កំពូលកំពុងបើកសវនាការសំណុំរឿងលោក នី ចរិយា និងមន្ត្រីអាដហុក៤រូប

ជាតិ

កំពូលកំពុងបើកសវនាការសំណុំរឿងលោក នី ចរិយា និងមន្ត្រីអាដហុក៤រូប

23, Nov 2016 , 8:59 am

រូបភាព

ដោយ: ថ្មីៗ

ភ្នំពេញ៖ តុលាការកំពូល កំពុងបើកសវនាការជំនុំជម្រះលើបណ្តឹងសុំមោឃភាព នីតិវិធីរបស់សាលាដំបូងរាជធានីភ្នំពេញ ពាក់ព័ន្ធនឹងសំណុំរឿងលោក នី ចរិយា និងមន្ត្រីអាដហុក៤រូប នៅព្រឹកថ្ងៃទី២៣ ខែវិច្ឆិកានេះ។

លោកស្រី គិម សត្ថាវី ជាប្រធានក្រុមប្រឹក្សាជំនុំជម្រះ និងលោក ឈួន ចាន់ថា ជាតំណាងមហាអយ្យការ ។

កាលពីថ្ងៃទី២ ខែឧសភា ឆ្នាំ២០១៦ លោក នី ចរិយា អគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គជប) និងមន្ត្រីអាដហុកទាំង៤រូប គឺ លោក នី សុខា, លោក យី សុខសាន្ត, លោក ណៃ វង់ដា និងលោកស្រី លឹម មុន្នី ត្រូវបានតុលាការរាជធានីភ្នំពេញ សម្រេចបញ្ជូនខ្លួនទៅឃុំបណ្តោះអាសន្ន។ បើគិតមកដល់ពេលនេះ ពួកគាត់ទាំង៥ ជាប់ពន្ធនាគារ ជាង៧ខែហើយ។ បើតាមការចោទប្រកាន់របស់តុលាការជាន់ទាប អ្នកទាំង៥ខាងលើ សុទ្ធតែជាប់ពាក់ព័ន្ធនឹងរឿងរ៉ាវរបស់កញ្ញា ខុម ចាន់តារ៉ាទី ហៅស្រីមុំ ជាមួយឯកឧត្តម កឹម សុខា អនុប្រធានគណបក្សសង្គ្រោះជាតិ។

ក្រោយអ្នកទាំង៥ត្រូវបាននាំខ្លួនទៅកាន់ពន្ធនាគារ សហមេធាវី បានស្នើឲ្យតុលាការរាជធានីភ្នំពេញ ដោះលែងកូនក្តីរបស់ខ្លួន ឲ្យមានសេរីភាពឡើងវិញ។ ប៉ុន្តែតុលាការរាជធានីភ្នំពេញ បានច្រានចោលសំណើរបស់ក្រុមមេធាវីទាំងនោះ។ បន្ទាប់មក ក្រុមមេធាវី ក៏បានបន្តប្តឹងទៅកាន់សាលាឧទ្ធរណ៍ម្តងរួចទៅហើយ ដើម្បីជំទាស់នឹងសាលក្រមរបស់សាលារាជធានីភ្នំពេញ។ ជាអកុសល មេធាវីបានបរាជ័យជាលើកទី២ ដោយសារតែសាលាឧទ្ទរណ៍ យល់ស្របនឹងសេចក្តីសម្រេចរបស់តុលាការរាជធានីភ្នំពេញ។ នៅទីបំផុត ក្រុមមេធាវី ក៏បានប្តូរពី «ការប្តឹងសុំនៅក្រៅឃុំ» ទៅជា «ការប្តឹងសុំមោឃភាពនីតិវិធី» វិញ៕