ជាតិ
សេដ្ឋកិច្ច
ធនាគារពិភពលោក ថា បរិយាកាសពាណិជ្ជកម្មនៅកម្ពុជានឹងប្រសើរជាងមុន នៅឆ្នាំ២០១៧
× ភ្នំពេញ៖ ធនាគារពិភពលោក ( World Bank) បានវាយតម្លៃបរិយាកាសពាណិជ្ជកម្មប្រទេសចំនួន ១៩០ ដោយកម្ពុជាត្រូវបានផ្ដល់ចំណាត់ថ្នាក់ទី ១២៨នៅឆ្នាំ២០១៦ និងទី ១៣១នៅឆ្នាំ២០១៧ ។ បើទោះចំណាត់ថ្នាក់របស់កម្ពុជាខ្ពស់ជាងមុននៅឆ្នាំខាងមុខ ប៉ុន្តែកម្ពុជាទទួលបានពិន្ទុកើនឡើងបន្តិច ពោលគឺពី ៥៤,៥៤ ដល់ ៥៤,៧៩ ដែលបង្ហាញថាកម្ពុជាធ្វើឲ្យបរិយាកាសពាណិជ្ជកម្មរបស់ខ្លួនប្រសើរឡើងតិចតួច នៅឆ្នាំ២០១៧ ។ នេះបើតាមសេចក្ដីប្រកាសព័ត៌មានរបស់ World Bank នៅថ្ងៃទី២៦ខែតុលា។
ការវាយតម្លៃផ្ដល់ចំណាត់ថ្នាក់ និងពិន្ទុរបស់ World Bank គឺផ្អែកលើ ១០ ចំណុច រួមមាន៖ នីតិវិធីចាប់ផ្ដើមធុរកិច្ច, ការទទួលបានថាមពលអគ្គិសនី, ចុះបញ្ជីទ្រព្យសម្បត្តិ, ព័ត៌មានឥណទាន, ការបង់ពន្ធ, ការជួញដូរឆ្លងព្រំដែន, ការអនុញ្ញាតសាងសង់, ការពារពាណិជ្ជករ-អាជីវករនៃក្រុមភាគតិច, ពង្រឹងការអនុវត្តកិច្ចសន្យា និងការដោះស្រាយលើបំណុល។ ក្នុងនោះការទទួលព័ត៌មានឥណទាន ដែលផ្ដល់ដោយការិយាល័យឥណទាន ( Credit bureau) ត្រូវបាន World Bank ផ្ដល់ពិន្ទុខ្ពស់ជាងចំណុចផ្សេងទៀតគឺដល់ទៅ ៨៥ ខណៈការពង្រឹងការអនុវត្តកិច្ចសន្យាបានតែ ៣៣ពិន្ទុលើ១០០ពិន្ទុ។
ធនាគារពិភពលោក អះអាងថា ការកែលម្អលើវិស័យឥណទាននេះ បានបង្កភាពងាយស្រួលកាន់តែប្រសើរដល់អាជីវករខ្នាតតូចក្នុងប្រទេសដែលមានប្រវត្តិហិរញ្ញវត្ថុល្អ ក្នុងការទទួលបានឥណទាន។ បើតាម World Bank កម្ពុជាឈរនៅលេខរៀងប្រសើជាងតែទៅលើប្រទេសឡាវ និងប្រទេសមីយ៉ានម៉ា ក្នុងតំបន់អាស៊ាន លើការសម្រួលបរិយាកាសធ្វើធុរកិច្ច។
សេចក្ដីប្រកាសព័ត៌មាន ដែល World Bank បានផ្ដល់អនុសាសន៍ដូច្នេះថា៖«ដើម្បីបោះជំហ៊ានទៅមុខ កម្ពុជាចាំបាច់ត្រូវធ្វើឲ្យការចាប់ផ្ដើមអាជីកម្មកាន់តែមានភាពងាយស្រួលនិងកាន់តែឆាប់រហ័ស តាមរយៈការកាត់បន្ថយពេលវេលាចុះបញ្ជី និងមិនចាំបាច់តម្រូវឲ្យមានភស្តុតាងបញ្ជាក់អំពីទុនដែលបានដាក់តម្កល់ ក្រោយចុះបញ្ជីទេ»។
លោកស្រី អ៊ីហ្គូណា ដូប្រាចា ប្រធានគ្រប់គ្រងរបស់ World Bank ប្រចាំនៅកម្ពុជា ថ្លែងដូច្នេះថា៖«កម្ពុជាបាននិងកំពុងមានការរីកចម្រើនក្នុងការជំរុញឲ្យមានបរិយាកាសពាណិជ្ជកម្មកាន់តែល្អប្រសើរជាងមុន។ កំណែទម្រង់នានាដែលកម្ពុជាកំពុងធ្វើ គឺជួយបង្កើតឲ្យមានសេដ្ឋកិច្ចរស់រវើក ដែលវានឹងជួយបង្កើននូវក្ដីសង្ឃឹមសម្រាប់ពលរដ្ឋជាច្រើន និងជួយពួកគេចាកផុតពីភាពក្រីក្រ»៕
Tag:
ធនាគារពិភពលោក
World Bank
ពាណិជ្ជកម្ម
© រក្សាសិទ្ធិដោយ thmeythmey.com