កីឡាជាតិ
ជាតិ
កម្ពុជាឡើងទៅជួបមីយ៉ាន់ម៉ា វៀតណាម និងម៉ាឡេស៊ី ខណៈឡាវធ្លាក់នៅវគ្គជម្រុះជាលើកដំបូង ក្រុមកីឡាបាល់ទាត់ជម្រើសជាតិកម្ពុជា បានឈានទៅកាន់ជុំចុងក្រោយនៃពានរង្វាន់ AFF Suzuki Cup ដោយទទួលបានពិន្ទុលើសគេដោយឈ្នះទាំង៣ប្រកួតនាការប្រកួតជម្រុះនៅលើទឹកដីរបស់ខ្លួន។ សម្រាប់ជំនួបចុងក្រោយនាល្ងាចនេះ កម្ពុជាបានឈ្នះទីម័រខាងកើត ៣-២ នៅពហុកីឡដ្ឋានជាតិ ខណៈឡាវ យកឈ្នះព្រុយណេ ៤-៣ នៅកីឡដ្ឋាន RSN។
ការប្រកួតដំណើរការបានត្រឹម២នាទី ខ្សែបម្រើ ទិត្យ ឌីណា បានស៊ុតបាល់បញ្ចូលទីនាំមុខឲ្យកម្ពុជា ហើយឈានដល់នាទី ទី១៧ ខ្សែបម្រើ ឈិន ឈឿន បានបញ្ជូនបាល់ឲ្យខ្សែប្រយុទ្ធ ចាន់ វឌ្ឍនាកា រកគ្រាប់នាំមុខ ២-០ លើក្រុមភ្ញៀវទីម័រខាងកើត។
នៅនាទី ទី២០ ខ្សែការពារ សឿយ វិសាល បានធ្វើឲ្យខ្សែប្រយុទ្ធ Rufino Walter Gama ដួលនៅតំបន់គ្រោះថ្នាក់ ហើយប្រធានក្រុម Anggisu Correla De Almeida Barbosa បានស៊ុតបាល់ប៉េណាល់វាយបកតាមពីក្រោយ ២-១ សម្រាប់ទីម័រខាងកើត។ នៅនាទី៣៦ Gama បានបញ្ជូនឲ្យ Nelson Sarmento Viegas ដើម្បីសម្រេចលទ្ធផលស្មើ ២-២ ។
ក្នុងការប្រកួត៤៥នាទីដំបូង ចាន់ វឌ្ឍនាកា មានឱកាសជាច្រើនក្នុងការសម្រេចផលសម្រាប់កម្ពុជា ក្នុងនោះ មានទាំងការស៊ុតប៉ះរបាទី និងការទាត់ចូលទីក្នុងជំហរក្រៅល្បែងផងដែរ។ រង់ចាំដល់នាទី៧៨ ទើបវឌ្ឍនាកា សម្រេចផលបានយ៉ាងជោគជ័យ ដែលនាំឲ្យកម្ពុជានាំមុខ ៣-២ វិញ។
នៅកីឡដ្ឋាន RSN Adi Said បាននាំឲ្យព្រុយណេនាំមុខឡាវ ១-០ ហើយ Souk Aphone Vongchiengkham បានវាយបកតាមស្មើ ១-១ ។ នៅដើមតង់ទីពីរ Phatthana Syvilay បានស៊ុតបាល់ប៉េណាល់ទីដើម្បីឲ្យឡាវ នាំមុខព្រុយណេ ២-១ វិញ ហើយ Syvilay ដដែល បានតែតបាល់បញ្ចូលទី១គ្រាប់ទៀត ដើម្បីបង្កើនការនាំមុខ ៣-១ ។
ឈានដល់នាទី៦៧ Faiq Jefri Bolkiah ដែលជាក្មួយប្រុសបង្កើតរបស់ព្រះចៅស៊ុលតង់ព្រុយណេផងដែរនោះ បានស៊ុតបាល់ប៉េណាល់ទីសម្រាប់ព្រុយណេ តាមពីក្រោយឡាវ ៣-២ ។ Syvilay បន្ថែមគ្រាប់ទី៣របស់ខ្លួននៅនាទី៧៦ ដែលនាំឲ្យឡាវនាំមុខព្រុយណេ ៤-២ ។ នៅចុងតង់ ព្រុយណេ វាយបក១គ្រាប់វិញ នាំឲ្យការប្រកួតបញ្ចប់ក្នុងលទ្ធផល ៤-៣។
សម្រាប់ឡាវ បើទោះបីជាពួកគេឈ្នះព្រុយណេ ៤-៣ ក៏ដោយ ប៉ុន្តែពួកគេបានខកឱកាសក្នុងការឈានទៅកាន់វគ្គបន្ត ដោយសារតែពិន្ទុរបស់ពួកគេចាញ់កម្ពុជា ពោលគឺពួកគេមានតែ៦ពិន្ទុ។ នេះជាការខកខានឱកាសលើកដំបូងបំផុតរបស់ឡាវក្នុងឈានទៅកាន់វគ្គបន្តបើគិតចាប់តាំងពីឆ្នាំ១៩៩៦មក ខណៈកម្ពុជាមានឱកាសឡើងទៅជួបក្រុមខ្លាំងៗសារជាថ្មី បន្ទាប់ពីខកខានតាំងពីឆ្នាំ២០០៨ មក។
កម្ពុជាដែលរកបាន៩ពិន្ទុ ត្រូវឡើងទៅប៉ះម្ចាស់ផ្ទះមីយ៉ាន់ម៉ា ម៉ាឡេស៊ី និងវៀតណាម នៅក្នុងពូល B នៃវគ្គចាប់ពូល។
ជម្រើសរបស់កម្ពុជា៖ អ៊ុំ សេរីរ័ត្ន (ប្រធានក្រុម) , សឿយ វិសាយ, សំអឿន ពិដោរ, ណុប តុលា, សុខ សុវណ្ណ, ឈិន ឈឿន, ទិត្យ ឌីណា (សុះ ស៊ូហាណា ៧១), ច្រឹង ពលរដ្ឋ, ប្រាក់ មុន្នីឧត្ដម (ប៊ិន ធារី ៨៦), កែវ សុខផេង , ចាន់ វឌ្ឍនាកា (ឃួន ឡាបូរ៉ាវី ៨០)។
Tag:
បាល់ទាត់
ជម្រើសជាតិកម្ពុជា
AFF Suzuki Cup
© រក្សាសិទ្ធិដោយ thmeythmey.com