡាហោម មេត្តាផ្ញើនូវបញ្ជីជនបរទេស ដែលទទួលបានសញ្ជាតិខ្មែរត្រឹមត្រូវតាមផ្លូវច្បាប់ ដោយមានព្រះរាជក្រឹត្យបញ្ជាក់ ឲ្យបានឆាប់តាមដែលអាចធ្វើទៅបាន»។
ក្រៅពីគម្រោងនៃការសុំអន្តរាគមន៍ពីក្រសួងមហាផ្ទៃ គណបក្សសង្គ្រោះជាតិ ក៏នឹងស្នើទៅក្រសួងយុត្តិធម៌ផងដែរ ដើម្បីសុំឲ្យផ្តល់បញ្ជីឈ្មោះជនបរទេសខុសច្បាប់ ដែលទទួលបានអត្តសញ្ជាតិខ្មែរ តាមរយៈសញ្ជាតូបនីយកម្ម ដោយមិនត្រឹមត្រូវទៅតាមច្បាប់។ លើសពីនេះគណបក្សសង្គ្រោះជាតិ នឹងឲ្យមេធាវី ប្តឹងទៅគណៈកម្មាធិការជាតិរៀបចំការបោះឆ្នោត (គជប) និងតុលាការ ចំពោះជនបរទេសទាំងឡាយណា ដែលប្រើប្រាស់អត្តសញ្ញាណបណ្ណសញ្ជាតិខ្មែរ ដោយខុសច្បាប់ ហើយយកទៅចុះឈ្មោះបោះឆ្នោត។ នេះបើតាមសេចក្ដីប្រកាសព័ត៌មានរបស់គណបក្សសង្គ្រោះជាតិ កាលពីថ្ងៃទី១៩ សីហា។
គណបក្សសង្គ្រោះជាតិ នឹងរៀបចំភ្នាក់ងារសង្កេតការណ៍តាមការិយាល័យចុះឈ្មោះបោះឆ្នោត ដើម្បីឃ្លាំមើលដំណើរចុះឈ្មោះបោះឆ្នោត ព្រមទាំងប្តឹងជំទាស់និងប្តឹងតវ៉ា នូវភាពមិនប្រក្រតីទាំងឡាយ ដែលកើតឡើង ដោយបក្សប្រឆាំង ចាត់ទុកថា វិធានការទាំងនេះ នឹងអាចជំរុញ ឲ្យដំណើរការចុះឈ្មោះបោះឆ្នោត និងការបោះឆ្នោតនាពេលខាងមុខ ប្រព្រឹត្តទៅដោយរលូន៕
© រក្សាសិទ្ធិដោយ thmeythmey.com