អង្គជំនុំជម្រះតុលាការកំពូល សម្រេចឲ្យ នួន ជា និងខៀវ សំផន ជាប់គុកអស់មួយជីវិត

ខ្មែរក្រហម

ជាតិ

អង្គជំនុំជម្រះតុលាការកំពូល សម្រេចឲ្យ នួន ជា និងខៀវ សំផន ជាប់គុកអស់មួយជីវិត

23, Nov 2016 , 12:54 pm

រូបភាព

ដោយ: ថ្មីៗ

អង្គជំនុំជម្រះតុលាការកំពូល នៅព្រឹកថ្ងៃទី២៣ ខែវិច្ឆិកានេះ បានសម្រេចរក្សាការសម្រេចរបស់អង្គជំនុំជម្រះវិសាមញ្ញក្នុងតុលាការដំបូង លើបណ្តឹងសារទុក្ខលើមេដឹកនាំខ្មែរក្រហម គឺនួន ជា និងខៀវ សំផន។ សាលដីកាស្ថាពររបស់អង្គជំនុំជម្រះវិសាមញ្ញក្នុងតុលាការកំពូលនេះ មានន័យថា លោក នួន ជា និង ខៀវ សំផន ត្រូវជាប់ពន្ធនាគារអស់មួយជីវិត។

នៅថ្ងៃទី៧ ខែសីហា ឆ្នាំ២០១៤ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) រកឃើញថា ជនជាប់ចោទមានពិរុទ្ធភាពពីបទឧក្រិដ្ឋប្រឆាំងនឹងមនុស្សជាតិ និងបានផ្តន្ទាទោសដាក់ពន្ធនាគារជនជាប់ចោទទាំងពីរ អស់មួយជីវិត។ នួន ជា និងខៀវ សំផន បានប្តឹងសារទុក្ខនឹងសាលក្រមរបស់អង្គជំនុំជម្រះសាលាដំបូង ដោយម្នាក់ៗបានលើកឡើងទឡ្ហីករណ៍បណ្តឹងសារទុក្ខរៀងៗខ្លួន ចំនួន២២៣ និង១៤៨ ។ សហព្រះរាជអាជ្ញា ក៏បានដាក់ បណ្តឹងសារទុក្ខដោយកម្រិតត្រឹមតែការស្វែងរកដំណោះស្រាយ ទាក់ទងនឹងភាពអាចអនុវត្តបាននូវទម្រង់ពង្រីកបន្ថែមនៃសហឧក្រិដ្ឋកម្មរួម ដែលហៅថា «សហឧក្រិដ្ឋកម្មរួមទម្រង់ទី III» (JCE III) នៅចំពោះមុខ អ.វ.ត.ក។

សូមជម្រាបថា សំណុំរឿង០០២/០១ គឺជាការជំនុំជម្រះលើកទីមួយ នៃការជំនុំជម្រះយ៉ាងតិចពីរ ប្រឆាំងនឹងលោក ខៀវ សំផន ជាប្រមុខរដ្ឋនៃកម្ពុជាប្រជាធិបតេយ្យ និងលោក នួន ជា អតីតអនុលេខាបក្សកុម្មុយនីស្តកម្ពុជា។ បទចោទនៅក្នុងសំណុំរឿង ០០២/០១ គឺផ្តោតលើបទឧក្រិដ្ឋប្រឆាំងមនុស្សជាតិ ដែលរងការចោទប្រកាន់ក្នុងអំឡុងពេលជម្លៀសនៅទីក្រុងភ្នំពេញ ក្នុងខែមេសា ឆ្នាំ ១៩៧៥ និង ការផ្លាស់ទីដោយបង្ខំបន្តបន្ទាប់ពីតំបន់ដទៃទៀត រួមទាំង ការកាប់សម្លាប់ដែលរងការចោទប្រកាន់នៅទួលពោធិ៍ជ្រៃ ក្នុងខេត្តពោធិ៍សាត់៕