ឈ្នះ៤ប្រកួតជាប់ៗគ្នាគឺជាកំណត់ត្រាដែលមិនធ្លាប់មានពីមុនរបស់ជម្រើសជាតិកម្ពុជា!

កីឡាជាតិ

ជាតិ

ឈ្នះ៤ប្រកួតជាប់ៗគ្នាគឺជាកំណត់ត្រាដែលមិនធ្លាប់មានពីមុនរបស់ជម្រើសជាតិកម្ពុជា!

25, Oct 2016 , 3:37 pm

រូបភាព

ខ្សែបម្រើស្លាបឈិន ឈឿន លើកពានជម្រុះ AFF Suzuki Cup បង្ហាញអ្នកគាំទ្រ។ រូបថត Masayori Ishikawa

ដោយ: អុឹង ចំរើន (Ung Chamroeun)

នៅឆ្នាំ២០១៦នេះ ក្រុមកីឡាបាល់ទាត់ជម្រើសជាតិកម្ពុជា បានបំបែកកំណត់ត្រាដ៏ពិសេសរបស់ខ្លួន។ ចន្លោះពីខែឧសភា ដល់ខែកក្កដា ពួកគេរកបានបង្កើតកំណត់ត្រាមិនស្គាល់ចាញ់៤ប្រកួតជាប់គ្នាលើកដំបូងដោយស្មើ១ប្រកួត និងឈ្នះ៣ប្រកួត។ ក្នុងអំឡុងខែតុលានេះ ក្រុមរបស់លោក Lee Tae Hoon សម្រេចបានកំណត់ត្រាដ៏ពិសេសបន្ថែមទៀត ដោយឈ្នះ៤ប្រកួតជាប់ៗគ្នា ដែលក្នុងនោះ ៣ប្រកួតស្ថិតក្នុងជំនួបវគ្គជម្រុះ AFF Suzuki Cup។

បើគិតចាប់តាំងពីខែឧសភា ដល់ខែតុលា ក្នុងឆ្នាំ២០១៦ ក្រុមកីឡាបាល់ទាត់ជម្រើសជាតិកម្ពុជាក្រោមការដឹកនាំរបស់គ្រូបង្វឹកកូរ៉េខាងត្បូង លោក Lee Tae Hoon មានការប្រកួតចំនួន១០លើក ក្នុងនោះឈ្នះ៧លើក ស្មើ១លើក និងចាញ់២លើក។

ក្រោយបរាជ័យទាំង៨ប្រកួតក្នុងវគ្គជម្រុះ World Cup ជុំទី២ប្រចាំតំបន់អាស៊ី ក្រុមកីឡាបាល់ទាត់ជម្រើសជាតិកម្ពុជា បានស្តារមុខមាត់របស់ខ្លួនឡើងវិញជាមួយនឹងលទ្ធផលមិនស្គាល់ចាញ់ចំនួន៤លើកជាប់ៗគ្នា។ នៅខែឧសភា កម្ពុជាយកឈ្នះទីម័រខាងកើត ២-០ ហើយឈានដល់ការប្រកួតវគ្គជម្រុះ AFC Asian Cup កម្ពុជាប៉ះឆាយនីសតៃប៉ិ ដោយស្មើ ២-២ នៅកោះតៃវ៉ាន់ និងឈ្នះ ២-០ នៅពហុកីឡដ្ឋានជាតិ។ នៅខែកក្កដា កម្ពុជាបានយកឈ្នះសិង្ហបុរី ២-១ ក្នុងការប្រកួតមិត្តភាពអន្តរជាតិ និងជាជ័យជម្នះលើកដំបូង បើគិតចាប់តាំងពីឆ្នាំ១៩៧២មក។

ដំណើរនៃជ័យជម្នះរបស់កម្ពុជា ត្រូវបានកាត់ផ្តាច់ដោយក្រុមកោះហុងកុងនាការប្រកួតមិត្តភាពអន្តរជាតិទាំងពីរជើង។ នាថ្ងៃទី១ ខែកញ្ញា នៅទឹកដីហុងកុង ក្រុមម្ចាស់ផ្ទះ បានយកឈ្នះក្នុងលទ្ធផល ៤-២ ហើយនៅថ្ងៃទី៦ ខែតុលា ហុងកុងដែលពោរពេញទៅដោយកីឡាករបរទេសចូលសញ្ជាតិ បានបន្តយកឈ្នះ ២-០ ទៀតនៅលើទឹកដីកម្ពុជា។

ជាការតបស្នងដល់ក្រុមអ្នកគាំទ្រ នាថ្ងៃទី៩ ខែតុលា កម្ពុជាបានបើកទ្វារពហុកីឡដ្ឋានជាតិ ដើម្បីស្វាគមន៍ស្រីលង្កា សម្រាប់ជំនួបមិត្តភាពអន្តរជាតិ ដោយបញ្ចប់ជាមួយនឹងជ័យជម្នះ ៤-០ ។ ឈានដល់ការប្រកួតជម្រុះ AFF Suzuki Cup ពី ថ្ងៃទី១៥ ដល់ថ្ងៃទី២១ ខែតុលា កម្ពុជាដណ្តើមបាន៣ពិន្ទុជាបន្តបន្ទាប់ពីក្រុមភ្ញៀវ ដោយឈ្នះឡាវ ២-១ ឈ្នះព្រុយណេ ៣-០ និងឈ្នះទីម័រខាងកើត ៣-២ ដើម្បីឡើងទៅជួបមីយ៉ាន់ម៉ា វៀតណាម និងម៉ាឡេស៊ី នៅវគ្គចាប់ពូល។

ជ័យជម្នះ៤ប្រកួតជាប់ៗ គឺជាកំណត់ត្រាថ្មីដែលមិនធ្លាប់មានពីមុនឡើយសម្រាប់ក្រុមកីឡាបាល់ទាត់ជម្រើសជាតិកម្ពុជា។ បន្ថែមពីលើនេះ ជ័យជម្នះ៣ប្រកួតជាប់ៗគ្នាក្នុងដំណាក់កាលប្រកួតដណ្តើមពានរង្វាន់មួយ [ដូចជាវគ្គជម្រុះ AFF Suzuki Cup] នោះ ក៏ជាកំណត់ត្រាថ្មីផងដែរ។ កំណត់ត្រាដែលកម្ពុជាមិនស្គាល់ចាញ់៣ប្រកួតជាប់ៗគ្នា ក្នុងការប្រកួតជម្រុះ AFF Suzuki Cup នោះ គឺបានកើតឡើងកាលពីឆ្នាំ២០១០ នៅទីក្រុងវៀងចន្ទន៍ ប្រទេសឡាវ ដោយកាលនោះ កម្ពុជាបានស្មើម្ចាស់ផ្ទះឡាវ ០-០ បន្ទាប់មកយកឈ្នះទីម័រខាងកើត ៤-២ មុននឹងស្មើ ហ្វីលីពីន ០-០ ។

នាការប្រកួតកីឡា Ganefo ឆ្នាំ១៩៦៦ នៅរាជធានីភ្នំពេញ កម្ពុជាយកឈ្នះយ៉េមែន ៨-០ ស្មើវៀតណាមខាងជើង ២-២ ឈ្នះប៉ាឡេស្ទើន ៤-០សម្រាប់ការប្រកួតនៅក្នុងពូល ហើយបន្តដល់ឆ្នាំ១៩៦៧ ពួកគេបានយកឈ្នះឥណ្ឌា ៣-១ និងឈ្នះប៉ាគីស្ថាន ១-០ នាការប្រកួតជម្រុះកីឡាអាស៊ីនៅប្រទេសភូមា (មីយ៉ាន់ម៉ា)។ នេះជាកំណត់ត្រាមិនស្គាល់ចាញ់ដ៏យូរបំផុតរបស់កម្ពុជា កាលពីមុនសង្គ្រាម៕