សិល្បករនិងសង្គមស៊ីវិលថា តុលាការ មិនត្រូវឲ្យបុរស ដែលវាយកញ្ញា អាវីហ្សា រួចខ្លួនឡើយ

ជាតិ

សិល្បករនិងសង្គមស៊ីវិលថា តុលាការ មិនត្រូវឲ្យបុរស ដែលវាយកញ្ញា អាវីហ្សា រួចខ្លួនឡើយ

16, Nov 2016 , 3:49 pm

រូបភាព

ដោយ: ម៉ៅ សុផា

ភ្នំពេញ៖ សិល្បករ និងក្រុមសង្គមស៊ីវិល ធ្វើការលើកស្ទួយសិទ្ធិស្ត្រី មិនអាចទទួលយកបានទេ ចំពោះអំពើហិង្សារបស់លោក គៀង ហេង ដែលវាយដំកញ្ញា ពេជ្រ អាវីហ្សា ជាតារាសម្តែង ឲ្យរងរបួសលើផ្ទៃមុខយ៉ាងធ្ងន់ធ្ងរ។ ពួកគេ ស្នើឲ្យតុលាការ ដាក់ទោសទណ្ឌលើលោក គៀង ហេង ដែលជាប្អូនថ្លៃរបស់ឧកញ៉ា ទ្រី ភាព និងជាអតីតសង្សាររបស់កញ្ញា ពេជ្រ អាវីហ្សា ទៅតាមផ្លូវច្បាប់។

លោកស្រី រស់ សុភាព ប្រធានអង្គការ យេនឌ័រ និងអភិវឌ្ឍន៍ ដើម្បីកម្ពុជា (GADC) បានលើកឡើងថា ការប្រើអំពើហិង្សាលើកញ្ញា អាវីហ្សា ដែលជាតារាសម្តែង គឺជារឿងខុសច្បាប់ និងខុសសីលធម៌សង្គមយ៉ាងធ្ងន់ធ្ងរ។ លោកស្រី រស់ សុភាព មិនរៀបរាប់ពីមូលហេតុ ដែលនាំឲ្យកើតអំពើហិង្សានោះទេ តែលោកស្រី បញ្ជាក់ថា ទោះបីស្ថិតក្នុងស្ថានភាពណាក៏ដោយ ក៏បុរសមិនត្រូវប្រើអំពើហិង្សាលើសព៌ាង្គកាយរបស់ស្រី្តជាដាច់ខាត។

លោកស្រី បន្តថា ទង្វើរបស់លោក គៀង ហេង ដែលជាប្អូនថ្លៃរបស់ឧកញ៉ា ទ្រី ភាព ហើយក៏ជាអតីតសង្សាររបស់កញ្ញា អាវីហ្សាដែរនោះ មិនត្រឹមតែជាអំពើលើ្មសច្បាប់ និងខុសសីលធម៌សង្គមប៉ុណ្ណោះទេ តែថែមទាំង ប៉ះពាល់ដល់ផែនការជាតិ ដែលរដ្ឋាភិបាល ដាក់ចេញនូវគោលនយោបាយ ក្នុងការប្រឆាំងនឹងការប្រើអំពើហិង្សាលើស្ត្រីទៀតផង។

ប្រធានអង្គការ ដែលធ្វើការលើកស្ទួយសិទ្ធិស្ត្រីរូបនេះ បានសង្កត់ធ្ងន់ៗបែបនេះថា៖«យើង មិនអាចរំលោភបំពានលើស្ត្រីបានទេ។ យើងត្រូវតែលុបបំបាត់អំពើហិង្សាលើស្ត្រី។ យើង មិនត្រូវអនុគ្រោះ ឬបណ្តោយឲ្យអ្នកប្រព្រឹត្ត រួចទោសឡើយ»។

លោកស្រី រស់ សុភាព ទទូចឲ្យសមត្ថកិច្ច និងតុលាការ ព្រមទាំងក្រសួងកិច្ចការនារី គិតគូរនិងទទួលខុសត្រូវក្នុងរឿងនេះ។ លោកស្រី បានផ្តោតខ្លាំងទៅលើក្រសួងកិច្ចការនារីថា មានតួនាទីយ៉ាងសំខាន់ ក្នុងការការពារស្ត្រី ដូច្នេះក្រសួងមួយនេះ មិនត្រូវព្រងើយកន្តើយ ឬនៅស្ងៀម ចំពោះករណីរបស់កញ្ញា អាវីហ្សា ឡើយ។

ជាងនេះទៀត លោកស្រី រស់ សុភាព ដូចជាមិនចង់ឲ្យកញ្ញា អាវីហ្សា សម្របសម្រួលជាមួយនឹងលោក គៀង ហេងនោះទេ។ លោកស្រី ព្រួយបារម្ភថា ប្រសិនបើ កញ្ញា អាវីហ្សា ទទួលយកសំណងពីលោក គៀង ហេង សំណុំរឿងខាងលើ អាចនឹងត្រូវបានបិទបញ្ចប់ ដូចនឹងសំណុំរឿងរបស់កញ្ញា ឯក សុជាតា ហៅសាលា ជាមួយនឹងលោក សុខ ប៊ុន ដែរ។

លោកស្រី បានរម្លឹកថា ក្រោយកញ្ញា សាសា ដែលជាអតីតពិធីការិនីនៃទូរទស្សន៍CTN សុខចិត្ត សម្របសម្រួល ជាមួយលោក សុខ ប៊ុន សំណុំរឿង ក៏ចាប់ផ្តើមស្ងៀមស្ងាត់បន្តិចម្តងៗ រហូតដល់បច្ចុប្បន្ន។ លោក សុខ ប៊ុន ដែលមានងារជាឧកញ៉ា បានវាយដំលើកញ្ញាសាសា រហូតបណ្តាលឲ្យអតីតពិធីការិនីនៃទូរទស្សន៍ CTN រូបនេះ រងរបួសយ៉ាងធ្ងន់ធ្ងរ នៅមជ្ឈមណ្ឌលកោះពេជ្រ កាលពីខែ កក្កដា ឆ្នាំ២០១៥។

លោកស្រី រស់ សុភាព យល់ឃើញថា ប្រសិនបើ ជនរងគ្រោះ គិតតែពីសម្របសម្រួល ឬទទួលយកសំណងបែបនេះ អ្នកដែលមានលុយនិងមានអំណាច រឹតតែមិនខ្លាចច្បាប់ ហើយកាន់តែផ្គើនឡើងៗ ក្នុងការប្រព្រឹត្តអំពើហិង្សាលើស្ត្រី។

ចំណែកឯ លោកស្រី ចាន់ គន្ធា មន្ត្រីសម្របសម្រួលផ្នែកកម្មវិធីថ្នាក់តំបន់អាស៊ីអាគ្នេហ៍ (JASS) ដែលធ្វើការពាក់ព័ន្ធនឹងសិទ្ធិស្ត្រីដែរនោះ បានអះអាងថា សំណុំរឿងខាងលើ គឺជាបទល្មើសព្រហ្មទណ្ឌផង និងជាបទល្មើសរដ្ឋប្បវេណីផង។ លោកស្រី សង្កត់ធ្ងន់ថា បើទោះបីជា កញ្ញា អាវីហ្សា ទទួលយកសំណងក៏ដោយ តែបណ្តឹងអាជ្ញា មិនរលត់ទេ។

លោកស្រី ចាន់ គន្ធា ពន្យល់ថា តាមផ្លូវច្បាប់ ព្រះរាជអាជ្ញា ដែលដើរតួនាទីជាដើមបណ្តឹង ត្រូវតែចាត់ការរឿងនេះ ឲ្យបានម៉ត់ចត់ ដើម្បីផ្តល់យុត្តិធម៌ដល់ជនរងគ្រោះ។ លោកស្រី បញ្ជាក់ដូច្នេះថា៖«មិនមែនគ្រាន់តែឲ្យលុយហើយ ចប់នោះទេ។ បើធ្វើអ៊ីចឹង បញ្ហានឹងកើតឡើងដដែលៗ។ ការទទួលយកសំណង ជារឿងដោយឡែក តែរឿង ព្រហ្មទណ្ឌនៅតែបន្ត»។

កន្លងមក មន្ត្រីសង្គមស៊ីវិលរូបនេះ ធ្លាប់សង្កេតឃើញថា ពេលជនរងគ្រោះ ទទួលយកសំណងរួចហើយ សំណុំរឿងក៏ត្រូវបិទបញ្ចប់។ លោកស្រី បន្ថែមទៀតថា តុលាការ និងអាជ្ញាធរមានសមត្ថកិច្ច ត្រូវតែអនុវត្តច្បាប់ ដោយស្មើភាពគ្នា ដើម្បីឲ្យអ្នកប្រព្រឹត្ត រាងចាល។

យ៉ាងណា លោកស្រី រស់ សុភាព និងលោកស្រី ចាន់ គន្ធា មិនទាន់មានសកម្មភាពណាមួយ ដើម្បីប្រឆាំងនឹងទង្វើរបស់លោក គៀង ហេង នៅឡើយទេ។ ស្រី្តទាំងពីរខាងលើ ដែលធ្វើការលើកស្ទួយសិទ្ធិស្ត្រី អះអាងដូចគ្នាថា នឹងបន្តតាមដានរឿងរ៉ាវរបស់កញ្ញា អាវីហ្សា ហើយបន្ទាប់មក អាចនឹងជជែកគ្នាក្នុងការស្ថាប័នរបស់ខ្លួន មុននឹងសម្រេចថា ត្រូវជួយជ្រោមជ្រែង ដល់កញ្ញា អាវីហ្សា ដោយរបៀបណា។

ទាក់ទងនឹងបញ្ហានេះ កញ្ញា ពេជ្រ អាវីហ្សា ដែលជាជនរងគ្រោះ មិនបានរៀបរាប់ច្រើន ដល់សារព័ត៌មានថ្មីៗនោះទេ ដោយសារតែកញ្ញា កំពុងតែជាប់រវល់។ កញ្ញា គ្រាន់តែបញ្ជាក់យ៉ាងខ្លីថា ក្រោយរងអំពើហិង្សា សិល្បករ រួមទាំងមន្ត្រីសង្គមស៊ីវិលមួយចំនួន បានហៅទូរសព្ទទៅកាន់នាង ដើម្បីលើកទឹកចិត្ត និងបង្ហាញពីការឈឺឆ្អាល ចំពោះនាង។

ម្យ៉ាងទៀត ជុំវិញការសម្របសម្រួលជាមួយលោក គៀង ហេង កញ្ញា អាវីហ្សា មិនទាន់សម្រេច យ៉ាងណានោះទេ។ កញ្ញា បញ្ជាក់បែបនេះថា៖«ខ្ញុំអត់ដឹងទេ (រឿងទទួលយកសំណង)។ ចាំខ្ញុំពិភាក្សាជាមួយមេធាវីរបស់ខ្ញុំសិន ទើបខ្ញុំដឹងថាត្រូវសម្រេចយ៉ាងម៉េច»។

ដោយលែក លោក សុះ ម៉ាច តារាចម្រៀង និងជាប្រធានសមាគមសិល្បករខ្មែរ បានអះអាងថា លោក រួមទាំងសិល្បករដទៃទៀត ត្រៀមខ្លួនជានិច្ច ដើម្បីជួយជ្រោមជ្រែង កញ្ញា អាវីហ្សា។ លោក សង្កត់ធ្ងន់ថា សមាគម នឹងផ្តល់មេធាវី ដើម្បីការពារក្តីឲ្យកញ្ញា អាវីហ្សា ប្រសិនបើកញ្ញា អាវីហ្សា ដាក់ពាក្យប្តឹងទៅតុលាការ ហើយត្រូវការមេធាវី។

តារាចម្រៀងខាងមនោសញ្ចេតនារូបនេះ បានបង្ហាញទឹកចិត្តឈឺឆ្អាលដូច្នេះថា៖«ក្នុងនាមយើងជាសិល្បករដូចគ្នា យើងចាំជួយកញ្ញា អាវីហ្សា ជានិច្ច។ សមាគមយើង មានមេធាវី ដើម្បីឲ្យកញ្ញា អាវីហ្សា បើកញ្ញា អាវីហ្សា ត្រូវការ»។

ក្រៅពីអះអាងក្នុងការផ្តល់ជំនួយផ្លូវច្បាប់ដល់កញ្ញា អាវីហ្សា លោក សុះ ម៉ាច ក៏បានរិះគន់ថា ទង្វើរបស់លោក គៀង ហេង បានធ្វើឲ្យតម្លៃសង្គម ធ្លាក់ចុះយ៉ាងខ្លាំង និងធ្វើឲ្យបាត់បង់តម្លៃជាបុរស ផងដែរ។ លោក បញ្ជាក់ចុងក្រោយថា បើតុលាការ មិនដាក់ទោសអ្នកប្រព្រឹត្ត ទៅតាមផ្លូច្បាប់ទេ អំពើហិង្សាលើស្រី្ត នៅតែកើតមានជាបន្តបន្ទាប់។

នៅថ្ងៃនេះសារព័ត៌មានថ្មីៗ នៅមិនទាន់អាចទាក់ទងសុំការបកស្រាយពីលោក គៀង ហេង បានទេ។ យ៉ាងណា លោក ទ្រី ភាព បានចេញមុខបកស្រាយនៅលើទំព័រហ្វេសប៊ុកក្រុមហ៊ុនរបស់លោកឈ្មោះ TRY PHEAP GROUP CO.,LTD ថា លោក គៀង ហេង មានជាប់សាច់ញាតិខាងប្រពន្ធរបស់លោកខ្លះៗ ហើយលោកប្រកាសឲ្យតុលាការធ្វើការតាមនីតិវិធីចាត់ការទៅលើជនដែលប្រព្រឹត្ត ព្រោះវាមិនពាក់ព័ន្ធជាមួយរូបលោកឡើយ។ លោក ទ្រី ភាព ក៏ស្នើឲ្យអ្នកប្រើប្រាសបណ្តាញសង្គមហ្វេសប៊ុកទាំងអស់ កុំភ្ជាប់ករណីហិង្សានេះជាមួយនឹងរូបលោក ព្រោះវាជារឿងបុគ្គលផ្ទាល់ខ្លួន។

អ្នកនាំពាក្យក្រសួងយុត្តិធម៌ លោក គឹម សន្តិភាព បានបរិយាយលើទំព័ហ្វេសប៊ុកលោកនៅថ្ងៃនេះថា ករណីបង្កហិង្សាប៉ុន្មានថ្ងៃមកនេះ(លើកញ្ញា អាវីហ្សា) គឺជាករណីព្រហ្មទណ្ឌ ដែលស្ថាប័នអយ្យការ និងស្ថាប័នមានសមត្ថកិច្ចពាក់ព័ន្ធ កំពុងចាត់វិធានការស៊ើបអង្កេតយ៉ាងយកចិត្តទុកដាក់ ដើម្បីឈានដល់ការផ្តន្ទាទោសជនល្មើសតាមច្បាប់។ លោក បញ្ជាក់ថា ការសម្របសម្រួលសំណងជាផ្នែកមួយនៃដំណោះស្រាយផ្ទាល់រវាងភាគីរងគ្រោះ តែពុំអាចផ្អាកឬបញ្ចប់នីតិវិធីក្នុងសំណុំរឿងព្រហ្មទណ្ឌបាននោះទេ។

សូមរម្លឹកថា កញ្ញា អាវីហ្សា ត្រូវបានលោក គៀង ហេង ដែលជាអតីតសង្សាររបស់នាង វាយដំនៅក្លឹបកម្សាន្តមួយ ក្នុងខេត្តព្រះសីហនុ កាលពីថ្ងៃទី១៣ ខែវិច្ឆិកា ឆ្នាំ២០១៦។ ការវាយដំនេះ បណ្តាលឲ្យកញ្ញា អាវីហ្សា រងរបួសយ៉ាងធ្ងន់ធ្ងរ នៅលើផ្ទៃមុខ។ ក្រោយរងអំពើហិង្សា តារាសម្តែងរូបនេះ ក៏ទម្លាយហេតុការណ៍ទាំងអម្បាលម៉ាន នៅតាមបណ្តាញសង្គមហ្វេសប៊ុក តែម្តង៕