ជាតិ
ក្រសួងធនធានទឹក ប្រាប់ឲ្យពលរដ្ឋ ប្រយ័ត្នចំពោះគ្រោះទឹកជំនន់ ស្ថានភាពទឹកនៅស្ទឹងព្រែកត្នោតនាពេលកន្លងមក (រូបថត៖ ហ្វេសប៊ុកក្រសួងធនធានទឹក និងឧតុនិយម)
× ភ្នំពេញ៖ ក្រសួងធនធានទឹក និងឧតុនិយម បានប្រាប់ឲ្យប្រជាពលរដ្ឋ ប្រុងយ័ត្នចំពោះគ្រោះទឹកជំនន់ ដែលអាចនឹងកើតឡើង ខណៈភ្លៀងនឹងបង្កើនការធ្លាក់រាយប៉ាយនៅលើផ្ទៃប្រទេសចាប់ពីថ្ងៃទី២២ ដល់ថ្ងៃទី៣១ ខែតុលា។
យោងតាមការព្យាករអាកាសធាតុរបស់ក្រសួងធនធានទឹក ចេញផ្សាយនៅថ្ងៃទី២២ តុលានេះ ប្រព័ន្ធសម្ពាធបានបន្តអូសកាត់ប្រទេសកម្ពុជា។
ក្រសួងបានបញ្ជាក់ទៀតថា សម្ពាធទាបមួយ នៃប្រព័ន្ធសម្ពាធទាបដែលកំពុងស្ថិតនៅសមុទ្រចិនខាងត្បូង នឹងវិវត្តន៍ទៅជាសម្ពាធទាបសកម្ម ហើយជំរុញឲ្យប្រព័ន្ធសម្ពាធទាបកាន់តែមានឥទ្ធិពល។ ចំណែកឯព្យុះទី២២ ឈ្មោះ HAIMA បានធ្វើដំណើរទៅដល់ប្រទេសចិន ដែលវា នឹងថយឥទ្ធិពលមកជាសម្ពាធទាប នៅថ្ងៃទី២៣ តុលា ឆ្នាំ២០១៦។
ផ្អែកតាមការព្យាករនេះ ស្ថានភាពអាកាសធាតុនៅកម្ពុជា ចាប់ពីថ្ងៃទី២២ ដល់ថ្ងៃទី៣១ ខែតុលានេះ ភ្លៀងនឹងបន្តបង្កើនការធ្លាក់រាយប៉ាយលើផ្ទៃប្រទេស ដោយមានបរិមាណកើនឡើងជាលំដាប់ ពិសេសខេត្តចំនួន១០ ដែលរួមមនា ខេត្តកំពង់ស្ពឺ កណ្តាល កំពត តាកែវ ស្វាយរៀង កំពង់ឆ្នាំង ត្បូងឃ្មុំ ក្រចេះ កំពង់ចាម និងខេត្តព្រៃវែង នឹងមានភ្លៀងធ្លាក់ជាបន្តបន្ទាប់ ពីបង្គួរ ទៅច្រើន។ ចំណែកឯខេត្តព្រះសីហនុ និងខេត្តកោះកុង អាចនឹងមានភ្លៀងធ្លាក់ច្រើន៕
Tag:
ទឹកជំនន់
អាកាសធាតុ
© រក្សាសិទ្ធិដោយ thmeythmey.com