អន្តរជាតិ
ប្រេសិត UN៖ ការកាត់ទោសមេដឹកនាំខ្មែរក្រហម ជាសារសម្រាប់កូរ៉េខាងជើង លោក David Scheffer តំណាងអគ្គលេខាធិការអង្គការសហប្រជាជាតិសម្រាប់សាលាក្ដីខ្មែរក្រហម (ECCC)
× អង្គជំនុំជម្រះតុលាការកំពូលនៃសាលាក្ដីខ្មែរក្រហម នៅព្រឹកថ្ងៃទី២៣ ខែវិច្ឆិកា បានសម្រេចរក្សាការសម្រេចរបស់អង្គជំនុំជម្រះវិសាមញ្ញក្នុងតុលាការដំបូង លើបណ្តឹងសារទុក្ខលើមេដឹកនាំខ្មែរក្រហម គឺនួន ជា និងខៀវ សំផន ដែលនឹងត្រូវជាប់ពន្ធនាគារអស់មួយជីវិត។ ប្រេសិតអគ្គលេខាធិការអង្គការសហប្រជាជាតិ ចាត់ទុកការសម្រេចចិត្តនេះ គឺជាសារសម្រាប់មេដឹកនាំកូរ៉េខាងជើង និងមេដឹកនាំដទៃទៀតជុំវិញពិភពលោក។
អតីតមេដឹកនាំកម្ពុជាប្រជាធិបតេយ្យ គឺនួន ជា និងខៀវ សំផន នឹងនៅតែជាប់ពន្ធនាគារអស់មួយជីវិតដដែល បន្ទាប់ពីអង្គជំនុំជម្រះតុលាការកំពូលទាត់ចោលបណ្ដឹងសារទុក្ខរបស់ជនជាប់ចោទទាំងពីរ។ លោក David Scheffer តំណាងអគ្គលេខាធិការអង្គការសហប្រជាជាតិសម្រាប់សាលាក្ដីខ្មែរក្រហម (ECCC) និយាយថា ការកាត់ក្ដីទោសអតីតមេដឹកនាំខ្មែរក្រហម នួន ជា និងខៀវ សំផន ជាសារសម្រាប់មេដឹកនាំផ្ដាច់ការនៅលើពិភពលោក។
ដោយសំដៅដល់មេដឹកនាំទាំងឡាយដែលរួមទាំងមេដឹកនាំក្រុមរដ្ឋឥស្លាមដែរនោះ លោក David Scheffer ប្រាប់អ្នកសារព័ត៌មាននៅឯតុលាការថា៖ «អ្វីដែលកើតឡើងក្នុងតុលាការនៅថ្ងៃនេះ អាចនឹងធ្លាក់លើខ្លួនអ្នកវិញម្ដង។ ហើយថ្នាក់ដឹកនាំកូរ៉េខាងជើង ក៏គួរតែគិតពីការកាត់ក្ដីនៅថ្ងៃនេះដែរ ព្រោះយុត្តិធម៌អន្តរជាតិ នឹងមិនដកថយឡើយ និងធ្វើដំណើរឆ្ពោះទៅមុខរហូត»។ នេះបើយោងតាមការផ្សាយរបស់ទីភ្នាក់ងារព័ត៌មាន Reuters ។
ទាក់ទងនឹងកូរ៉េខាងជើងនេះ អង្គការសហប្រជាជាតិធ្លាប់បញ្ចេញរបាយការណ៍មួយ ដោយបានភ្ជាប់ឈ្មោះមេដឹកនាំកូរ៉េខាងជើង គីម ជុងអ៊ុន ទៅនឹងករណីរំលោភសិទ្ធិមនុស្សយ៉ាងធ្ងន់ធ្ងរ។ ករណីរំលោភសិទ្ធិមនុស្សនៅកូរ៉េខាងជើងនេះ គឺស្រដៀងនឹងអ្វីដែលកើតឡើងនៅកម្ពុជាអំឡុងពេលកាន់អំណាចរបស់ខ្មែរក្រហម ជាពិសេសលើករណីចាប់បង្ខំធ្វើការ និងការធ្វើទារុណកម្មជាដើម។
ជម្លោះនៅស៊ីរី ត្រូវគេពណ៌នាថា មានការរំលោភបំពានសិទ្ធិមនុស្សយ៉ាងធ្ងន់ធ្ងរ ដែលអាចចាត់ទុកជាឧក្រិដ្ឋកម្មសង្គ្រាមទៀតផង។ ចំណែកក្រុមជ្រុលនិយមរដ្ឋឥស្លាម ក៏បានប្រព្រឹត្តសកម្មភាពដែលស្ថិតក្រោមបទល្មើសប្រឆាំងមនុស្សជាតិផងដែរដូចជា ការសម្លាប់ជីវិត ការជួញដូរមនុស្សនិងការរំលោភបំពានផ្លូវភេទ ព្រមទាំងការបំផ្លាញសម្បត្តិវប្បធម៌មនុស្សជាតិផងដែរ។
សូមបញ្ជាក់ថា នៅថ្ងៃទី៧ ខែសីហា ឆ្នាំ២០១៤ អង្គជំនុំជម្រះវិសាមញ្ញក្នុងតុលាការកម្ពុជា (អ.វ.ត.ក) រកឃើញថា ជនជាប់ចោទ នួន ជា និងខៀវ សំផន មានពិរុទ្ធភាពពីបទឧក្រិដ្ឋប្រឆាំងនឹងមនុស្សជាតិ និងបានផ្តន្ទាទោសដាក់ពន្ធនាគារជនជាប់ចោទទាំងពីរ អស់មួយជីវិត។ ជនជាប់ទាំងពីរបានប្តឹងសារទុក្ខនឹងសាលក្រមរបស់អង្គជំនុំជម្រះសាលាដំបូង ដោយម្នាក់ៗបានលើកឡើងទឡ្ហីករណ៍បណ្តឹងសារទុក្ខរៀងខ្លួន តែត្រូវបដិសេធពេលនេះ៕
Tag:
UN
អ.វ.ត.ក.
នួន ជា
ខៀវ សំផន
David Scheffer
© រក្សាសិទ្ធិដោយ thmeythmey.com