អន្តរជាតិ
ប៉ូលិសហ្វីលីពីន បង្ក្រាបក្រុមបាតុករដែលទាមទារឲ្យទាហានអាមេរិកចេញពីទឹកដីខ្លួនដោយបើកឡានបុក
× ក្រុមបាតុករ និងប៉ូលិសហ្វីលីពីន នៅថ្ងៃពុធ ទី១៩ ខែតុលានេះ បានប៉ះទង្គិចគ្នាយ៉ាងហិង្សានៅមុខស្ថានអាមេរិកប្រចាំរដ្ឋធានីម៉ានីលនៃប្រទេសហ្វីលីពីន។ ការប៉ះទង្គិចនេះ បានផ្ទុះឡើងក្នុងពេលដែលក្រុមបាតុករ បានទាមទារឲ្យទាហានអាមេរិក ចាកចេញពីប្រទេសរបស់ពួកគេក្នុងឥរិយាបថដែលមិនស្របតាមគោលការណ៍សន្តិវិធីនោះ។
យ៉ាងហោចណាស់មានក្រុមបាតុករ៥០នាក់ បានរងរបួស ក្រោយប៉ូលិសហ្វីលីពីន បានបើកឡានបំបុក និងជាន់លើទៅមកទៅវិញលើការប្រមូលផ្តុំរបស់ក្រុមបាតុករដែលកំពុងតែទាមទារឲ្យទាហានអាមេរិកចាកចេញពីទឹកដីរបស់ខ្លួននោះ។ ក្នុងការប៉ះទង្គិចនោះ ក្រុមបាតុករ ក៏បានគប់ដុំថ្ម និងប្រើដំបងដើម្បីវាយតបទៅលើប៉ូលិសផងដែរ។ នេះបើយោងតាមការចុះផ្សាយរបស់សារព័ត៌មានហ្វីលីពីន Rappler។
តាមប្រភពព័ត៌មានដដែលនោះ ក្រុមបាតុករ ដែលដឹកនាំដោយសម្ព័ន្ធជនជាតិភាគតិច SANDUGO បានប្រមូលផ្តុំគ្នានៅមុខស្ថានទូតអាមេរិកប្រចាំរដ្ឋធានីម៉ានីលដើម្បីទាមទារឲ្យបញ្ចប់វត្តមានរបស់កងទ័ពអាមេរិកនៅហ្វីលីពីន ហើយពូកគេ ក៏បានប្រកាសគាំទ្រចំពោះជំហរនយោបាយការបរទេសឯករាជ្យរបស់លោកប្រធានាធិបតីហ្វីលីពីន Rodrigo Duterte ក្នុងការមិនពឹងផ្អែកលើអាមេរិកទៀតផងដែរ។
ជុំវិញនៃការបង្ក្រាបបាតុករតាមរយៈការបើកឡានបំបុកចុះឡើងនេះ មិនទាន់មានការបកស្រាយពីប៉ូលិសហ្វីលីពីននៅឡើយនោះទេ។ តែក្រុមសម្ព័ន្ធជនជាតិភាគតិច បានចេញសេចក្តីថ្លែងការណ៍ថ្កោលទោសយ៉ាងខ្លាំង ដោយក្រុមនោះ បានចោទការបង្ក្រាបរបស់ប៉ូលិសប្រៀបប្រដូចទៅនឹង ការស្ថិតក្រោមអំណាចនៃចក្រពត្តិអាមេរិកយ៉ាងដូច្នេះឯង។ នេះបើយោងតាមការចុះផ្សាយដដែលនោះ។
សម្រាប់សេចក្តីថ្លែងការណ៍ពីលោកប្រធានាធិបតីហ្វីលីពីន ក៏មិនទាន់មានដែរ ដ្បិតលោក កំពុងតែបំពេញទស្សនកិច្ចរយៈពេលបួនថ្ងៃនៅក្នុងប្រទេសចិន។ តែអ្វីគួរកត់សម្គាល់នោះ បាតុកម្មប្រឆាំងនឹងទ័ពអាមេរិករបស់ក្រុមបាតុករ បានផ្ទុះឡើង ស្របពេលដែលលោកប្រធានាធិបតីហ្វីលីពីន Rodrigo Duterte បានព្រមានក្នុងការបញ្ចប់កិច្ចសហប្រតិបត្តិការយោធាជាមួយនឹងអាមេរិកផងដែរ៕
Tag:
ហ្វីលីពីន
អាមេរិក
© រក្សាសិទ្ធិដោយ thmeythmey.com