អន្តរជាតិ
នយោបាយអន្តរជាតិ
ម៉ាឡេស៊ីក្តៅស្លឹកត្រចៀក ពេលមីយ៉ាន់ម៉ាចោទថាខ្លួន«ជ្រៀតជ្រែករឿងផ្ទៃក្នុងពាក់ព័ន្ធជនជាតិរ៉ូហ៊ីងយ៉ា»
×![]()
ម៉ាឡេស៊ីបានប្រាប់មីយ៉ាន់ម៉ាថា «បញ្ហាជនជាតិរ៉ូហ៊ីងយ៉ាងជាបញ្ហាវិបត្តិមនុស្សជាតិមិនមែនកិច្ចការផ្ទៃក្នុងមីយ៉ាន់ម៉ាតែឯងឡើយ»។ រដ្ឋាភិបាលម៉ាឡេស៊ីលើកឡើងដូច្នេះដើម្បីឆ្លើយតបរដ្ឋាភិបាលមីយ៉ាន់ម៉ាដែលចោទប្រកាន់ម៉ាឡេស៊ីថា ព្យាយាមជ្រៀតជ្រែកចូលកិច្ចការផ្ទៃក្នុងខ្លួនកន្លងមក។
១.មីយ៉ាន់ម៉ា ដាស់តឿនម៉ាឡេស៊ីឲ្យគោរព«គោលការណ៍មិនជ្រៀតជ្រែកកិច្ចការផ្ទៃក្នុង»
អាស៊ានរក្សាគោលនយោបាយ «មិនជ្រៀតជ្រែកចូលក្នុងកិច្ចការផ្ទៃក្នុងរបស់ប្រទេសជាសមាជិកឡើយ» ទោះបីជាមានការរំលោភបំពានសិទ្ធិមនុស្សធ្ងន់ធ្ងរកើតឡើងក្នុងប្រទេសទាំងនោះក៏ដោយ។
ដោយសារតែគោលការណ៍នេះ មីយ៉ាន់ម៉ា បានលេសធ្វើទុក្ខបុកម្នេញលើជនជាតិភាគតិចម៉ូស្លីមរ៉ូហ៊ីងយ៉ាជាបន្តបន្ទាប់ ដោយស្ទើរតែគ្មានប្រទេសសមាជិកអាស៊ានណាមួយហ៊ានមាត់ឡើយ។ ប៉ុន្តែស្ថានភាពបំពារបំពានសិទ្ធិមនុស្សនេះវាធ្ងន់ធ្ងរពេក ស្ទើរតែក្លាយជាការ«បោសសម្អាតជានជាតិភាគតិច» ឬ«ប្រល័យពូជសាសន៍ទៅហើយ។
យ៉ាងណាក៏ដោយ ប្រជាជននិងសកម្មជនសិទ្ធិមនុស្សនៅប្រទេសម៉ាឡេស៊ី ឥណ្ឌូនេស៊ី និងថៃ បានចេញមុខបាតុកម្មតវ៉ានៅតាមទីក្រុងរបស់ខ្លួនដែរដើម្បីប្រឆាំងនិងទាមទារឲ្យមានការបញ្ឈប់ការបំពានសិទ្ធិជនជាតិភាគតិចឥស្លាមនេះទៀត។ ប៉ុន្តែក្នុងចំណោមប្រទេសទាំងបីនេះ ម៉ាឡេស៊ីចេញមុខខ្លាំងជាងរហូតដល់រដ្ឋាភិបាលម៉ាឡេស៊ីចេញមុខដោយផ្ទាល់ដើម្បីទាមទារឲ្យមីយ៉ាន់ម៉ា ឈប់បំពានសិទ្ធិមនុស្ស។
កាលពីសប្តាហ៍មុន ម៉ាឡេស៊ីសម្រេចកោះហៅទូតមីយ៉ាន់ម៉ាមកសួរនាំរឿងធ្វើទុក្ខបុកម្នេញជនជាតិរ៉ូហ៊ីងយ៉ាដែរ ហើយអ្វីដែលសំខាន់នោះរបាយការណ៍សារព័ត៌មានខ្លះផ្សាយថា នាយករដ្ឋមន្ត្រីម៉ាឡេស៊ីលោក ណាជីព រ៉ាហ្សាក់ (Najib Razak) នឹងចូលរួមក្នុងចលនាបាតុកម្មរួមគ្នាមួយនៅថ្ងៃ ៤ធ្នូស្អែកនេះ ដើម្បីដាក់សម្ពាធលើរដ្ឋាភិបាលមីយ៉ាន់ម៉ាថែមទៀតផង។
ឆ្លើយតបសកម្មភាពនេះ អគ្គនាយករងការិយាល័យប្រធានាធិបតី Zaw Htay បានដាស់តឿនម៉ាឡេស៊ីតាមរយៈការចុះផ្សាយអត្ថបទនៅក្នុងសារព័ត៌មាន Myanmar Times ជុំវិញគោលការណ៍អាស៊ានដែលសមាជិកមិនអាចជ្រៀតជ្រែកចូលកិច្ចការផ្ទៃក្នុងប្រទេសសមាជិកផ្សេងទៀតបានឡើយ។ មីយ៉ាន់ម៉ាសង្ឃឹមថា ម៉ាឡេស៊ីយល់និងបន្តធ្វើយ៉ាងណាគោរពគោលការណ៍នេះ ដោយឈប់ជ្រៀតជ្រែកកិច្ចការផ្ទៃក្នុងខ្លួនទៀត។
២.បញ្ហារ៉ូហ៊ីងយ៉ាជាវិបត្តិមនុស្សធម៌អន្តរជាតិ មិនមែនបញ្ហាក្នុងស្រុកឡើយ
យ៉ាងណាមិញ ម៉ាឡេស៊ីឆ្លើយតបវិញភ្លាមដែរ ចំពោះការចោទប្រកាន់របស់រដ្ឋាភិបាលមីយ៉ាន់ម៉ា។ ម៉ាឡេស៊ីបញ្ជាក់ច្បាស់ថា បញ្ហាប្រជាជនមីយ៉ាន់ម៉ាមិនមែនជារឿងក្នុងស្រុកឡើយ វាជារឿងតំបន់និងអន្តរជាតិផង។
ក្រសួងការបរទេសម៉ាឡេស៊ីចេញលិខិតមួយតបរបាយការណ៍ចុះផ្សាយដោយសារព័ត៌មាន Myanmar Times ដោយបញ្ជាក់ថាខ្លួននៅតែអនុញ្ញាតឲ្យមានចលនាបាតុកម្មថ្ងៃ ៤ ធ្នូ ដែលលោក ណាជីព រ៉ាហ្សាក់ ចូលរួមផងនោះ ព្រោះថា បញ្ហារ៉ូហ៊ីងយ៉ា ជាគ្រោះមហន្តរាយមនុស្សជាតិមិនមែនកិច្ចការផ្ទៃក្នុងប្រទេសណាមួយឡើយ។ ម៉ាឡេស៊ីក៏លើកឧទាហរណ៍ ពីជនភៀសខ្លួនរ៉ូហ៊ីងយ៉ាដែលរត់ចេញពីមីយ៉ាន់ម៉ាមករស់នៅម៉ាឡេស៊ីដែរ។
ក្រសួងការបរទេសម៉ាឡេស៊ីបន្តថា៖ «ក្នុងនាមជាប្រទេសជិតខាង និងជាប្រទេសដែលមានទំនួលខុសត្រូវខ្ពស់ក្នុងសហគមន៍អន្តរជាតិ វាជាកាតព្វកិច្ចម៉ាឡេស៊ីដែលត្រូវធានាថា ប្រទេសអាស៊ានបំពេញការងារបានសកម្មដើម្បីទប់ស្កាត់មិនឲ្យបញ្ហាកាន់តែធ្ងន់ធ្ងរខ្លាំង។ ហើយម៉ាឡេស៊ីដឹងច្បាស់ណាស់ពីគោលការណ៍មិនជ្រៀតជ្រែកក្នុងការ»។
បន្ថែមពីនេះ ម៉ាឡេស៊ីបានស្នើឲ្យមីយ៉ាន់ម៉ាបញ្ចប់រាល់ការកាប់សម្លាប់ឬធ្វើទុក្ខបុកម្នេញលើជនជាតិភាគតិចរ៉ូហ៊ីងយ៉ានេះនិងធ្វើយ៉ាងណាស្តារសន្តិសុខ និងសណ្តាប់ធ្នាប់ក៏ដូចជាស្ថិរភាពនៅក្នុងតំបន់ឡើងវិញដែរ។
តាមពិតទៅ មីយ៉ាន់ម៉ា បន្តរំលោភបំពានសិទ្ធិប្រជាជនរ៉ូហ៊ីងយ៉ាជាបន្តបន្ទាប់ហើយស្ថានភាពកាន់តែធ្ងន់ធ្ងរថែមទៀត ក្រោយជម្លោះហិង្សាមួយផ្ទុះឡើយនៅឆ្នាំ ២០១២។ រហូតដល់ដើមខែតុលាឆ្នាំនេះ ជម្លោះបានផ្ទុះឡើងកាន់តែធ្ងន់ធ្ងរម្តងទៀត។ ចាប់ពីថ្ងៃ ៨តុលា ពេលទាហានមីយ៉ាន់ម៉ាជាច្រើននាក់បានចូលអន្តរាគមន៍ទៅក្នុងតំបន់ក្នុងខេត្ត Rakhine ដែលជាប់ព្រំដែនបង់ក្លាដែសដើម្បីតបតការវាយប្រហាររបស់ក្រុមប្រដាប់អាវុធមកលើប៉ុស្តិ៍ត្រួតពិនិត្យចំនួន៣កន្លែងដែលសម្លាប់ប៉ូលិស ៩នាក់នោះ។ ខាងក្រុមសិទ្ធិមនុស្សចោទប្រកាន់ថា ទាហានរដ្ឋាភិបាលបានចូលលុកលុយដុតផ្ទះសម្បែងប្រជាជន ធ្វើទុក្ខបុកម្នេញ និងចាប់រំលោភស្ត្រីថែមទៀត។ ប្រជាជនរ៉ូហ៊ីងយ៉ាច្រើនពាន់នាក់ រត់ភៀសខ្លួនទៅកាន់កាន់ប្រទេសផ្សេងដូចជាបង់ក្លាដែសជាដើមដើម្បីគេចខ្លួនពីការធ្វើទុកបុកម្នេញនិងកាប់សម្លាប់ពីសំណាក់អាជ្ញាធរមីយ៉ាន់ម៉ា៕
Tag:
រ៉ូហ៊ីងយ៉ា
ណាជីព រ៉ាហ្សាក់
មីយ៉ាន់ម៉ា
© រក្សាសិទ្ធិដោយ thmeythmey.com
