អន្តរជាតិ
នយោបាយអន្តរជាតិ
UN ដាក់ទណ្ឌកម្មខ្លាំងមិនធ្លាប់មានលើកូរ៉េខាងជើង
×
ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃទី៣០ ខែវិច្ឆិកា បានអនុម័តដំណោះស្រាយថ្មីមួយទៀតដើម្បីដាក់ទណ្ឌកម្មប្រឆាំងរបបកុម្មុយនីស្តកូរ៉េខាងជើង ដែលសាកល្បងគ្រាប់នុយក្លេអ៊ែរ និងបាញ់រ៉ុក្កែតជាច្រើនលើក។ ទណ្ឌកម្មចុងក្រោយនេះ ត្រូវបានគេពណ៌នាថា ជាទណ្ឌកម្មខ្លាំងមិនធ្លាប់មាន ដោយបានសំដៅលើការនាំចេញធ្យូងថ្ម ដែលជាប្រភពហិរញ្ញវត្ថុដ៏ធំរបស់កូរ៉េខាងជើង។
ក្រោយការចរចាយ៉ាងតឹងតែងអស់ពេលជិតបីខែ ក្រុមប្រឹក្សាសន្តិសុខអង្គការសហប្រជាជាតិ បានបោះឆ្នោតជាឯកច្ឆន្ទដាក់ទណ្ឌកម្មខ្លាំងក្លាមួយ សំដៅកាត់ផ្ដាច់ប្រភពចំណូលកូរ៉េខាងជើង។ សមាជិកទាំង១៥ប្រទេស បានសម្រេចផ្ដាច់ការនាំចេញរបស់ធ្យូងថ្មរបស់កូរ៉េខាងជើងក្នុងបរិមាណធ្យូងថ្ម ៧.៥លានតោនសម្រាប់ឆ្នាំ២០១៧ ដែលមានតម្លៃប្រមាណ៤០០លានដុល្លារ។
ដំណោះស្រាយដាក់ទណ្ឌកម្មនេះ នាំមុខដោយសហរដ្ឋអាមេរិក និងត្រូវបានព្រមព្រៀងដោយសមាជិកទាំងអស់នៃក្រុមប្រឹក្សាសន្តិសុខ រួមទាំងចិនផងដែរ។ បើតាមទីភ្នាក់ងារព័ត៌មាន Reuters មិនត្រឹមតែហាមឃាត់លើការនាំចេញធ្យូងថ្មទេ អង្គធាតុលោហៈ ផ្សេងទៀតដូចជាទង់ដែង នីកែល ប្រាក់ ស័ង្កសី និងការលក់រូបចម្លាក់ ដែលជាផលិតផលនាំចេញរបស់កូរ៉េខាងជើង ក៏ត្រូវបានហាមឃាត់ដូចគ្នាដែរ។
អគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Samantha Power បង្ហាញជំនឿថា ទណ្ឌកម្មថ្មីនេះ នឹងទទួលបានផ្លែផ្កាមិនខាន។ លោកស្រីបន្តថា ជាការពិត ទណ្ឌកម្មនេះ នឹងមិនផ្ដល់ផលភ្លាមៗឡើយ តែដំណោះស្រាយមួយនេះ បានដាក់ទណ្ឌកម្មដែលមិនធ្លាប់មានលើកូរ៉េខាងជើង ដែលហ៊ានប្រឆាំងនឹងសេចក្ដីសម្រេចរបស់ក្រុមប្រឹក្សាសន្តិសុខ ហើយកូរ៉េខាងជើង នឹងខាតបង់ធ្ងន់ធ្ងរ។
លោកស្រី Samantha Power អះអាងថា ទណ្ឌកម្មថ្មីនេះ នឹងកាត់ផ្ដាច់ចំណូលប្រចាំឆ្នាំរបស់កូរ៉េខាងជើងក្នុងចំនួនយ៉ាងតិចណាស់ក៏៧០០លានដុល្លារដែរ។ កូរ៉េខាងជើង តែងប្រើប្រាស់លុយទាំងនោះលើកម្មវិធីនុយក្លេអ៊ែររបស់ខ្លួន បើទោះជាមានការហាមឃាត់ក៏ដោយ ខណៈប្រជាជនខ្លួនរាប់លាននាក់ កំពុងប្រឈមមុខបញ្ហាអត់ស្បៀង និងរងគ្រោះដោយសារគ្រោះធម្មជាតិជាដើម។
អ្វីដែលគួរឲ្យចាប់អារម្មណ៍នោះ ក្រុងប៉េកាំងដែលជាសម្ព័ន្ធមិត្ត និងជាអ្នកចូលធ្យូងថ្មធំជាងគេរបស់ក្រុងព្យុងយ៉ាង ក៏បានបោះឆ្នោតគាំទ្រទណ្ឌកម្មដ៏ខ្លាំងនេះដែរ។ នៅត្រឹម១០ខែក្នុងឆ្នាំ២០១៦ ចិននាំចូលធ្យូងពីកូរ៉េខាងជើងក្នុងបរិមាណ១៨,៦លានតោនឯណោះ។ យ៉ាងណាក្ដី ដើម្បីបំពេញមុខអន្តរជាតិ ចិនក៏បង្ខំចិត្តគាំទ្រដំណោះស្រាយថ្មីនេះ ទោះជាអាចប៉ះពាល់ប្រភពថាមពលខ្លួនក្ដី។
ទន្ទឹមនឹងការប្រឆាំងកម្មវិធីនុយក្លេអ៊ែររបស់កូរ៉េខាងជើង ចិនក៏បានចោទប្រកាន់អាមេរិក និងកូរ៉េខាងត្បូង ដែលតែងធ្វើឲ្យស្ថានការណ៍នៅឧបទ្វីបតានតឹង តាមរយៈការធ្វើសមយុទ្ធរួមគ្នាជាញឹកញយ។ មិនតែប៉ុណ្ណោះ ចិនក៏បានរិះគន់គម្រោងពង្រាយប្រព័ន្ធការពារអាកាសរបស់អាមេរិកនៅកូរ៉េខាងត្បូងផងដែរ៕
Tag:
UN
កូរ៉េខាងជើង
នុយក្លេអ៊ែរ
© រក្សាសិទ្ធិដោយ thmeythmey.com