រដ្ឋាភិបាលចិនបង្ហាញការអាក់អន់ចិន និងខឹងសម្បារខ្លះ ក្រោយប្រធានាធិបតីទើបជាប់ឆ្នោតដូណាល់ ត្រាំ ជាមួយប្រធានាធិបតីតៃវ៉ាន់តាមទូរសព្ទ។ ក្រុងប៉េកាំងស្នើឲ្យអាមេរិកគោរពគោលនយោបាយចិនតែមួយ និងសង្ឃឹមថា ទំនាក់ទំនងរវាងអាមេរិកនិងចិនមិនខូចខាតដែរ។
រដ្ឋមន្ត្រីការបរទេសចិនលោក វ៉ាង យី (Wang Yi) បានប្រតិកម្មតបខ្លាំងៗចំពោះការជជែកគ្នាតាមទូរសព្ទរវាងប្រធានាធិបតីទើបជាប់ឆ្នោតលោក ដូណាល់ ត្រាំ ជាមួយប្រធានាធិបតីកោះតៃវ៉ាន់ Tsai Ing-wen នៅថ្ងៃសុក្រទី ២ធ្នូម្សិលមិញ។
យោងតាមទីភ្នាក់ងារព័ត៌មាន AP ប្រមុខការទូតចិនសង្ឃឹមថាសកម្មភាពរបស់អាមេរិកនឹងមិនធ្វើឲ្យខូចខាតដល់ទំនាក់ទំនងទ្វេភាគីរវាងប្រទេសទាំងពីរ។ ហើយលោកក៏ស្នើឲ្យអាមេរិក«គោលនយោបាយចិនតែមួយ» ផងដែរ។
លោក វ៉ាង យី បានប្រតិកម្មបែបនេះក្រោយលោកស្រីប្រធានាធិបតីតៃវ៉ាន់ Tsai Ing-wen ទូរសព្ទទៅអបអរសាទរលោក ដូណាល់ ត្រាំ ដែលជាប់ឆ្នោតជាប្រធានាធិបតីអាមេរិក ដែលវាជាការបំពានគោលនយោបាយការទូតអាមេរិក។ ហើយមេដឹកនាំទាំងពីរបានចំណាយពេលវេលាជជែកពិភាក្សាគ្នាពីទំនាក់ទំនងសេដ្ឋកិច្ច,នយោបាយ និងសន្តិសុខផងដែរ។ លោក ដូណាល់ ត្រាំ ក៏បានអបអរសាទរលោកស្រី Tsai ផងដែរ ដែលជាប់ឆ្នោតនិងក្លាយជាប្រធានាធិបតីតៃវ៉ាន់នោះ។
យោងតាមការិយាល័យប្រធានាធីបតីតៃវ៉ាន់ លោកស្រី Tsai និងលោកដូណាល់ ត្រាំ ផ្លាស់ប្តូរយោបល់គ្នាពាក់ព័ន្ធការលើកស្ទួយទំនាក់ទំនងសេដ្ឋកិច្ច និងសន្តិសុខ និងកិច្ចការការពារជាតិផងដែរ។
ទោះជាបែបនេះក្តី ក្រោយការសន្ទនាគ្នាតាមទូរសព្ទ លោក ដូណាល់ ត្រាំ ព្យាយាមការពារជំហរនិងការសន្ទនាតាមទូរសព្ទជាមួយមេដឹកនាំតៃវ៉ាន់នេះ។ លោក បានសរសេរបង្ហោះតាមប្រព័ន្ធទំនាក់ទំនងសង្គម Twitter របស់ខ្លួនថា លោកមិនគួរទទួលការសាទររបស់លោកស្រីប្រធានាធិបតី តៃវ៉ាន់ឡើយ។
ចំណែកខាងសេតវិមានអាមេរិកឯណោះវិញ បានលើកឡើងថា អាមេរិកមិនផ្លាស់ប្តូរគោលជំហររបស់ខ្លួនឡើយ ហើយខ្លួននៅតែគោរពគោលនយោបាយចិនតែមួយដដែល។
អ្នកនាំពាក្យសន្តិសុខជាតិនៃសេវិមានលោកស្រី Emily Horne បានបញ្ជក់ប្រាប់ទីភា្នក់ងារព័ត៌មាន AFP ថា៖ «គ្មានការផ្លាស់ប្តូរក្នុងគោលនយោបាយការការបរទេសដែលមានជាយូរអង្វែងរបស់យើងចំពោះតៃវ៉ាន់ឡើយ។ យើងនៅតែប្តេជ្ញាចិត្តគោរព គោលនយោបាយចិនតែមួយដែលបង្កើនឡើងផ្អែកតាមកិច្ចព្រមព្រៀងរួមគ្នាចំនួន ៣ និងច្បាប់ស្តីពីទំនាក់ទំនងជាមួយតៃវ៉ាន់ផង»។
សូមបញ្ជាក់ថា ក្រុងវ៉ាស៊ីនតោនបានសម្រេចបញ្ចប់ទំនាក់ទំនងការទូតផ្លូវការជាមួយតៃវ៉ាន់នៅឆ្នាំ ១៩៧៩ ហើយទទួលស្គាល់រដ្ឋាភិបាលក្រុងប៉េកាំងតែមួយស្ថិតក្រោមនយោបាយចិនតែមួយ។ ហើយហើយអាមេរិកបន្តទំនាក់ទំនងមិនផ្លូវការជាមួយក្រុងតៃប៉ិកមកដល់បច្ចុប្បន្ន។