ជាតិ
នយោបាយជាតិ
រដ្ឋសភា មិនដកអភ័យឯកសិទ្ធិតំណាងរាស្ត្របក្សប្រឆាំង តាមសំណើរបស់ក្រសួងយុត្តិធម៌ទេ
×
ភ្នំពេញ៖ ប្រធានគណៈកម្មការជំនាញទាំង៥រូប ពីគណបក្សសង្គ្រោះជាតិ បានចូលរួមប្រជុំគណៈកម្មាធិការអចិន្ត្រៃយ៍នៃរដ្ឋសភា នៅព្រឹកថ្ងៃពុធនេះ។ ក្រោយកិច្ចប្រជុំ គណៈកម្មាធិការអចិន្ត្រៃយ៍នៃរដ្ឋសភា បានសម្រេចច្រានចោលសំណើរបស់ក្រសួងយុត្តិធម៌ ដែលសុំឲ្យដកអភ័យឯកសិទ្ធិរបស់តំណាងរាស្ត្របក្សប្រឆាំងពីររូប។
គណៈកម្មាធិការអចិន្ត្រៃយ៍រដ្ឋសភា បានលើកហេតុផលថា ការមិនដកអភ័យឯកសិទ្ធិនេះ គឺដោយសារតែតំណាងរាស្ត្របក្សប្រឆាំងទាំងពីររូប គឺ លោក តុ វ៉ាន់ចាន់ និងលោក ពិន រតនា មិនបានប្រព្រឹត្តបទល្មើសជាក់ស្តែងឡើយ។ នេះបើតាមលោក ឡេង ប៉េងឡុង អគ្គលេខាធិការរដ្ឋសភា ដែលប្រាប់ក្រុមអ្នកសារព័ត៌មាន ក្រោយពីបញ្ចប់កិច្ចប្រជុំ។
លោក ឡេង ប៉េងឡុង បានបញ្ជាក់បែបនេះថា៖ ដោយសារតែតំណាងរាស្ត្រទាំងពីរនាក់នោះ មិនបានប្រព្រឹត្តបទល្មើសជាក់ស្តែង អ៊ីចឹងគណៈកម្មាធិការអចិន្ត្រៃយ៍ មិនបានសម្រេចទេ ហើយនឹងឆ្លើយជូនក្រសួងយុត្តិធម៌វិញ»។
សូមបញ្ជាក់ថា លោក តុ វ៉ាន់ចាន់ និងលោក ពិន រតនា ត្រូវបានតុលាការចោទពីបទ «សញ្ចារកម្ម» ទាក់ទងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយនឹងឯកឧត្តម កឹម សុខា អនុប្រធានគណបក្សសង្គ្រោះជាតិ។ បន្ទាប់មក ក្រសួងយុត្តិធម៌ បានស្នើឲ្យរដ្ឋសភា ព្យួរអភ័យឯកសិទ្ធិរបស់តំណាងរាស្ត្រទាំងពីរនាក់នេះ ដើម្បីឲ្យតុលាការ ចាត់ការលើពួកគាត់៕
Tag:
រដ្ឋសភា
តុលាការ
អភ័យឯកសិទ្ធិ
© រក្សាសិទ្ធិដោយ thmeythmey.com