អន្តរជាតិ
×![]()
ដោយ: ថ្មីៗ
អតីតប្រធានាធិបតីអ៊ីស្រាអែល Shimon Peres បានស្លាប់នៅវ័យ ៩៣ ឆ្នាំ ពីរសប្តាហ៍ក្រោយពេលលោកចូលសម្រាកមន្ទីរពេទ្យដោយសារដាច់សរសៃឈាមខួរក្បាល។ លោក Shimon Peres ជាអ្នកនយោបាយអ៊ីស្រាអែលដ៏ល្បីម្នាក់ហើយលោកម្ចាស់ពានរង្វាន់ណូបែលសន្តិភាពនិងជាសហស្ថាបនិកនៃកិច្ចព្រមព្រៀងសន្តិភាព Oslo ថែមទៀត។
លោក Shimon Peres អតីតប្រធានាធិបតី និងអតីតនាយករដ្ឋមន្ត្រីអ៊ីស្រាអែលបាន ស្លាប់នៅក្នុងវ័យ ៩៣ឆ្នាំដោយសារដាច់សរសៃឈាមខួរក្បាល។ នេះបើតាមការបញ្ជាក់របស់ទីភ្នាក់ងារព័ត៌មានរដ្ឋអ៊ីស្រាអែល។
លោក Peres បាន ដាច់សរសៃឈាមខួរក្បាលនៅថ្ងៃ ១៣ កញ្ញា ហើយលោកបានទទួលការព្យាបាលពីគ្រូពេទ្យនៅទីក្រុង Tel Aviv។ ក្រោយមកស្ថានភាពសុខភាពល្អបានធូរស្រាលបន្តិចប៉ុន្តែ ស្ថិតក្នុងស្ថានភាពធ្ងន់ធ្ងរដដែល។ មកដល់ថ្ងៃអង្គារទី ២៧ កញ្ញាម្សិលមិញ សុខភាពលោកចាប់ផ្តើមដុនដាបខ្លាំង ហើយក៏បានស្លាប់នៅថ្ងៃ ទី២៨ នេះទៅ។
តាមពិតទៅ លោក Shimon Peres ជាអ្នកនយោបាយអ៊ីស្រាអែលជើងចាស់ដែលល្បីឈ្មោះនិងទទួលបានការគោរពខ្លាំងពីប្រជាជនអ៊ីស្រាអែលនិងមេដឹកនាំបរទេសផ្សេងទៀត។ ក្រៅពីធ្វើជាប្រធានាធិបតីទី៩របស់អ៊ីស្រាអែល លោក Shimon Peres ក៏ធ្លាប់បម្រើការងារជានាយករដ្ឋមន្ត្រីអ៊ីស្រាអែលពីរដងដែរ។ ដោយសារប្រជាប្រិយភាពខ្ពស់ លោកបានបន្តកាន់តំណែងជាប្រធានាធិបតី រយៈពេល ៧ឆ្នាំ ពីឆ្នាំ ២០០៧ ដល់ឆ្នាំ ២០១៤
អ្វីដែលសំខាន់នោះលោក ធ្លាប់ទទួលបានពានរង្វាន់ណូបែលសន្តិភាពថែមទៀត ដោយសារលោកជាសហស្ថាបនិកនៃកិច្ចព្រមព្រៀងសន្តិភាព Oslo ជាមួយនាយករដ្ឋមន្ត្រី Yitzhak Rabin និងប្រធានអាជ្ញាធរប៉ាឡេស្ទីនលោក Yasser Arafat៕
© រក្សាសិទ្ធិដោយ thmeythmey.com
