ក្រៅពីចិន និងជប៉ុន រុស្សី ក៍ជួយទិញ បន្លែ ផ្លែឈើពីហ្វីលីពីនក្នុងតម្លៃរាប់លានដុល្លារផងដែរ

អន្តរជាតិ

ក្រៅពីចិន និងជប៉ុន រុស្សី ក៍ជួយទិញ បន្លែ ផ្លែឈើពីហ្វីលីពីនក្នុងតម្លៃរាប់លានដុល្លារផងដែរ

22, Nov 2016 , 3:44 pm

រូបភាព

ដោយ: ថ្មីៗ

បើមិនមានការប្រែប្រួលនោះទេ ១ឆ្នាំទៀត ហ្វីលីពីន អាចនាំចេញផលិតផលកសិកម្មដែលរួមបន្លែ និងផ្លែឈើដែលមានតម្លៃជាងពីរពាន់លានដុល្លារទៅកាន់រុស្ស៊ីបានហើយ។ ពាណិជ្ជកម្មនេះ ត្រូវបានព្រមព្រៀងរវាងប្រធានាធិបតីរុស្ស៊ី និងប្រធានាធិបតីហ្វីលីពីន ក្នុងកិច្ចប្រជុំទ្វេភាគីលើកដំបូង នៅក្រៅនៃកិច្ចប្រជុំកំពូលសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកនៅក្នុងប្រទេសប៉េរូ។

រដ្ឋមន្ត្រីពាណិជ្ជកម្មហ្វីលីពីន Ramon Lopez នៅថ្ងៃទី២០ ខែវិច្ឆិកាកន្លងទៅ បានអះអាងថា រុស្ស៊ី បានប្តេជ្ញាក្នុងការទិញផ្លែឈើ ធញ្ញជាតិ ឬបន្លែ ពីហ្វីលីពីន ដែលមានតម្លៃប្រមាណ ២.៥ ពាន់លានដុល្លារ ក្នុងអំឡុងពេលនៃជំនួបទ្វេភាគីរវាងលោកប្រធានាធិបតី Vladimir Putin និង លោកប្រធានាធិបតី Rodrigo Duterte។ នេះបើយោងតាមសារព័ត៌មានហ្វីលីពីន Inquirer.net។

លោករដ្ឋមន្ត្រី បានបញ្ជាក់យ៉ាងដូច្នេះថា៖«ភាគីរុស្ស៊ី បានព្រមព្រៀងភ្លាមៗទៅលើសំណើនៃការនាំចូលផ្លែឈើ និងផលិតផលកសិកម្មផ្សេងទៀតរបស់ហ្វីលីពីននៅក្នុងរយៈពេល១២ខែក្រោយ»។ នេះបើយោងតាមប្រភពព័ត៌មានដដែល ដែលបានបន្តទៀតថា លោករដ្ឋមន្ត្រីរូបនេះ ក៏បានបន្ថែមថា៖«យើង បានជជែកពីអ្វីដែលពួកគេអាចទិញពីយើង ជាពិសេសនោះ លើផលិតផលកសិកម្ម ប៉ុន្តែ យើងមិនទាន់បានកំណត់ច្បាស់នៅឡើយនោះទេ។ ប៉ុន្តែ ខ្ញុំ អាចដឹង ថា យើងអាចផ្គត់ផ្គង់ពួកគេនូវបរិមាណចេក និងស្វាយជាច្រើន»។

ការសន្យាទិញផលិតផលកសិកម្មហ្វីលីពីនដ៏ច្រើនលើសលប់របស់រុស្ស៊ី មានន័យថា ហ្វីលីពីន ទទួលបានទីផ្សារធំមួយបន្ថែមទៀតបន្ទាប់ពីចិន និងជប៉ុន។ ក្នុងដំណើរទស្សនកិច្ចផ្លូវការជាលើកដំបូងទៅកាន់ចិន និងជប៉ុន នៅខែមុខនេះ ប្រមុខហ្វីលីពីន ក៏បានចុះព្រមព្រៀងពាណិជ្ជកម្មជាមួយនឹងប្រទេសទាំងពីរ ក្នុងការនាំចេញផលិតផលកសិកម្មរបស់ខ្លូនទៅកាន់ប្រទេសទាំងពីរក្នុងតម្លៃរាប់លានផងដែរ៕