ជាតិ
សេដ្ឋកិច្ច
បក្សប្រឆាំង អញ្ជើញលោក ស៊ុយ សែម ចូលបំភ្លឺរឿងនាំខ្សាច់ទៅសិង្ហបុរី
×
លោក ហូរ វ៉ាន់ តំណាងរាស្ត្រគណបក្សសង្គ្រោះជាតិ និងជាប្រធានគណៈកម្មការទី១០នៃរដ្ឋសភា បានដាក់លិខិតអញ្ជើញលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ឲ្យចូលបំភ្លឺ ជុំវិញរបាយការណ៍នាំចេញខ្សាច់ទៅសិង្ហបុរី ក្នុងគណៈកម្មការរបស់លោក នៅថ្ងៃទី១៥ ខែធ្នូខាងមុខ។
គណៈកម្មការអង្កេត បោសសំអាត និងប្រឆាំងអំពើពុករលួយ បានដាក់លិខិតទៅកាន់នាយករដ្ឋមន្ត្រីតាមរយៈប្រធានរដ្ឋសភា អញ្ជើញលោក ស៊ុយ សែម រដ្ឋមន្ត្រីក្រសួងរ៉ែ និងថាមពល ឲ្យឆ្លើយបំភ្លឺនៅក្នុងគណៈកម្មការទី១០ នៃរដ្ឋសភា នៅថ្ងៃទី១៥ ខែធ្នូខាងមុខនេះ។ លោក ហូរ វ៉ាន់ បានបញ្ជាក់ដូច្នេះថា៖«យើងបានដាក់លិខិតទៅ សុំអញ្ជើញរដ្ឋមន្ត្រីក្រសួងរ៉ែ និងថាមពល ឲ្យចូលមកបំភ្លឺនៅក្នុងគណៈកម្មការយើង អំពីភាពខុសគ្នារវាងថវិកា និងរបាយការណ៍នៃការនាំខ្សាច់ទៅសិង្ហបុរី ដែលខុសលុយរាប់រយលានដុល្លារ»។
ប៉ុន្តែយ៉ាងណាក៏ដោយ ប្រធានគណៈកម្មការជំនាញទី១០នៃរដ្ឋសភា នៅមិនទាន់ទទួលបានចំណារឆ្លើយតបពី សម្តេច ហ៊ុន សែន នាយករដ្ឋមន្ត្រីកម្ពុជានៅឡើយ។ ប៉ុន្តែលោក រំពឹងថា នាយករដ្ឋមន្ត្រី នឹងអនុញ្ញាតឲ្យរដ្ឋមន្ត្រីក្រសួងរ៉ែ និងថាមពល ចូលបំភ្លឺ ដើម្បីស្រាយចម្ងល់របស់ប្រជាពលរដ្ឋ ក៏ដូចជាក្រុមអង្គការសង្គមស៊ីវិល។
ក្រៅតែពីចង់ឲ្យក្រសួងរ៉ែ និងថាមពល លម្អិតពីភាពមិនប្រក្រតីនៃការនាំខ្សាច់ទៅសិង្ហបុរី លោក ហូរ វ៉ាន់ ក៏នឹងស្នើឲ្យ ក្រសួងរ៉ែ និងថាមពល បញ្ឈប់ការធ្វើអាជីវកម្មនៅក្នុងខេត្តកោះកុងតែម្តង ពីព្រោះវាធ្វើប៉ះពាល់ដល់ជីវភាពរបស់ប្រជាពលរដ្ឋ ពិសេសជនជាតិដើមភាគតិច និងប៉ះពាល់ដល់ជីវចម្រុះដែលកំពុងរស់នៅតំបន់ធ្វើអាជីវកម្មខ្សាច់នោះ។
សូមបញ្ជាក់ថា ការសង្ស័យពីអំពើពុករលួយ ឬភាពមិនប្រក្រតីនៃការនាំចេញខ្សាច់នេះ បានចាប់កក្រើកឡើង ក្រោយពី មានព័ត៌មានពី ទិន្នន័យពីគយសិង្ហបុរី ដែលបានបង្ហាញថា ចាប់ពីឆ្នាំ២០០៧ ដល់ឆ្នាំ២០១៥ កម្ពុជានាំចេញខ្សាច់ទៅសិង្ហបុរីចំនួន៧២,៧លានតោន ស្មើនឹងទឹកប្រាក់៧៥២លានដុល្លារសហរដ្ឋអាមេរិក។ ប៉ុន្តែក្នុងរយៈពេលដូចគ្នា កម្ពុជាអះអាងថា បាននាំចេញខ្សាច់ទៅសិង្ហបុរីត្រឹមតែ ២,៨ លានតោន ស្មើនឹងទឹកប្រាក់៥លានដុល្លារប៉ុណ្ណោះ។ ក្រសួងរ៉ែ និងថាមពល ក៏បានបើកកិច្ចប្រជុំជាមួយអង្គការសង្គមស៊ីវិលជុំវិញបញ្ហានេះដែរ កាលពីថ្ងៃទី១១ ខែវិច្ឆិកា ប៉ុន្តែនៅក្នុងកិច្ចប្រជុំនោះ ក្រសួងរ៉ែ មិនបង្ហាញព័ត៌មានច្បាស់លាស់ ពីទិន្នន័យនាំចេញខ្សាច់នេះឡើយ។ ទិន្នន័យនាំចេញខ្សាច់ពីកម្ពុជា ទៅ សិង្ហបុរី ដែលល្អៀងទឹកប្រាក់ប្រមាណ ៧៤៧ លានដុល្លារនោះនៅតែអាថ៌កំបាំងដដែល៕
Tag:
ខ្សាច់
ហូរ វ៉ាន់
ស៊ុយ សែម
© រក្សាសិទ្ធិដោយ thmeythmey.com