ជាតិ
នយោបាយជាតិ
អ្នកនាំពាក្យ CPP៖«សម រង្ស៊ីណា ខ្លាំងជាងខ្មែរក្រហម?»
× ឯកឧត្តម សម រង្ស៊ី ប្រធានគណបក្សសង្គ្រោះជាតិ បាននិរទេសខ្លួនពីកម្ពុជា ដើម្បីគេចពីដីកាចាប់ខ្លួនឲ្យអនុវត្តទោស និងពីបណ្តឹងជាច្រើនទៀតផង។ ប៉ុន្តែបើគេឃើញលិខិតមួយដែលចុះហត្ថលេខាដោយរដ្ឋលេខាធិការនៃទីស្តីការគណៈរដ្ឋមន្ត្រី គឺលោក តឹក រ៉េតសំរេច នោះ ឯកឧត្តម សម រង្ស៊ី មិនអាចចូលមកអនុវត្តទោសក្នុងពន្ធនាគារនៅកម្ពុជាឡើយ។
លិខិតដែលចុះហត្ថលេខាតាំងពីថ្ងៃទី១២ខែតុលានោះ ហើយដែលត្រូវបានសារព័ត៌មានមួយចំនួនទទួលបាននោះ បានបង្ហាញពីសេចក្តីសម្រេចរបស់រដ្ឋាភិបាលបញ្ជាឲ្យសមត្ថកិច្ចពាក់ព័ន្ធហាមឃាត់លោក សម រង្ស៊ី មិនឲ្យចូលមកក្នុងប្រទេសកម្ពុជានោះទេ។
«ក្នុងករណីយន្តហោះដឹកបុគ្គល សម រង្ស៊ី ចុះចតដល់អាកាសយានដ្ឋានណាមួយនៅកម្ពុជា នឹងមិនត្រូវអនុញ្ញាតឲ្យភ្ញៀវចាកចេញពីយន្តហោះនោះឡើយ និងត្រូវបញ្ជាឲ្យត្រឡប់ទៅអាកាសយានដ្ឋានដើមវិញ»។ នេះជាបញ្ជាមួយក្នុងចំណោមបញ្ជាដែលមាន៤ចំនុចនៅក្នុងសេចក្តីសម្រេចដែលត្រូវបានផ្ញើទៅនាយឧត្តមសេនីយ សុខ ផល ដែលជាអគ្គនាយកនៃអគ្គនាយកដ្ឋានអន្តោប្រវេសន៍។
ឯកឧត្តម សម រង្ស៊ី មានទោស តែមិនត្រូវបានអនុញ្ញាតឲ្យចូលមកអនុវត្តទោស? ប្រធានគណបក្សសង្គ្រោះជាតិដែលបានឃើញលិខិតស្តីពីការហាមប្រាមលោកមិនឲ្យចូលប្រទេសកម្ពុជាវិញនោះ បានបកស្រាយប្រាប់វិទ្យុអាស៊ីសេរីថា៖«លិខិតនោះបង្ហាញថា ខ្ញុំគ្មានទោស។ បើខ្ញុំមានទោសមែន គេច្បាស់ជាចាប់ខ្ញុំឲ្យទទួលទោសហើយ។ និយាយឲ្យច្បាស់ទៅ គេគ្រាន់តែខ្លាចវត្តមានរបស់ខ្ញុំ។ គេមិនចង់ឲ្យខ្ញុំមកប្រកួតលើឆាកនយោបាយជាមួយគណបក្សប្រជាជនកម្ពុជាដែលដឹកនាំដោយលោក ហ៊ុន សែន»។
ការអត្ថាធិប្បាយបែបនេះ បានធ្វើឲ្យអ្នកនាំពាក្យគណបក្សប្រជាជនកម្ពុជា គឺ លោក សុខ ឥសាន ត្រូវបញ្ចេញប្រតិកម្ម។ អ្នកនាំពាក្យ និងជាអ្នកតំណាងរាស្ត្រផង បានអត្ថាធិប្បាយប្រាប់សារព័ត៌មានថ្មីៗតាមទូរសព្ទ នៅរសៀលថ្ងៃទី២២តុលា ផ្ទឹមលោក សម រង្ស៊ី ជាមួយក្រុមខ្មែរក្រហម ដោយនិយាយយ៉ាងដូច្នេះ៖«សម្តេច ហ៊ុន សែន ម៉េចនឹងខ្លាច សម រង្ស៊ី? សម រង្ស៊ី ណាខ្លាំងជាងខ្មែរក្រហម?»។
មាន២រឿង ដែលលោក សុខ ឥសាន ត្រូវបញ្ជាក់ឲ្យច្បាស់នៅត្រង់នេះ។ ទីមួយ អ្នកនាំពាក្យគណបក្សប្រជាជនកម្ពុជានៅតែជឿជាក់ថា លោក សម រង្ស៊ី ជាបុគ្គលមានទោស ដោយសារតែលោកយោងទៅលើភស្តុតាងមួយចំនួនដូចជា សាលក្រមស្ថាពរ ការដែលឯកឧត្តម សម រង្ស៊ី ធ្លាប់បន់ស្រន់អ្នកតាឃ្លាំងមឿងសុំរួចទោស ការដែលគណបក្សសង្គ្រោះជាតិស្វែងរកការចរចាជាមួយគណបក្សកាន់អំណាចដើម្បីសុំឲ្យមន្ត្រីរបស់ពួកគេរួចទោស ដែលក្នុងនោះរួមមានឯកឧត្តមប្រធាន និងអនុប្រធានគណបក្ស និងការសរសេរស្នើសុំព្រះរាជលើកលែងទោសទៅព្រះមហាក្សត្រទៀតផង។
ដូច្នេះ បើតាមការបញ្ជាក់របស់លោក សុខ ឥសាន ប្រធានគណបក្សសង្គ្រោះជាតិ គឺជាមនុស្សមានទោស ហើយលោកបន្តថារដ្ឋាភិបាលចង់ឲ្យឯកឧត្តម សម រង្ស៊ី «ជាប់ទោសដោយនៅក្រៅប្រទេស» ដើម្បីសន្តិសុខរបស់ពលរដ្ឋ។
អ្នកនាំពាក្យគណបក្សប្រជាជនកម្ពុជារបស់សម្តេច ហ៊ុន សែន បានអធិប្បាយប្រាប់សារព័ត៌មានថ្មីៗយ៉ាងដូច្នេះថា៖«បើសិនជាលិខិតរបស់ឯកឧត្តម តឹក រ៉េតសំរេច ជាការពិត គឺបានន័យថា រដ្ឋាភិបាលលោកចង់ធានាឲ្យពលរដ្ឋមានសន្តិភាព។ ឯកឧត្តម សម រង្ស៊ី យល់ហើយថា គេមិនអាចមកជាប់ទោសជំនួសអ្នកផ្សេងបានទេ។ ដូច្នេះអ្វីដែលគាត់ប្រកាស ហាក់ដូចជាការចូលមកអុកឡុក ចូលមករំខានទៅវិញទេ»។
យ៉ាងណាក៏ដោយ បើគេស្តាប់ឮប្រសាសន៍ឯកឧត្តម សម រង្ស៊ី នៅលើរលកអាកាសវិទ្យុអាស៊ីសេរីនោះ ឯកឧត្តម សម រង្ស៊ី ក៏មិនទាន់ប្រញាប់ចូលមកកម្ពុជាក្នុងពេលឆាប់ៗខាងមុខនេះទេ។ ឯកឧត្តម សម រង្ស៊ី គ្រាន់តែថ្លែងយ៉ាងទូលាយថា ឯកឧត្តមនឹងចូលមកកម្ពុជាមុនការបោះឆ្នោត…
Tag:
សម រង្ស៊ី
ហ៊ុន សែន
សុខ ឥសាន
ខ្មែរក្រហម
© រក្សាសិទ្ធិដោយ thmeythmey.com