កម្ពុជាត្រូវការធនធានមនុស្សផ្នែកទេសចរណ៍ជាង១លាននាក់ នៅឆ្នាំ២០២០

ជាតិ

កម្ពុជាត្រូវការធនធានមនុស្សផ្នែកទេសចរណ៍ជាង១លាននាក់ នៅឆ្នាំ២០២០

22, Oct 2016 , 4:46 pm

រូបភាព

ដោយ:

ភ្នំពេញ៖ កម្ពុជាត្រូវការអ្នកជំនាញវិស័យទេសចរណ៍ជាង៣០មុខ និងធនធានមនុស្សជាង១លាននាក់ ដើម្បីបំពេញតម្រូវការជូនភ្ញៀវទេសចរ ដែលអាចកើនឡើងរហូតដល់ជាង២០លាននាក់នៅឆ្នាំ២០២០។ នេះបើតាមទីភ្នាក់ងារសារព័ត៌មានកម្ពុជា(AKP) ដែលបានដកស្រង់ប្រសាសន៍ រដ្ឋមន្ត្រីស្តីទីក្រសួងទេសចរណ៍ លោក ទិត ចន្ថា នៅក្នុងពិធីតាំងពិព័រណ៍ខេមហ្វូតខេមថែល២០១៦ នៅមជ្ឈមណ្ឌលសន្និបាត និងពិព័រណ៍កោះពេជ្រ កាលពីថ្ងៃទី២០ តុលា ឆ្នាំ២០១៦។

បើតាម AKP ដែលបានស្រង់ប្រសាសន៍រដ្ឋមន្ត្រីស្តីទីក្រសួងទេសចរណ៍ លោក ទិត ចន្ថា កម្ពុជាត្រូវការធនធានមនុស្សប្រកបដោយសមត្ថភាព ដើម្បីបម្រើភ្ញៀវទេសចរ។ ក្រៅពីនេះ កម្ពុជាក៏ត្រូវពង្រីកចំនួនសណ្ឋាគារ ភោជនីយដ្ឋាន និងសេវាកម្មផ្សេងៗទៀតប្រកបដោយគុណភាព ដើម្បីទាក់ទាញភ្ញៀវទេសចរឲ្យចង់មកកម្ពុជាម្តងហើយម្តងទៀត។ «កម្ពុជាត្រូវការអ្នកជំនាញផ្នែកទេសចរណ៍ជាង៣០មុខ និងធនធានមនុស្សចំនួនជាង១លាននាក់ ដើម្បីបំពេញតម្រូវការភ្ញៀវទេសចរ ដែលអាចកើនឡើងរហូតដល់ជាង២០លាននាក់ នៅឆ្នាំ២០២០»។ នេះការបញ្ជាក់របស់លោករដ្ឋមន្ត្រីស្តីទី ទិត ចន្ថា ដែលAKP បានស្រង់ប្រសាសន៍មកចុះផ្សាយ កាលពីថ្ងៃទី២១ ខែតុលា។

បើតាម AKP ទន្ទឹមនឹងការអភិវឌ្ឍធនធានមនុស្សនេះដែរ លោករដ្ឋមន្ត្រីស្តីទី បានបញ្ជាក់ថា ក្រសួង គ្រោងបង្កើតសាលាបណ្តុះបណ្តាលជំនាញវិជ្ជាជីវៈវិស័យទេសចរណ៍ចំនួន២ គឺនៅរាជធានីភ្នំពេញ និងនៅខេត្តព្រះសីហនុ ដើម្បីបង្កើនការបណ្តុះបណ្តាល សិស្ស និស្សិត ឲ្យបានកាន់តែច្រើន និងមានសមត្ថភាពប្រកដោយវិជ្ជាជីវៈខ្ពស់ ដែលអាចសម្រេចតាមផែនការគ្រោងទុក។

សូមបញ្ជាក់ថា អំឡុង៦ខែដើមឆ្នាំ២០១៦នេះ ចំនួនអ្នកទេសចរអន្តរជាតិមកកម្ពុជា មាន ២,៣លាននាក់។ បើផ្អែកលើរបាយការណ៍ឆ្នាំ២០១៥ ក្នុងចំណោមភ្ញៀវទេសចរអន្តរជាតិ ដែលរួមមាន ចិន ថៃ ឡាវ វៀតណាម កូរ៉េ ជប៉ុន ភ្ញៀវទេសចរចិន ឈរនៅលំដាប់ថ្នាក់ទី១ មានចំនួនជាង៧០ម៉ឺននាក់។ មិនត្រឹមតែប៉ុណ្ណោះ កន្លងទៅថ្មីៗនេះ កម្ពុជាថែមទាំងស្នើចិន ឲ្យជួយជំរុញភ្ញៀវទេសចរចិន មកកម្ពុជារហូតដល់២លាននាក់នៅឆ្នាំ២០២០ទៀតផង៕

ប្រភព៖AKP