អន្តរជាតិ
ទីម័រខាងកើត៖ បើគ្មានសន្តិភាពនិងស្ថិរភាព ក៏គ្មានការអភិវឌ្ឍ, ហើយបើគ្មានការអភិវឌ្ឍ ក៏គ្មានសន្តិភាព និងស្ថិរភាពដែរ លោកនាយករដ្ឋមន្ត្រីទីម័រខាងកើត Rui Maria de Araújo
× ពីមហាសន្និបាតអង្គការសហប្រជាជាតិ នាយករដ្ឋមន្ត្រីទីម័រខាងកើត នៅថ្ងៃទី២៤ ខែកញ្ញាកន្លងទៅ បានគូសបញ្ជាក់ពីតថភាពពីរដែលបំពេញគ្នាទៅវិញទៅមក ដោយអះអាងថា បើគ្មានសន្តិភាព និងស្ថិរភាព ក៏គ្មានការអភិវឌ្ឍ ហើយបើគ្មានការអភិវឌ្ឍ ក៏គ្មានសន្តិភាព និងស្ថិរភាពដែរ។
«ក្នុងនាមជាប្រទេសដែលធ្លាប់ឆ្លងកាត់ពិសោធន៍នៃជម្លោះច្រើនឆ្នាំ ទីម័រខាងកើត បានដឹងគ្រប់បែបយ៉ាងពីផលប៉ះពាល់នៃសង្គ្រាម ហើយ យើង ដឹងអ្វីគ្រប់យ៉ាងដើម្បីចៀសវាងពីសង្គ្រាម តាមរយៈការទូតទប់ស្កាត់ និងតាមរយៈនៃពង្រឹងស្ថាប័ន»។ នេះជាសេចក្តីថ្លែងការណ៍របស់លោកនាយករដ្ឋមន្ត្រីទីម័រខាងកើត Rui Maria de Araújo ក្នុងមហាសន្និបាតអង្គការសហប្រជាជាតិនាសម័យប្រជុំលើកទី៧១។
លោកនាយករដ្ឋមន្ត្រីរូបនោះ ក៏បានបន្ថែមដែរថា ទីម័រខាងកើត អាចធ្វើជាគំរូ និងប្រភពនៃក្តីសង្ឃឹម ក្នុងនាមជាប្រទេសដែលទើបតែងើបពីស្ថានភាពជម្លោះ និងក្លាយជាប្រទេសដែលមានសន្តិភាព សន្តិសុខ និងស្ថិរភាពផងដែរនោះ។
លោក ក៏បានថ្លែងទៅកាន់មហាសន្និបាតដែរ យើងគ្រប់គ្នាសុទ្ធសឹងតែបានដឹងពីសារៈសំខាន់នៃសន្តិភាពសម្រាប់ការអភិវឌ្ឍ និងការអភិវឌ្ឍសម្រាប់សន្តិភាព ដែលជាគោលដៅទី១៦ក្នុងចំណោមនៃគោលដៅទាំង១៧នៃការអភិវឌ្ឍប្រកបដោយនិរន្តភាព ដែលបានអនុម័តដោយមហាសន្និសន្និបាតអង្គការសហប្រជាជាតិកាលពីឆ្នាំមុន។
លោកនាយរដ្ឋមន្ត្រីនៃប្រទេសក្មេងខ្ចីជាងគេនៅអាស៊ីអាគ្នេយ៍រូបនោះ បានសង្កត់ធ្ងន់យ៉ាងដូច្នេះថា «គ្មានអ្វីដែលត្រូវឆ្ងល់នោះទេ: បើគ្មានសន្តិភាព និងស្ថិរភាព យើង មិនអាចសូម្បីតែគិតពីការអភិវឌ្ឍ ហើយ បើគ្មានការអភិវឌ្ឍ ក៏គ្មានសន្តិភាព និងស្ថិរភាពអ្វីដែរ»។
ទន្ទឹមនឹងការលើកឡើងពីសារសំខាន់នៃការអភិវឌ្ឍ និងសន្តិភាពដែលមិនអាចខ្វះគ្នាបាននោះ លោកនាយករដ្ឋមន្ត្រី ក៏ផ្តល់ជាដំណោះស្រាយ ដោយលើកឡើងថា ដើម្បីប្រយុទ្ធប្រឆាំងទៅនឹងការគំរាមកំហែង និងរក្សាសក្តានុពលសេដ្ឋកិច្ច ការការពារព្រំដែន និងធានាពីសន្តិសុខដែនសមុទ្រ ក៏ជាកិច្ចការអាទិភាពផងដែរ។
សូមជម្រាបផងដែរថា ទីម័រខាងកើត ធ្លាប់ស្ថិតក្រោមអាណានិគមរបស់ប្រទេសព័រទុយហ្គាល់ហើយបានប្រកាសឯករាជ្យជាផ្លូវការនៅថ្ងៃទី២៨ ខែវិច្ឆិកាឆ្នាំ១៩៧៥។ យ៉ាងណាមិញការប្រកាសឯករាជ្យមិនបានស្រួលបួលប៉ុន្មានផងប្រទេសនេះក៏ត្រូវបានឈ្លានពានដោយប្រទេសជិតខាង ប្រទេសឥណ្ឌូនេស៊ីនៅចុងឆ្នាំ១៩៧៥ រហូតដល់ឆ្នាំ១៩៩៩។
ក្នុងពេលដែលឥណ្ឌូនេស៊ីដាក់បញ្ចូលទីម័រខាងកើតក្នុងឧបសម្ពន័របស់ខ្លួន និងគ្រប់គ្រងនោះ មានប្រជាជនទីម័រខាងកើតជាច្រើននាក់ត្រូវបានរងនូវការធ្វើទារុណកម្ម បង្ខាំង និងសម្លាប់យ៉ាងឃោរឃៅ។ តែចុងក្រោយ ទីម័រខាងកើត បានឯករាជ្យជាថ្មីម្តងទៀតក្រោយពីមានការធ្វើប្រជាមតិនៅឆ្នាំ១៩៩៩ដែលបានរៀបចំដោយអង្គការសហប្រជាជាតិ ហើយបានក្លាយជារដ្ឋដែលមានអធិបតេយ្យពេញលេញ និងជាសមាជិករបស់អង្គការសហប្រជាជាតិនៅឆ្នាំ ២០០២៕
Tag:
អង្គការសហប្រជាជាតិ
UN
© រក្សាសិទ្ធិដោយ thmeythmey.com