កីឡាជាតិ
អាស៊ីអឺរ៉ុបក្លាយជាម្ចាស់ជើងឯក៣វិញ្ញាសាក្នុងព្រឹត្តិការណ៍ពាក់កណ្តាលម៉ារ៉ាតុនឋានសួគ៌បូកគោ
×
ការប្រកួតរត់ប្រណាំងពាក់កណ្តាលម៉ារ៉ាតុនឋានសួគ៌បូកគោលើកទី៣ ដើម្បីមនុស្សធម៌ជួយមន្ទីរពេទ្យគន្ធបុប្ផា ឆ្នាំនេះមានអត្តពលិកដែលមកពីបណ្តាប្រទេសផ្សេងៗគ្នាជាង១ពាន់នាក់ចូលរួមបានបញ្ចប់យ៉ាងជោគជ័យប្រកបដោយភាពសប្បាយរីករាយ។ ការប្រកួតដែលធ្វើឡើងនៅថ្ងៃទី២៣ ខែតុលា នៅលើកំពូលភ្នំបូកគោអត្តពលិកទាំងនេះត្រូវប្រកួតប្រជែងលើវិញ្ញាពាក់កណ្តាលម៉ារ៉ាតុន, ១០គីឡូម៉ែត្រ, ៥គីឡូម៉ែត្រ និង៣គីឡូម៉ែត្រ។
កីឡាករកីឡាការិនីមកពីសាកលវិទ្យាល័យអាស៊ីអឺរ៉ុទទួលបានលទ្ធយ៉ាងល្អនាការប្រកួតរត់ប្រណាំងពាក់កណ្តាលម៉ារ៉ាតុនឋានសួគ៌បូកគោលើកទី៣ ដោយកីឡាករ៣រូបបានក្លាយជាម្ចាស់ជើងឯកលើ៣វិញ្ញាសានៃការប្រកួតនេះ។ ក្នុងនោះកីឡាករជម្រើសជាតិ ម៉ា វីរ៉ូ ជាម្ចាស់ជើងឯកលើវិញ្ញាសាពាក់កណ្តាលម៉ារ៉ាតុនផ្នែកបុរស ឬឯកីឡាការិនី ហេង ម៉ីជូ ជាម្ចាស់ជើងឯកលើវិញ្ញាសា១០គីឡូម៉ែត្រផ្នែកនារី។
ដោយឡែក លោក ពៅ ហុក ប្រធានផ្នែកកីឡានៃសាកលវិទ្យាល័យអាស៊ីអឺរ៉ុប និងជាប្រធានប្រតិភូដឹកនាំកីឡាករចូលរួមប្រកួតព្រឹត្តិការណ៍ពាក់កណ្តាលម៉ារ៉ាតុនឋានសួគ៌បូកគោ ព្រមទាំងជាកីឡាដែលចូលរួមរត់ប្រណាំងផងដែរនោះ បានក្លាយជាម្ចាស់ជើងឯកលើវិញ្ញាសារត់ចម្ងាយ៥គីឡូម៉ែត្រ។
បើយោងតាមប្រធានផ្នែកកីឡារូបនេះ សម្រាប់ការប្រកួតរត់ប្រណាំងនេះអាស៊ីអឹរ៉ុបបានបញ្ជូនកីឡាករកីឡាការិនីទាំងអស់ចំនួន២១នាក់ឲ្យចូលរួម ក្នុងនោះ៤នាក់ជាកីឡាករអាជីព និង១៧នាក់ជាកីឡាកររត់បែបកម្សាន្ត ក្រៅពីនេះក៏មានអ្នកជួយលើកទឹកចិត្តជាច្រើនទៀតផងដែរ។ លោកបានបន្តទៀតថា នេះជាលើកទី១ហើយសម្រាប់អាស៊ីអឺរ៉ុបដែលបានបញ្ជូលកីឡាករលក្ខណៈទ្រង់ទ្រាយធំបែបនេះ។
ម្ចាស់ជើងឯករត់ចម្ងាយ៥គីឡូម៉ែត្ររូបនេះយល់ឃើញថា ការចូលរួមរត់ប្រណាំងពាក់កណ្តាលម៉ារ៉ាតុនឋានសួគ៌បូកគោដែលជាព្រឹត្តិការណ៍មនុស្សធម៌ មានន័យថាកីឡាករកីឡាការិនីរបស់អាស៊ីអឺរ៉ុបម្នាក់ៗបានចូលរួមចំណែកក្នុងការជួយដល់មន្ទីរពេទ្យគន្ធបុប្ផាផងដែរ។ ហើយលោករំពឹងថា នៅឆ្នាំក្រោយៗអាស៊ីអឹរ៉ុបនឹងបញ្ជូនកីឡាករឲ្យចូលរួមច្រើនជាងនេះ។
ជាមួយគ្នានេះ លោក ពៅ ហុក បានចាត់ទុកថា ការរត់ប្រណាំងពាក់ម៉ារ៉ាតុនឋានសួគ៌បូកគោជាព្រឹត្តិការណ៍មួយដែលថ្នាក់នាំប្រទេស ជាពិសេសក្រសួងទេសចរណ៍គូរយកចិត្តទុកដាក់ និងពិចារណាព្រោះវាអាចជួយទាក់ទាញភ្ញៀវទេសចរណ៍ជាតិ និងអន្តរជាតិឲ្យមកទស្សនានៅតំបន់ទេសចរណ៍មួយនេះ។ ម្យ៉ាងវិញទៀត វាក៏អាចជួយដល់សង្គមក្រោមរូបភាពមនុស្សផងដែរ លើសពីនេះ វាធ្វើឲ្យយើងមានសុខភាពល្អ និងចាកឆ្ងាយពីគ្រឿងញៀន៕
© រក្សាសិទ្ធិដោយ thmeythmey.com