ចិនសង់ទីក្រុងភាពយន្តលើផ្ទៃដីជាង ១ពាន់ហិកតា សម្រាប់ថតភាពយន្ត និងធ្វើជាតំបន់ទេសចរណ៍

អន្តរជាតិ

ចិនសង់ទីក្រុងភាពយន្តលើផ្ទៃដីជាង ១ពាន់ហិកតា សម្រាប់ថតភាពយន្ត និងធ្វើជាតំបន់ទេសចរណ៍

09, Dec 2016 , 8:29 am

រូបភាព

ដោយ:

ហៃណាន៖ ចិនបានសាងសង់ទីក្រុងភាពយន្តហៃខូវ (Movie Town Haikou )លើផ្ទៃដីទំហំចំនួន ១៤០០ហិកតាស្ថិតនៅចម្ងាយ ៨គីឡូម៉ែត្រភាគខាងជើងទីរួមខេត្តហៃណាន ដើម្បីថតភាពយន្ត និងធ្វើជាតំបន់ទេសចរណ៍របស់ចិន។

លោក A Hai មគ្គទេសក៍ទេសចរណ៍ ប្រចាំកោះហៃណាន បានឲ្យដឹងថា សំណង់អគារនានា នៃតំបន់នេះ ត្រូវបានគេរចនាឡើងតាមឈុតឆាកពីខ្សែភាពយន្តក្នុងឆ្នាំ ១៩៤២ ពីព្រោះសហស្ថាបនិកដែលជាម្ចាស់ក្រុមហ៊ុនភាពយន្ត Feng Xiaogang និង Huayi Brothers Media Group ចង់អភិរក្សទីក្រុងភាពយន្តបុរាណចិន ទុកជាប្រវត្តិសាស្ត្រ។

មគ្គទេសក៍ដែលមានបទពិសោធន៍នាំភ្ញៀវទេសចរជាង ៨ឆ្នាំ រូបនេះ បានបន្តប្រាប់ក្រុមអ្នកសារព័ត៌មាន ពេលចូលទស្សនាទីក្រុងភាពយន្តទៀតថា គម្រោងដែលទទួលបានផ្តល់ដីសម្បទានសេដ្ឋកិច្ចពីរដ្ឋាភិបាលចិនរយៈពេល៧០ឆ្នាំនេះ ត្រូវបានសង់ ឡើងតាមដំណាក់កាលនីមួយៗ តាំងពី ២០០៧មក។ ហើយថា ចិនបានដំណើរការថតភាពយន្ត និងបើកឲ្យភ្ញៀវទេសចរចូលទស្សនាលើកដំបូងក្នុងឆ្នាំ ២០១៥រហូតមក។

ក្រុមហ៊ុនបានជួលតូបលក់ដូរសម្ភារៈប្រើប្រាស់ អនុស្សាវរីយនានា ឲ្យពលរដ្ឋនៅមូលដ្ឋានបន្តធ្វើអាជីវកម្ម ក្នុងអគារទីក្រុង រោងភាពយន្ត និងស្ទូឌីយោថតភាពយន្ដដែលយកលំនាំតាមរចនាសំណង់ក្រោយសង្គ្រាមលោកលើកទីមួយ។

អាជីវករចិន បានរៀបចំកន្លែងលក់ដូរសំលៀកបំពាក់ កន្លែងថត តូបលក់អាហារនានា តាមបណ្តោយផ្លូវក្រោយថ្មភ្នំចិនបុរាណដែលមានឈ្មោះ ដូចជា វិថីសង្គមនិយម (Socialism Street) ជាដើម។ ក្រុមហ៊ុនក៏បានរៀបចំរចនាទំនាក់ទំនងគ្នារវាងចិន និងអឺរ៉ុប តាមវិថីអឺរ៉ុប ក្នុងសម័យនោះដែរ ក្រៅពីរចនាបទចិនក្នុងទីក្រុងដែលចំណាយថវិកាសង់អស់ជាង ១០០លានយ័ន ប្រមាណ ២០លានដុល្លារដុល្លារអាមេរិក។
តាម A Hai ពលរដ្ឋបានទទួលចំណូលពីវិស័យទេសចរណ៍ភាពយន្តនេះ ដោយសារពួកគេអាចលក់សម្ភារៈនានាជូនភ្ញៀវទេសចរ។ លោកនិយាយថា ទេសចរចិនភាគច្រើន ពី ១ពាន់ ទៅ ៥ពាន់នាក់ បានទិញសំបុត្រ ៨៨លានយ័ន ស្មើនឹងជាង ១០ដុល្លារអាមេរិក ចូលទស្សនាទីក្រុងនេះពីម៉ោង ១០ព្រឹក ដល់ម៉ោង ១០យប់ក្នុងមួយថ្ងៃៗ ៕