អន្តរជាតិ
រុស្ស៊ី៖ ភាពក្រអឺតក្រទមលោកខាងលិច បង្កការបង្ហូរឈាមគ្នានៅមជ្ឈិមបូព៌ា និងអាហ្វ្រិកខាងជើង រដ្ឋមន្ត្រីការបរទេសរុស្ស៊ី Sergei Lavrov ថ្លែងនាមហាសន្និបាតអង្គការសហប្រជាជាតិលើកទី៧១។រូបភាព៖ UN News Center
× រដ្ឋមន្ត្រីការបរទេសរុស្ស៊ីលោក Sergei Lavrov បានថ្លែងរិះគន់លោកខាងលិចនៅក្នុងកិច្ចប្រជុំពេញអង្គនៃមហាសន្និបាតអង្គការសហប្រជាជាតិ (UNGA) ដោយលោកអះអាងថា សកម្មភាពឯកតោភាគីនិងក្រអឺតក្រទមរបស់លោកខាងលិចបង្កឲ្យមានការបង្ហូរឈាមគ្នាឥតឈប់នៅមជ្ឈិមបូព៌ានិងអាហ្វ្រិកខាងជើង។ លោកក៏យកវេទិកានេះស្នើឲ្យសមាជិកអង្គការសហប្រជាជាតិគាំទ្រគំនិតផ្តួចផ្តើមរបស់រុស្ស៊ីក្នុងការប្រឆាំងភេរវកម្មផងដែរ។
ថ្លែងទៅកាន់មហាសន្និបាតអង្គការសហប្រជាជាតិនាថ្ងៃសុក្រទី ២៣ កញ្ញា រដ្ឋមន្ត្រីការបរទេសរុស្ស៊ីលោក Sergei Lavrov បានអះអាងថា សកម្មភាពឯកតោភាគីនិងភាពក្រអឺតក្រទោមរបស់លោកខាងលិចមួយចំនួនបានធ្វើឲ្យមានបញ្ហាប្រឈមច្រើនលើពិភពលោក។ លោក Lavrov ក៏បានអំពាវនាវឲបណ្តប្រទេសសមាជិកអង្គការសហប្រជាជាតិទាំងអស់គាំទ្រនិងចូលរួមជាមួយរុស្ស៊ីដើម្បីប្រឆាំងភេរវកម្មអន្តរជាតិថែមទៀតផង។
លោក Lavrov ថ្លែងថា៖« តាំងខ្លួនជាអ្នកប្រៀនប្រដៅ, តាំងខ្លួនខ្ពង់ខ្ពស់ជាងគេ, ធ្វើអ្វីផ្តាច់មុខម្នាក់ឯង និងគិតតែប្រយោជន៍ខ្លួនឯង ជាអ្វីដែលចាក់រឹសក្នុងផ្នត់គំនិតបណ្តាអភិជននយោបាយនៃប្រទេសលោកខាងលិច។ ហើយវាបានក្លាយជាឧសគ្គនិងគ្រោះថ្នាក់សម្រាប់ការបង្កើតសហប្រតិបត្តិការដែលមានសមភាព និងយុត្តធម៌លើឆាកអន្តរជាតិ»។
ប្រមុខការពារជាតិរូបនេះបានលើកយកជម្លោះបង្ហូរឈាមគ្នាមិនឈប់ឈរនៅមជ្ឈិមបូព៌ា និងនៅអាហ្វ្រិកខាងជើងតែម្តង ដើម្បីធ្វើជាឧទហរណ៍បញ្ជាក់ថាការតាំងខ្លួនខ្ពង់ខ្ពស់ និងភាពក្រអឺតក្រទោមរបស់លោកខាងលិចធ្វើឲ្យពិភពលោកធ្លាក់ជ្រៅក្នុងបញ្ហាសន្តិសុខនិងអស្ថិរភាព។
លោកពន្យល់បន្តថា៖« លទ្ធផលនៃឥរិយាបថច្រឡោមខាងរបស់លោកខាងលិចបានជំរុញឲ្យមានការបង្កើតដំណោះស្រាយដ៏គ្រោះថ្នាក់បំផុតសម្រាប់ជម្លោះដ៏ស្មុគស្មាញរបស់ពិភលោកបច្ចុប្បន្ន។ ហើយយើងអាចឃើញស្រាប់ហើយមានជម្លោះបង្ហូរឈាមគ្នាមិនចេះចប់នៅមជ្ឈិមបូព៌ានិងអាហ្វ្រិកខាងជើង។ លទ្ធផលចុងក្រោយស្ថិរភាពពិភពលោកត្រូវបានបំផ្លាញខ្ទេចគ្មានសល់»។
ក្រៅពីនេះ រដ្ឋមន្ត្រីការបរទេសរុស្ស៊ីខាងលើបានឆ្លៀតលើកយកពីបញ្ហាជម្លោះស៊ីរីមកជជែក ហើយលោកក៏អះអាងផងដែរថា រុស្ស៊ីបានរួមចំណែកយ៉ាងធំធេងក្នុងការសង្គ្រោះស៊ីរីឲ្យផុតពីជ្រោះមរណៈនិងក្លាយជាសំបុករបស់ក្រុមភេរវជន ក្រោយរដ្ឋាភិបាលស៊ីរីស្នើសុំជំនួយ។ កុំតែបានរុស្ស៊ីជួយជ្រោមជ្រែង ស៊ីរីអាចក្លាយជាជម្រករបស់ក្រុមភេរវជន ហើយក្រៅពីជំនួយយោធា រុស្ស៊ីបានរួមចំណែកក្នុងការផ្តួចផ្តើមបង្កើតក្រុមអន្តរជាតិគាំទ្រស៊ីរី ដែលមានទំនួលខុសត្រូវស្វែងរកដំណោះស្រាយដើម្បីបញ្ចប់សង្គ្រាមអូសបន្លាយអស់ពេល៥ឆ្នាំមកហើយនោះ។
ហើយលោកក៏បានសង្កត់ធ្ងន់ផងដែរថា សកម្មភាពឯកតោភាគីរបស់លោកខាងលិចដែលជួយជ្រោមជ្រោមក្រុមឧទ្ទាមដើម្បីផ្តួលរំលំរបបដឹកនាំក្រុងដាម៉ាសនោះជាគ្រោះមហន្តរាយសម្រាប់ប្រទេសស៊ីរី។
ចំណែកពាក់ព័ន្ធបញ្ហាជម្លោះអ៊ុយក្រែន មន្ត្រីជាន់ខ្ពស់រូបនេះបានអះអាងថា អ៊ុយក្រែនក៏ក្លាយជាជនរងគ្រោះដោយសារលោកខាងលិចដែរ។ លោក Lavrov ពន្យល់ថា អ្វីដែលអ៊ុយក្រែនជួបប្រទះបច្ចុប្បន្នជាលទ្ធផលនៃការធ្វើរដ្ឋប្រហាររដ្ឋធម្មនុញ្ញនិងទម្លាក់មេដឹកនាំស្របច្បាប់របស់ខ្លួន។ ហើយម្យ៉ាងរបបដឹកនាំថ្មីដែលមានលោកខាងលិចជាបង្អែកនោះក៏មិនព្រមព្រៀងអនុវត្តកិច្ចព្រមព្រៀងសន្តិភាពក្រុង Minsk ដែលសម្រេចបានកាលពីខែកុម្ភៈឆ្នាំ ២០១៥ ដើម្បីបញ្ចប់វិបត្តិដែរ។ ទាំងនេះសុទ្ធតែជាបញ្ហា ហើយវិបត្តិនេះប្រហែលជាគោលដៅដែលលោកខាងលិចចង់បានដូចគ្នា៕
© រក្សាសិទ្ធិដោយ thmeythmey.com