ពីនេះ ពីនោះ
កូនខ្មែរ តាមទីក្រុងមួយចំនួនមិនស្គាល់ពាក្យថា«កញ្ជើ និង កន្តាំង» ឡើយ
× ពាក្យពេចន៍មួយចំនួន របស់ចាស់បុរាណខ្មែរ និងពាក្យពេចន៍របស់ប្រជាពលរដ្ឋខ្មែរបច្ចុប្បន្ន ដែលរស់នៅតាមនិគម ជនបទ គឺមិនត្រូវបានគេស្គាល់ ជាទូទៅឡើយ។ ដោយឡែក ពាក្យថា«កញ្ជើ និង កន្តាំង»នេះ ប្រហែលជាមានកូនខ្មែរមិនច្រើនទេ ដែលស្គាល់ពាក្យនេះ ហើយដឹងពីអត្ថន័យ និងការប្រើប្រាស់។
សទ្ទានុក្រមវប្បធម៌ និងវិចិត្រសិល្បៈ ដែលបានអនុម័តដោយក្រុមប្រឹក្សាជាតិភាសាខ្មែរ បានពន្យល់ និងឲ្យន័យរបស់ពាក្យទាំងនេះថា៖
ពាក្យ«កញ្ជើ» គឺជាខ្នាតរង្វាល់ខ្មែរពីបុរាណ សម្រាប់វាលគ្រាប់ធញ្ញជាតិ វត្ថុល្អិតៗ ជាដើម ដែលត្បាញដោយបន្ទះឫស្សី ខាងលើមានរាងមូល ហៅថាមាត់ក្ដាប់នឹងបន្ទោះផ្ដៅ, ខាងក្រោមរាប ហៅថា បាត។ ឧទាហរណ៍ អង្ករមួយកញ្ជើ។
ពាក្យ«កន្តាំង» គឺជាខ្នាតរង្វាល់ខ្មែរពីបុរាណ (មានរាងដូចល្អី) សម្រាប់វាលគ្រាប់ធញ្ញជាតិ មានស្រូវ អង្ករ ជាដើម, ជារង្វាល់អនុភាគ ដែលមានចំណុះពីរភាគឬបីភាគ ឬក៏បួនភាគនៃតៅ។ អ្នកខ្លះហៅថា ខ្ញឹង។ ឧទាហរណ៍ ស្រូវបីកន្តាំង៕
ដកស្រង់ពី៖ សទ្ទានុក្រមវប្បធម៌ និងវិចិត្រសិល្បៈ, ក្រុមប្រឹក្សាជាតិភាសាខ្មែរ,២០១៥
© រក្សាសិទ្ធិដោយ thmeythmey.com