សពលោក Papy ត្រូវបូជាលើមេរុ តាមរបៀបខ្មែរ

ភ្នំពេញ៖ នៅម៉ោង២ រសៀលនេះ សពលោក គ្រីស្យង់ ហ្គោកឺឡាំង ដេប៉ាលីយ៉ែរ (Christian GAUQUELIN des PALLIERES) ហៅ Papy(ប៉ាពី) ត្រូវបានដង្ហែរមកដល់វត្តបញ្ចកែវមុនីឫស្សីសាញ់ ក្នុងសង្កាត់ព្រៃស ខណ្ឌដង្កោ រាជធានីភ្នំពេញ។ នៅទីនោះត្រូវបានគេរៀបចំមេរុ ទុកសម្រាប់បូជាសពលោក Papy តាមរបៀបខ្មែរ។

បើតាមអ្នកសារព័ត៌មានថ្មីៗ ដែលបានតាមក្បួនដង្ហែសពនោះ នៅតាមផ្លូវដង្ហែសពវិរបុរសរបស់កុមារស្ទឹងមានជ័យរូបនេះ មានក្រុមនិស្សិត យុវជន និងអាណាព្យាបាលសិស្សរាប់ពាន់នាក់នៅឈក្រោមកម្តៅថ្ងៃ ។ ចំណែកកុមារជាច្រើននាក់ បានឈតម្រង់ជាជួរនៅសងខាងផ្លូវចូលទៅកាន់វត្តបញ្ចកែវមុនីឫស្សីសាញ់ ដើម្បីទទួលសពលោក Papy។

គួរបញ្ជាក់ថា លោក គ្រីស្យង់ និងភរិយា Marie-France បានបង្កើតអង្គការដើម្បីភាពញញឹមនៃកុមារ (PSE) តាំងពីឆ្នាំ១៩៩៥ មក ហើយបានជួយដល់កុមារដែលរស់នៅម្តុំស្ទឹងមានជ័យ ជាយរាជធានីភ្នំពេញ ជាពិសេសនៅគំនរសំរាម ជាច្រើនពាន់នាក់ តាមរយៈការផ្តល់ឱកាសសិក្សា ការស្នាក់នៅ អាហារ និងការទំនុកបម្រុងផ្សេងៗ។ សប្បុរសជនទាំងពីរត្រូវបានគេហៅថា Papy Mami ដែលត្រូវបានគេចាត់ទុកថា ជាឪពុកម្តាយទីពីររបស់កុមារកម្ពុជា៕