អន្តរជាតិ
ការសិក្សានៅដាណឺម៉ាក៖ ចង់ឲ្យជីវិតរីករាយ ព្យាយាមឃ្លាតពីហ្វេសប៊ុកពេញ១សប្តាហ៍
× គ្មានហ្វេសប៊ុក គ្មានភាពរីករាយ? ការសិក្សាមួយរបស់វិទ្យាស្ថាន Happiness Research Institute ដែលមានមូលដ្ឋាននៅទីក្រុងកូប៉ិនហាក់ ប្រទេសដាណឺម៉ាក បានបង្ហាញលទ្ធផលខុសពីនេះ។ ក្រុមអ្នកស្រាវជ្រាវដាណឺម៉ាកដែលប្រទេសរីករាយជាងគេនៅលើពិភពលោក បានរកឃើញពីគុណវិបត្តិនៃការប្រើប្រាស់បណ្តាញសង្គម។
ការសិក្សារបស់វិទ្យាស្ថាន Happiness Research Institute លើមនុស្ស១០៩៥នាក់ ដែលរស់នៅក្នុងប្រទេសដាណឺម៉ាក បានបង្ហាញថា ៩៤ភាគរយ បានប្រើប្រាស់ហ្វេសប៊ុកជារៀងរាល់ថ្ងៃ។ ជាមួយគ្នានោះ ៨៦ភាគរយតែងតែឆែករកព័ត៌មាន (news feed)តាមហ្វេសប៊ុកជាប្រចាំ ៧៨ភាគរយចំណាយពេលយ៉ាងណាស់ជាង៣០នាទីក្នុង១ថ្ងៃលើហ្វេសប៊ុក ៦១ភាគរយចូលចិត្តចែករំលែករឿងរ៉ាវនៅលើហ្វេសប៊ុក ហើយ៦៩ភាគរយចូលចិត្តបង្ហោះរូបថតនានា។
បើទោះបីជា បណ្តាញសង្គមយក្សហ្វេសប៊ុក ជាប្រភពនៃការផ្តល់ព័ត៌មានដ៏អស្ចារ្យក៏ដោយ ប៉ុន្តែការសិក្សារបស់វិទ្យាស្ថានដាណឺម៉ាក ក៏បង្ហាញលទ្ធផលផងដែរថា ហ្វេសប៊ុកបានជិះឥទ្ធិពលអវិជ្ជមាន ជាពិសេសផ្នែកអារម្មណ៍របស់មនុស្សជាច្រើន។
ការសិក្សាផ្តោតលើមនុស្ស២ក្រុមពោលគឺក្រុមដែលប្រើហ្វេសប៊ុកជាប្រចាំ និងក្រុមដែលឃ្លាតឆ្ងាយពីហ្វេសប៊ុកពេញមួយសប្តាហ៍។ ជាលទ្ធផល បានបង្ហាញថា ក្រុមដែលឃ្លាតពីហ្វេសប៊ុក១សប្តាហ៍ មាន៨៨ភាគរយ ថារីករាយ ៨៤ភាគរយថាជីវិតមានន័យ និងមិនសូវមានកង្វល់។
អ្នកដែលសាកល្បងរស់នៅឆ្ងាយពីហ្វេសប៊ុកមួយសប្តាហ៍ បានអះអាង ពួកគេមិនត្រឹមតែមានអារម្មណ៍រីករាយក្នុងជីវិតនោះឡើយ ពួកគេថែមទាំងមានសកម្មភាពច្រើនក្នុងសង្គមពិតៗ។ ពួកគេមិនសូវមានកំហឹង ដូចក្រុមដែលនិយមលេងហ្វេសប៊ុកនោះឡើយ។
លោក Meik Wiking អគ្គនាយកវិទ្យាស្ថាន Happiness Research Institute បាននិយាយនៅក្នុងបទសម្ភាសមួយជាមួយកាសែត The Local ថា៖ «បើទោះបីជាមនុស្សមានភាពរីករាយខ្លាំងពេលឃ្លាតឆ្ងាយពីហ្វេសប៊ុកក៏ដោយ ប៉ុន្តែមនុស្សជាច្រើននៅតែបន្តប្រឡូក។ ដូចជាការជក់បារីយ៉ាងដូច្នេះដែរ យើងដឹងថា វាមិនល្អឡើយ ប៉ុន្តែមនុស្សនៅតែបន្តជក់ដដែល»៕
Tag:
ដាណឺម៉ាក
ហ្វេសប៊ុក
Happiness Research Institute
© រក្សាសិទ្ធិដោយ thmeythmey.com