អន្តរជាតិ
នយោបាយអន្តរជាតិ
ប្រធានាធិបតី ប៉ាក ហ្គឺនហេ មានពេល៥ខែដើម្បីចុះចេញ បើមិនចង់ត្រូវបោះឆ្នោតទម្លាក់
×
ខណៈដែលប្រធានាធិបតី ប៉ាក ហ្គឺនហេ កំពុងតស៊ូរឿងអាស្រូវ និងការទាមទារឲ្យចុះចេញពីតំណែង គណបក្សកាន់អំណាចកូរ៉េខាងត្បូង Saenuri បានទាមទារឲ្យលោកស្រីចុះចេញដោយខ្លួនឯងនៅត្រឹមខែមេសា ឆ្នាំ២០១៧ ។ បក្សកាន់អំណាច ទុកពេលឲ្យលោកស្រីមួយសប្ដាហ៍ដើម្បីសម្រេចចិត្តលើឱសានវាទនេះ បើមិនចង់ប្រឈមមុខនឹងការបោះឆ្នោតទម្លាក់នៅក្នុងសភាទេនោះ។
គណបក្ស Saenuri បានដកការទុកចិត្តលើលោកស្រី ប៉ាក ហ្គឺនហេ ដោយ បានទុកពេល៥ខែសម្រាប់ប្រធានាធិបតីរូបនេះ ដើម្បីលាលែងពីតំណែងប្រធានាធិបតី ដែលកំពុងរង្គោះរង្គើដោយសាររឿងអាស្រូវពុករលួយ។ នារយៈពេលចុងក្រោយ សមាជិកសភាជាច្រើនរូបមកបក្ស Saenuri ដែលជាបក្សកាន់អំណាច បានគាំទ្រគម្រោងរបស់បក្សប្រឆាំងក្នុងការបោះឆ្នោតទម្លាក់លោកស្រី ប៉ាក ហ្គឺនហេ ។
នៅក្នុងកិច្ចប្រជុំផ្ទៃក្នុង សមាជិកសភាបក្សកាន់អំណាច១២៨រូប បានសម្រេចជាឯកច្ឆន្ទទាមទារឲ្យលោកស្រី ប៉ាក ហ្គឺនហេ ចុះចេញនៅក្នុងខែមេសា ឆ្នាំ២០១៧ និងស្នើឲ្យបោះឆ្នោតប្រធានាធិបតីនៅខែមិថុនា ដែលលឿនជាងកាលបរិច្ឆេទដើមរយៈពេល៦ខែ ដែលគ្រោងធ្វើនៅខែកុម្ភៈ ឆ្នាំ២០១៨។ នេះបើយោងតាមការផ្សាយរបស់សារព័ត៌មាន Yonhap ដែលបានស្រង់សម្ដីលោក Chung Jin-Suk ប្រធានក្រុមសភាមតិភាគច្រើន។
លោក Chung Jin-Suk បន្តថា គណបក្សបានលៃលកពេលវេលាដែលសមរម្យបំផុត ដើម្បីធានាពីការផ្ទេរអំណាចដោយសន្តិវិធី រក្សាស្ថិរភាព និងទុកពេលឲ្យគណបក្សនយោបាយផ្សេងទៀត រៀបចំខ្លួនសម្រាប់ការបោះឆ្នោតខាងមុខ។ ហើយសមាជិកសភាបក្សកាន់អំណាចទាំងអស់ ក៏បានព្រមព្រៀងលើពេលវេលាផងដែរ។
នៅពេលនេះ លោកស្រី ប៉ាក ហ្គឺនហេ ប្រឈមមុខសម្ពាធមួយទៀតហើយ ដែលចេញពីផ្ទៃក្នុងគណបក្សរបស់លោកស្រីតែម្ដង។ លោកស្រី បានសម្រេចចិត្តទុកឲ្យសភាជាតិ ជាអ្នកសម្រេចលើជោគវាសនារបស់លោកស្រី។ លោកស្រីនិយាយថា លោកស្រី នឹងចុះចេញពីតំណែងនៅពេលវេលាណាមួយ តាមរយៈយន្តការជាក់លាក់ ដែលឯកភាពគ្នាដោយគណបក្សនយោបាយទាំងអស់ ដើម្បីបន្ធូរបន្ថយកម្ដៅនយោបាយក្នុងស្រុក។
ជាមួយគ្នានោះ លោកស្រី ប៉ាក ក៏បានតែងតាំងរដ្ឋអាជ្ញាឯករាជ្យ ដើម្បីស៊ើបអង្កេតរឿងអាស្រូវរបស់លោកស្រីផងដែរ។ លោកស្រី ត្រូវបានការិយាល័យរដ្ឋអាជ្ញាដាក់ឈ្មោះជាជនសង្ស័យក្នុងសំណុំរឿងនេះ ដែលធ្វើឲ្យលោកស្រីក្លាយជាប្រធានាធិបតីក្នុងតំណែងដំបូងគេ ដែលនឹងត្រូវសាកសួរពីរដ្ឋអាជ្ញា។ ម្យ៉ាងទៀត គណបក្សប្រឆាំង ក៏មិនសុខចិត្តឲ្យប្រធានាធិបតី ប៉ាក ហ្គឺនហេ នៅកាន់តំណែងនេះយូរទៀតដែរ៕
Tag:
កូរ៉េខាងត្បូង
ប៉ាក ហ្គឺនហេ
Saenuri
© រក្សាសិទ្ធិដោយ thmeythmey.com