អន្តរជាតិ
មន្ត្រីជាន់ខ្ពស់UN ៖ «ឈប់បង្ហូរឈាមជនជាតិស៊ីរីទៅ!» កុមារស៊ីរី ក្នុងទីក្រុង Aleppo (រូបភាព UN)
× មន្ត្រីជាន់ខ្ពស់អង្គការសហប្រជាជាតិទទួលបន្ទុកមនុស្សធម៌ បានអំពាវនាវទៅកាន់សមាជិកទាំង១៥ប្រទេសនៃក្រុមប្រឹក្សាសន្តិសុខអង្គការសហប្រជាជាតិ ឲ្យចាត់វិធានការបន្ទាន់ដើម្បីបញ្ចប់ជម្លោះបង្ហូរឈាមនៅស៊ីរី។ មកទល់ពេលនេះ មហាអំណាចនៅបន្តខ្វែងគំនិតគ្នានៅឡើយជុំវិញដំណោះស្រាយសម្រាប់ស៊ីរី ខណៈដែលឈាមជនជាតិស៊ីរីនៅតែបន្តហូរនៅឡើយ។
លោក Stephen O’Brien អ្នកសម្របសម្រួលផ្នែកជំនួយបន្ទាន់របស់អង្គការសហប្រជាជាតិ បានទទូចសមាជិកទាំង១៥នៃក្រុមប្រឹក្សាសន្តិសុខ បញ្ឈប់ការប្រយុទ្ធបង្ហូរឈាមនៅស៊ីរី។ លោកបានប្រាប់សមាជិកក្រុមប្រឹក្សាសន្តិសុខថា ចាប់តាំងលោកជួបជាមួយក្រុមប្រឹក្សានៅថ្ងៃទី២៩ ខែកញ្ញាមក ជនជាតិស៊ីរីច្រើនជាង៤០០នាក់ ត្រូវបានសម្លាប់ និងជាងពីរពាន់នាក់របួសក្នុងការប្រយុទ្ធគ្នានៅក្រុង Aleppo។
«ពួកគេក៏ជាមនុស្សដូចជាយើងដែរ។ ប៉ុន្តែពួកគេមិនបានអង្គុយនៅ New York ដូចយើងឡើយ។ ពួកគេធ្លាក់ទៅក្នុងភាពអស់សង្ឃឹម រងគ្រោះគួរឲ្យកំសត់ ហើយទាំងប្រជាជននិងប្រទេសស៊ីរីទាំងមូល ត្រូវបានបំផ្លាញ»។ នេះជាការរៀបរាប់ពីទុក្ខវេទនារបស់ប្រជាជនស៊ីរីដោយលោក Stephen O’Brien ទៅកាន់កិច្ចប្រជុំក្រុមប្រឹក្សាសន្តិសុខនៅថ្ងៃទី២៦ ខែតុលា ដែលទាំងអាមេរិក និងរុស្សីមានវត្តមានផងដែរ។
ក្រៅពីលើកឡើងពីការលំបាករបស់ប្រជាជនស៊ីរី មន្ត្រីជាន់ខ្ពស់រូបនេះក៏អំពាវនាវឲ្យស្ថាប័នដ៏មានឥទ្ធិពលនេះ មានចំណាត់រក្សាសន្តិភាពនិងសន្តិសុខអន្តរជាតិ ដោយរួមបញ្ចូលទាំងការធ្វើសកម្មភាពគ្រប់យ៉ាងដើម្បីកុំឲ្យ «ឈាមជនជាតិស៊ីរី» បន្តហូរទៀត។ លោកក៏បានរៀបរាប់ពីស្ថានភាពមនុស្សធម៌យ៉ាងអាក្រក់ដែលកំពុងកើតឡើងនៅទីក្រុង Aleppo ដែលមិនទទួលបានជំនួយជិតបួនខែមកហើយនោះ។
លោក Stephen O’Brien ប្រាប់តំណាងសមាជិកទាំង១៥ប្រទេសថា៖ «អំណាចស្ថិតក្នុងដៃរបស់អ្នកដើម្បីបញ្ឈប់រឿងនេះ។ ប្រសិនបើមិនចាត់វិធានការទេ ប្រជាជនស៊ីរីនឹងមិនមានទៀតឡើយ ហើយស៊ីរីក៏បាត់បង់ដែរ ហើយវានឹងក្លាយជាមរតកគួរឲ្យអាម៉ាសរបស់ក្រុមប្រឹក្សាសន្តិសុខ និងមនុស្សជំនាន់ក្រោយផងដែរ»។
សូមបញ្ជាក់ដែរថា មកទល់ពេលនេះ ការវាយប្រយុទ្ធរវាងកងកម្លាំងរដ្ឋាភិបាល និងក្រុមឧទ្ទាម នៅតែបន្តជាពិសេសនៅទីក្រុង Aleppo។ អាមេរិកបានប្រកាសថា យន្តហោះចម្បាំងរបស់រដ្ឋាភិបាលលោក អាសាដ និងយន្តហោះចម្បាំងរុស្សីដែលគាំទ្រលោក អាសាដ បន្តទម្លាក់គ្រាប់បែកលើមូលដ្ឋានក្រុមឧទ្ទាម ហើយជាញឹកញយនោះ គ្រាប់បែកទាំងនោះ ធ្លាក់ចំផ្ទះប្រជាជន និងសាលារៀន ឬមន្ទីរពេទ្យ ដែលសម្លាប់ប្រជាជនស៊ីរី ជាពិសេសកុមារអស់ជាច្រើនរៀងរាល់ថ្ងៃ៕
© រក្សាសិទ្ធិដោយ thmeythmey.com