មេទ័ពជីប៊ូទីបំពេញទស្សនកិច្ចនៅចិន ស្របពេលចិនកំពុងសង់មូលដ្ឋានយោធានៅជីប៊ូទី

អន្តរជាតិ

នយោបាយអន្តរជាតិ

មេទ័ពជីប៊ូទីបំពេញទស្សនកិច្ចនៅចិន ស្របពេលចិនកំពុងសង់មូលដ្ឋានយោធានៅជីប៊ូទី

07, Dec 2016 , 8:19 am

រូបភាព

ដោយ: ថ្មីៗ

អគ្គសេនាធិការកងទ័ពជីប៊ូទីបំពេញទស្សនកិច្ចនៅចិន ស្របពេលដែលចិនកំពុងបន្តសាងសង់មូលដ្ឋានទ័ពរបស់ខ្លួននៅប្រទេសនេះដែរ។ មន្ត្រីយោធាជាន់ខ្ពស់ចិនក៏បានថ្លែងអំណរគុណមន្ត្រីយោធាជីប៊ូទីចំពោះការគាំទ្រគម្រោងសាងសង់មូលដ្ឋានទ័ពរបស់ចិននៅក្នុងប្រទេសខ្លួនផងដែរ។

ដើមសប្តាហ៍នេះអគ្គសេនាធិការកងទ័ពជីប៊ូទីលោក Zakaria Cheikh Ibrahim អញ្ជើញទៅទស្សនកិច្ចនៅចិន ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ។ វត្តមានមន្ត្រីជាន់ខ្ពស់របស់ជីប៊ូទីនៅចិន កើតឡើងស្របពេលដែលចិនកំពុងបន្តសាងសង់មូលដ្ឋានទ័ពរបស់ខ្លួននៅប្រទេសនេះដែរ។

យោងតាមទីភ្នាក់ងារព័ត៌មាន Reuters អគ្គសេនាធិការកងទ័ពជីប៊ូទីលោក Zakaria Cheikh Ibrahim បានជួបពិភាក្សាជាមួយសមាជិកគណៈកម្មការធិការយោធាមជ្ឈិម និងនាយអគ្គសេនាធិការកងទ័ពចិនលោក Fang Fenghui ផងដែរ។

មន្ត្រីជាន់ខ្ពស់ផ្នែកយោធារបស់ចិនខាងលើបានថ្លែងអំណរគុណដល់ភាគីជីប៊ូទីដែលបានគាំទ្រចិនក្នុងការសាងសង់មូលដ្ឋានទ័ពនៅក្នុងរដ្ឋអាហ្វ្រិកមួយនេះ។ លោក Fang Fenghui បានថ្លែងដូច្នេះថា៖« ចិនអរគុណជីប៊ូទីនិងសង្ឃឹមថា ជីប៊ូទីនឹងបន្តគាំទ្រការសាងសង់មូលដ្ឋានទ័ពគាំទ្រភ័ស្តុភាររបស់ចិនចិនទៀត»។

ចិនចាប់ផ្តើមសាងសង់មូលដ្ឋានទ័ពដំបូងបំផុតរបស់ខ្លួនក្រៅប្រទេសកាលពីខែកុម្ភៈកន្លងទៅនេះ។ វាមានទីតាំងស្ថិតនៅប្រទេសជីប៊ូទី ស្ថិតនៅចំណុចជួបគ្នានៃសមុទ្រក្រហម និងឈូងសមុទ្រ Aden ហើយវានៅមិនឆ្ងាយពីផ្លូវទឹកដែលមមាញឹកបំផុតសម្រាប់ចរាចរណ៍ពាណិជ្ជកម្មផងដែរ។ តាំងពីយូរមកហើយកងទ័ពចិនធ្វើសកម្មភាពប្រឆាំងក្រុមចោរសមុទ្រជាញឹកញាប់នៅក្បែរតំបន់ខាងលើដើម្បីការពារនាវាទំនិញរបស់ខ្លួន។

ដូច្នេះហើយពេលដែលមូលដ្ឋានទ័ពនេះសាងសង់រួចរាល់ចប់សព្វគ្រប់ កងទ័ពជើងទឹកចិននឹងឈរជើងនៅទីនោះ ហើយនាវាចម្បាំងចិននឹងអាចចូលសំចត និងជួសជុលជាដើម ហើយចិនប្រើប្រាស់មូលដ្ឋានយោធានេះដើម្បីផ្គត់ផ្គង់ភ័ស្តភារដល់កងទ័ពរបស់ខ្លួននៅក្រៅប្រទេសផងដែរ។

អ្នកជំនាញជាច្រើនបានវាយតម្លៃថា មូលដ្ឋានទ័ពទីមួយរបស់ចិននឹងជួយច្រើនដល់គោលនយោបាយនិងយុទ្ធសាស្ត្រសេដ្ឋកិច្ច និងរក្សាសន្តិសុខតំបន់។ អាចថា វានឹងដើរតួនាទីសំខាន់ដើម្បីគាំទ្រដល់នយោបាយ «ខ្សែក្រវ៉ាត់មួយ វិថីមួយ» ដែលផ្សាភ្ជាប់ពីទំនាក់ទំនងពាណិជ្ជកម្ម សេដ្ឋកិច្ច ពីអាស៊ីដល់អាហ្វ្រិក និងដល់អឺរ៉ុបផងដែរនោះ។ ហើយវាសម្រួលដល់ចិនក្នុងការឆ្លើយតបក្នុងករណីបន្ទាន់បង្ខំណាមួយដែលកើតឡើងផងដែរ។

យ៉ាងណាក៏ដោយ មូលដ្ឋានយោធាចិននឹងមិនក្លាយជាទីតាំងដែលចិនដំឡើងអាវុធយុទ្ធសាស្ត្រមានយន្តហោះចម្បាំង នាវាចម្បាំងនិងកងទ័ពរាប់ម៉ឺននាក់សម្រាប់ត្រៀមប្រយុទ្ធនិងស្វ័យការពារខ្លួនដូចមូលដ្ឋានយោធាអាមេរិកនៅកោះអូគីណាវ៉ារបស់ជប៉ុនឡើយ។ មូលដ្ឋានទ័ពនៅជីប៊ូទីនេះជាកន្លែងផ្គត់ផ្គង់ភ័ស្តុភារយោធា នេះនឹងជួយដល់កងទ័ពចិនក្នុងការបំពេញប្រតិបត្តិការផ្តល់ជំនួយមនុស្សធម៌, ប្រតិបត្តិការសង្គ្រោះក្នុងករណីមានគ្រោះមហន្តរាយ និងប្រឆាំងក្រុមចោរសមុទ្រ។

សូមរំលឹកថា ចិនទទួលបានសិទ្ធិប្រើប្រាស់ទឹកដីរដ្ឋអាហ្វ្រិកនេះជាមូលដ្ឋានទ័ពជើងទឹកដំបូងរបស់ខ្លួន ក្នុងពេលដែលលោក ស៊ី ជិនពីងទៅទស្សនកិច្ចនៅអាហ្វ្រិកកាលពីចុងឆ្នាំមុន។ ហើយចិននឹងចំណាយលុយជាង ៥០០ពាន់លានដុល្លារសម្រាប់កសាងមូលដ្ឋានយោធានេះ៕