កីឡាអន្តរជាតិ
អន្តរជាតិ
AFC ពិន័យកីឡាករឡាវបួននាក់មិនឲ្យលេង៦០ថ្ងៃ ព្រោះកំណត់លទ្ធផលទុកមុន
× កីឡាករបាល់ទាត់បួននាក់នៃក្រុមជម្រើសជាតិឡាវ ត្រូវសហព័ន្ធកីឡាបាល់ទាត់ទ្វីបអាស៊ី (AFC) ហាមចូលរួមការប្រកួតចំនួន៦០ថ្ងៃ ក្រោយរកឃើញថា ជាប់ពាក់ព័ន្ធនឹងការកំណត់លទ្ធផលប្រកួតទុកមុន។ កីឡាករបាល់ទាត់ឡាវទាំងបួននាក់ ត្រូវសង្ស័យថា បានរៀបចំលទ្ធផលប្រកួត អំឡុងពេលការប្រកួតពានរង្វាន់ AFC Solidarity Cup 2016 នៅម៉ាឡេស៊ី និងការប្រកួតផ្សេងទៀតតាំងពីឆ្នាំ២០១០មក។
អនុប្រធានគណៈកម្មាធិការវិន័យនៃសហព័ន្ធកីឡាបាល់ទាត់ទ្វីអាស៊ី (AFC) បានដាក់ពិន័យកីឡាករបាលទាត់ជម្រើសឡាវបួននាក់ មិនឲ្យចូលលេង៦០ថ្ងៃ ព្រោះធ្វើខុសវិន័យ និងក្រមសីលធម៌របស់សហព័ន្ធ ទាក់ទងនឹងការកំណត់លទ្ធផលទុកមុន។ នេះបើយោងតាមការសម្រេចរបស់ AFC ដែលបានចេញផ្សាយលើគេហទំព័ររបស់ខ្លួន។
កីឡាករជម្រើសជាតិឡាវទាំងបួនដែលត្រូវព្យួរមាន Saynakhonevieng Phommapanya, Chintana Souksavath, Moukda Souksavath និង Phatthana Syvilay។ ពួកគេទាំងបួន កំពុងចូលរួមប្រកួត AFC Solidary 2016 ដែលមានម៉ាឡាស៊ីជាម្ចាស់ផ្ទះ។ ប៉ុន្តែអនុប្រធានគណៈកម្មាធិការវិន័យរបស់ AFC នៅថ្ងៃទី៥ ខែវិច្ឆិកា បានសម្រេចព្យួរឈ្មោះពួកគេជាបណ្ដោះអាសន្នសិន ដោយបារម្ភថា វត្តមានរបស់ពួកគេ អាចប៉ះពាល់ដល់ការប្រកួត។
សេចក្ដីសម្រេចរបស់ AFC បន្តថា ការសម្រេចព្យួរនេះ មិនត្រឹមតែជាប់ពាក់ព័ន្ធនឹងព្រឹត្តការណ៍នៅម៉ាឡេស៊ីឡើយ ប៉ុន្តែក៏ជាប់សង្ស័យលើការកំណត់លទ្ធផលពីសំណាក់ក្រុមតំណាងឲ្យឡាវ តាំងពីឆ្នាំ២០១០មកផងដែរ។ ខណៈនេះ ការស៊ើបអង្កេតកំពុងតែធ្វើឡើង ដោយមានការចូលរួមពីសហព័ន្ធកីឡាបាល់ទាត់អន្តរជាតិ (FIFA) ហើយអាចនឹងមានកីឡាករមួយចំនួនទៀត ត្រូវដាក់ក្រោមការស៊ើបអង្កេតដែរ៕
© រក្សាសិទ្ធិដោយ thmeythmey.com