ប្រធានាធិបតីចិន លោក ស៊ី ជិនពីង បានបញ្ជាក់ថា កងទ័ពចិនត្រូវតែតិចជាមុន ប៉ុន្តែស្របពេលជាមួយគ្នានោះវាក៏ត្រូវតែខ្លាំងក្លាជាមុនដែរ។ លោកព្រមានផងដែរថា កំណែទម្រង់កងទ័ពត្រូវតែបន្តទៅមុខនិងធ្វើឡើងឲ្យបានត្រឹមត្រូវដើម្បីចៀសវាងប្រឈមបញ្ហានិងបាត់បង់សមត្ថភាពប្រយុទ្ធផង។
«កងទ័ពចិនត្រូវតែតិចជាមុន ប៉ុន្តែត្រូវមានសមត្ថភាពខ្លាំងជាងមុន»។នេះជាការលើកឡើងរបស់លោក ស៊ី ជិនពីង នៅក្នុងកិច្ចប្រជុំស្តីពីការកែទម្រង់យោធា ដែលត្រូវបានស្រង់សម្តីដោយទីភ្នាក់ងារព័ត៌មានរដ្ឋចិន Xinhua។ ក្រៅពីលើកឡើងពីការបន្ថយចំនួនកងទ័ពនិងបង្កើនសមត្ថភាព មេដឹកនាំរូបនេះក៏ប្តេជ្ញាបន្តកែទម្រង់វិស័យយោធាហើយការកែទម្រង់នេះនឹងត្រូវបន្តរៀបចំឲ្យបានត្រឹមត្រូវផងដែរ។
បច្ចុប្បន្ននេះចិនមានកងទ័ពសរុបចន្លោះពី២ ទៅ៣ លាននាក់ដែលស្ថិតក្នុងលំដាប់ប្រទេសដែលមានកម្លាំងយោធាច្រើនជាងគេ។ ប៉ុន្តែកាលពីថ្ងៃទី៣ ខែកញ្ញា ឆ្នាំ ២០១៥ ឱកាសពិធីរម្លឹកខួបទី៧០ ថ្ងៃបញ្ចប់សង្គ្រាមលោកលើកទី២ ប្រមុខរដ្ឋចិន ស៊ី ជីនពីង បានប្រកាសថា ចិននឹងកាត់បន្ថយចំនួនទាហានរហូត៣០០០០០នាក់។ ហើយ ភាគច្រើននៃមន្ត្រីការិយាល័យនិងកងកម្លាំងដែលមិនមានលក្ខណៈប្រយុទ្ធ គឺជាគោលដៅនៃការកាត់បន្ថយនេះ។
គេយល់ថា ការកាត់បន្ថយចំនួនកងទ័ពរបស់រដ្ឋាភិបាលចិនធ្វើឡើងក្រោមគោលនយោបាយទំនើបកម្មនិងកំណែទម្រង់យោធា ដែលធ្វើយ៉ាងណាឲ្យទ័ពតិចតែខ្លាំង។ ប៉ុន្តែហេតុផលមួយទៀតគឺចិនចង់ព្យាយាមកាត់បន្ថយការចំណាយខ្ជះខ្ជាយលើកងទ័ព ស្របពេលដែលប្រទេសនេះប្រឈមបញ្ហាសេដ្ឋកិច្ចផង។
គេមិនត្រូវភ្លេចទេថា ចិនព្យាយាមកាត់បន្ថយកងទ័ពស្របពេលដែលស្ថានភាពសេដ្ឋកិច្ចរបស់ចិនស្ថិតក្នុងស្ថានភាពមិនច្បាស់លាស់ ហើយកំណើនសេដ្ឋកិច្ចយឺត ហើយការកែទម្រង់សេដ្ឋកិច្ចក៏ស្ថិតក្នុងស្ថានភាពគ្រោះថ្នាក់ដែរ។
ដោយឡែកក្នុងកិច្ចប្រជុំនេះដែរ លោក ស៊ី ជិនពីង បានផ្តោតលើការបន្តការកែទម្រង់វិស័យយោធាផងដែរ ដោយលោកបញ្ជាក់ថា បច្ចេកវិទ្យាយោធាជារឿងសំខាន់សម្រាប់កងទ័ពចិន។
លោកស៊ី ជិនពីង បានបញ្ជាក់ថា៖« កងទ័ពចិនមិនអាចផ្តោតលើយុទ្ធសាស្ត្រចាស់ៗឡើយ ហើយគេត្រូវផ្លាស់ប្តូរតាមពេលវេលា។បើមិនដូច្នេះទេ កងទ័ពយើងដែលខ្លាំងនឹងហួសសម័យ ឬក៏បរាជ័យទាំងមិនបានប្រយុទ្ធ។ ប្រវត្តិសាស្ត្រនិងភាពពិតជាក់ស្តែងប្រាប់យើងថា បើសិនជាគេមិនអាចមានលទ្ធភាពបង្កើនសមត្ថភាពតាមឲ្យទាន់ពេលវេលាទេ គេក៏នឹងចាញ់ប្រៀបសត្រូវក្នុងសង្គ្រាមដែរ»។
ជាធម្មតាទេ កងទ័ពខ្លាំងជារឿងមួយ តែបច្ចេកវិទ្យាយោធាទំនើបៗនិងមានសព្វាវុធទំនើបជារឿងមួយផ្សេងទៀត។ ដូច្នេះហើយ មហាយក្សចិនព្យាយាមផ្តោតសំខាន់លើការអភិវឌ្ឍបច្ចេកវិទ្យាយោធា ផលិតសព្វាវុធដូចជាយន្តហោះនិងនាវា ដឹកយន្តហោះចម្បាំងជាដើមដើម្បីដើរឲ្យទាន់មហាអំណាចចាស់ដូចអាមេរិកជាដើម។
រយៈពេលជាច្រើនទសវត្សរ៍មកហើយ ចិនមិនដែរធ្វើសង្គ្រាមទៀតទេ ហើយរដ្ឋាភិបាលចិនក៏ប្រកាសហើយដែរថា ខ្លួនគ្មានចេតនាអាក្រក់អ្វីដែលនៅពេលដែលខ្លួនបន្តពង្រឹងកម្លាំងទ័ពនោះ។ កំណែទម្រង់និងទំនើបកម្មយោធាជាគោលនយោបាយមួយដែលជួយឲ្យចិនអាចអភិវឌ្ឍខ្លួនតាមពេលវេលា និងធ្វើខ្លួនឲ្យស័ក្តិសមជាមហាអំណាចពិភពលោក៕