ពីនេះ ពីនោះ
× ភ្ជុំនៅភូមិខ្ញុំ
កំណាព្យបទ បថ្យាវដ្ត
ក្រឹមក្រាញ់លេងខ្លួនក្អាត់ពួនគុម្ពស្រូវ
ទឹកជន់លិចផ្លូវក្លិនស្រូវប្រហើរ
ពូចងសន្ទូចហួចច្រៀងបណ្តើរ
ព្រោះឃើញមីងដើរដៃយូរស្រាក់បាយ។
កុកគ្រោងកុកក្រកហក់ហើរសប្បាយ
ចង្វាខ្វល់ខ្វាយកំពឹសខ្វែងខ្វាត់
ឆ្លូញឆ្លាតហៅឆ្លាំងតាំងលាក់ខ្លួនបាត់
ក្រែងកុកចែងចាត់ចាប់ជាចំណី។
ឯនាយដងអូរពូបបក់ត្រី
ក្មេងជិះក្របីហាក់មិនខ្វាយខ្វល់
អ៊ុំជិះរទេះដឹកស្រូវតាមថ្នល់
រសៀលមកដល់អ្នកភូមិទៅវត្ត។
ម៉ោង៤ទាបភ្លឺឮសូរតែមាត់
មិនភ្លេចភ្លាំងភ្លាត់ទៅបោះបាយបិណ្ឌ
យាយតាពុកម៉ែខ្លះនៅថែក្បិន
មិនឲ្យហោចហិនបាត់ទំនៀមខ្មែរ។
ក្មេងៗក្នុងភូមិក៏រួមចូលថែ
ទាន់សម័យតែមិនចោលបុរាណ
ភ្ជុំបិណ្ឌអ្នកភូមិរួមជុំសុខសាន្ត
រឿងភូមិខ្ញុំបានបញ្ចប់ត្រឹមហ្នឹង៕
និពន្ធដោយ ប៉ាកកា ខ្មៅ!
© រក្សាសិទ្ធិដោយ thmeythmey.com