ជាតិ
នយោបាយជាតិ
សភា កំពុងបើកកិច្ចប្រជុំសភាតំបន់អាស៊ី APA ខណៈCNRP មិនចូលរួម
×
ភ្នំពេញ៖ នៅព្រឹកថ្ងៃទី២៦ កញ្ញានេះ អនុប្រធានសភាលោក ងួន ញិល កំពុងបើកកិច្ចប្រជុំសភាតំបន់អាស៊ី APA ដោយមានប្រតិភូមកពីបណ្ដាប្រទេសចំនួន២១ចូលរួម ដើម្បីប្រជុំគណៈម្មាធិការអចិន្ត្រៃយ៍ស្តីពីបទប្បញ្ញត្តិហិរញ្ញវត្ថុ និងការគ្រប់គ្រងបុគ្គលិក និងកិច្ចប្រជុំក្រុមប្រឹក្សាប្រតិបត្តិលើកទី១ នៅសណ្ឋាគារសូហ្វីតែលភ្នំពេញភូគៀតត្រា។ កិច្ចប្រជុំរយៈពេលពីរថ្ងៃនេះ សភាតំបន់អាស៊ីនឹងជជែកគ្នាលើបញ្ហាមួយចំនួនដូចជាកិច្ចការនយោបាយ សេដ្ឋកិច្ច សង្គមកិច្ច និងវប្បធម៌ជាដើម។
ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាននៃរដ្ឋសភាលោក ឈាង វុន បានបញ្ជាក់ថា កិច្ចប្រជុំពេលនេះ ជាការប្រមូលផ្តុំទស្សនៈយោបល់របស់តំណាងរាស្ត្រ នៅក្នុងតំបន់អាស៊ី ដើម្បីធ្វើការផ្លាស់ប្តូរ និងបង្កើនកិច្ចសហប្រតិបត្តិការគ្នា ក្នុងការដោះស្រាយបញ្ហារួមនៅតំបន់អាស៊ី។ «យើងដឹងហើយតំបន់អាស៊ី នៅមានប្រជាពលរដ្ឋជួបការលំបាកនិងក្រីក្រជាច្រើន ដូច្នេះការជួបជុំរបស់យើងនៅពេលនេះនឹងចូលរួមចំណែក ដល់រដ្ឋាភិបាល ជាសមាជិកសភាតំបន់អាស៊ីទាំងអស់ ក្នុងការបង្កើនការដោះស្រាយបញ្ហាដល់ពលរដ្ឋបន្តទៀត» ។ នេះជាការបញ្ជាក់របស់លោក ឈាង វុន ។
ទាក់ទិននឹងកិច្ចប្រជុំតំបន់អាស៊ីនេះដែរ គេសង្កេតឃើញថា មិនមានវត្តមានសមាជិកសភាពីខាងគណបក្សសង្គ្រោះជាតិចូលរួមឡើយ។ សារព័ត៌មានថ្មីៗ មិនអាចទាក់ទងសុំការអត្ថាធិប្បាយពីលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ និងជាសមាជិកក្រុមប្រឹក្សាប្រតិបត្តិសភា ដែលត្រូវចូលរួមកិច្ចប្រជុំនេះ បាននៅឡើយទេ។
សូមជម្រាបថា សភាតំបន់អាស៊ី (APA) ត្រូវបានបង្កើតឡើងនៅឆ្នាំ២០០៦ ដោយប្រែក្លាយពីសមាគមសភាអាស៊ីដើម្បីសន្តិភាព(AAPP) ដែលត្រូវបានបង្កើតនៅឆ្នាំ១៩៩៩។ សភាតំបន់អាស៊ីមានសភាជាសមាជិកចំនួន៤២ប្រទេស ដែលបច្ចុប្បន្ន សម្ដេច ហេង សំរិន ប្រធានរដ្ឋសភាកម្ពុជា ធ្វើជាប្រធាន ចាប់តាំងពីឆ្នាំ២០១៥ ៕
Tag:
សភាតំបន់អាស៊ី
APA
© រក្សាសិទ្ធិដោយ thmeythmey.com