ជាតិ
សេដ្ឋកិច្ច
រូបភាពពីក្រសួងពាណិជ្ជកម្ម
×![]()
ភ្នំពេញ៖ កម្ពុជា និងវៀតណាម បានចុះកិច្ចព្រមព្រៀងអនុគ្រោះពន្ធគយឲ្យដល់សូន្យភាគរយ លើបន្ទាត់ពន្ធមួយចំនួន ដើម្បីជំរុញពាណិជ្ជកម្មប្រទេសទាំងពីរ។ ក្នុងនោះ កម្ពុជាផ្ដល់ការអនុគ្រោះពន្ធលើមុខទំនិញចំនួន ២៩បន្ទាត់ពន្ធ ខណៈភាគីវៀតណាមយល់ព្រមអនុគ្រោះពន្ធលើមុខទំនិញចំនួន ៣៩បន្ទាត់ពន្ធ។ នេះបើតាមសេចក្ដីប្រកាសរបស់ក្រសួងពាណិជ្ជកម្ម។
ពិធីចុះហត្ថលេខាលើកិច្ចព្រមព្រៀងសម្រួលពាណិជ្ជកម្មទ្វេភាគី បានប្រព្រឹត្តទៅថ្ងៃទី២៦ខែតុលា នៅប្រទេសវៀតណាម រវាងក្រសួងពាណិជ្ជកម្ម និងក្រសួងឧស្សាហកម្មនិងពាណិជ្ជកម្មវៀតណាម ក្រោមអធិបតីភាពប្រមុខរដ្ឋាភិបាល សម្តេច ហ៊ុន សែន និងលោក ង្វៀន សួនហ្វ៊ក នាយករដ្ឋមន្ត្រីនៃសាធារណរដ្ឋសង្គមនិយមវៀតណាម ក្នុងឱកាសដែលគណៈប្រតិភូជាន់ខ្ពស់នៃប្រទេសទាំងពីរ អញ្ជើញចូលរួមកិច្ចប្រជុំកំពូលយុទ្ធសាស្ដ្រសហប្រតិបត្ដិការសេដ្ឋកិច្ច អាយ៉េយ៉ាវ៉ាឌី ចៅផៅយ៉ាមេគង្គ (ACMECS) លើកទី៧ និងកិច្ចប្រជុំកំពូលកម្ពុជា ឡាវ មីយ៉ាន់ម៉ា និង វៀតណាម (CLMV) លើកទី ៨ ព្រមទាំងកិច្ចប្រជុំវេទិកាសេដ្ឋកិច្ចពិភពលោក (WEF) ឆ្នាំ២០១៦ ស្តីពីតំបន់មេគង្គ។
ចំពោះការអនុគ្រោះពន្ធរបស់ភាគីរៀតណាមដល់កម្ពុជា ក៏បានរួមបញ្ចូលមុខទំនិញអង្ករចំនួន ៣០ម៉ឺនតោនរៀងរាល់ឆ្នាំ និងសន្លឹកថ្នាំជក់ស្ងួតចំនួន ៣ពាន់តោន សម្រាប់ឆ្នាំ២០១៦ និងឆ្នាំ២០១៧ ។ នេះបើតាមសេចក្ដីប្រកាសខាងលើ។
អ្នកនាំពាក្យក្រសួងពាណិជ្ជកម្ម លោកស្រី សឿង សុផារី មានប្រសាសន៍ថា ការអនុគ្រោះពន្ធរវាងកម្ពុជា និងវៀតណាមនេះ គឺស្ថិតនៅក្រោមដំណើរការសមាហរណកម្មសេដ្ឋកិច្ចអាស៊ាន ដែលមានគោលដៅបើកឲ្យមានលំហូរដោយសេរីនូវទំនិញ និងសេវាកម្មក្នុងតំបន់នេះ។
លោកស្រី សឿង សុផារី ថ្លែងប្រាប់សារព័ត៌មានថ្មីៗទៀតថា ការអនុគ្រោះពន្ធនេះ នឹងជំរុញពាណិជ្ជកម្មរបស់ប្រទេសទាំងពីរ និងផ្ដល់អត្ថប្រយោជន៍ដល់ពាណិជ្ជករ និងប្រជាពលរដ្ឋ។ លោកស្រីប្រាប់យ៉ាងដូច្នេះថា៖«ពេលអត់ជាប់ពន្ធ ឈ្មួញធ្វើការនាំចេញ-ចូលច្រើនជាងមុន។ វាផ្ដល់ផលចំណេញទាំងឈ្មួញ និងប្រជាជន ព្រោះថាបើពន្ធអត់យក ឈ្មួញអាចទុកប្រាក់ដែលត្រូវបង់ពន្ធជាផលចំណេញរបស់ពួកគាត់ ហើយម្យ៉ាងទៀតតម្លៃទំនិញក៏ថោកជាងមុន ដែលផ្ដល់ប្រយោជន៍សម្រាប់អ្នកប្រើប្រាស់»។
ទំហំពាណិជ្ជកម្មប្រទេសទាំងពីរមានតម្លៃ ៧៨០លានដុល្លារ ក្នុងឆមាសទី១ឆ្នាំនេះ ដោយការនាំចេញរបស់វៀតណាមមកកាន់កម្ពុជាមានចំនួន ៦៨៤លានដុល្លារ ខណៈកម្ពុជានាំចេញទៅវៀតណាមក្នុងទឹកប្រាក់ ៩៦លានដុល្លារ។ ដោយឡែក កាលពីឆ្នាំ២០១៥ ប្រទេសទាំងពីរសម្រេចបានទំហំពាណិជ្ជកម្មចំនួន ១១១២លានដុល្លារ។ នេះបើតាមរបាយការណ៍របស់ក្រសួងពាណិជ្ជកម្ម៕
Tag:
ពន្ធ
សឿង សុផារី
© រក្សាសិទ្ធិដោយ thmeythmey.com
