លោក គួច ម៉េងលី ចែករំលែក ទស្សនវិស័យជុំវិញបរិយាកាសធុរកិច្ចកម្ពុជា

ជាតិ

សេដ្ឋកិច្ច

លោក គួច ម៉េងលី ចែករំលែក ទស្សនវិស័យជុំវិញបរិយាកាសធុរកិច្ចកម្ពុជា

09, Dec 2016 , 7:59 am

រូបភាព

ដោយ: ថ្មីៗ

លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន ម៉េងលី ជេ.គួច អេឌ្យូខេសិន ទទួលបានសំឡេងគាំទ្រច្រើនជាងគេបំផុតក្នុងនាមជាអ្នកគ្រប់គ្រងអាជីវកម្មឆ្នើមនៅប្រទេសកម្ពុជា។ នេះបើតាមការផ្សាយរបស់ទស្សនាវដ្តី «ពាណិជ្ជកម្មកម្ពុជា» (Business Cambodia) និងជាស្ថាប័នដែលបានរៀបចំការបោះឆ្នោតនារយៈពេញ១ឆ្នាំកន្លងមក។

ក្នុងបទសម្ភាសជាមួយទស្សនាវដ្តីពាណិជ្ជកម្មកម្ពុជា (Business Cambodia) ដែលចេញផ្សាយសម្រាប់ខែធ្នូ ឆ្នាំ២០១៦ លោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិក្រុមហ៊ុន ម៉េងលី ជេ.គួច អេឌ្យូខេសិន បានលើកឡើងពីទស្សនវិស័យជាច្រើនស្តីពីបរិយាកាសធុរកិច្ចបច្ចុប្បន្ន និងអនាគត នៅក្នុងប្រទេសកម្ពុជា។

ទាក់ទងនឹងឥទ្ធិពលនៃការបោះឆ្នោតនាពេលខាងមុខ លោក គួច ម៉េងលី បានទទួលស្គាល់ថា ប្រជាជនមិនតិចទេ ពិសេសគឺសហគ្រិន និងវិនិយោគិន មានការព្រួយបារម្ភចំពោះបញ្ហាមិនប្រក្រតីនានាដែលអាចកើតមានឡើង ប៉ុន្តែលោកក៏បានកត់សម្គាល់ផងដែរ វាមិនមែនជាបញ្ហាថ្មីនោះឡើយ។ លោកបានលើកឡើងថា៖ «វាជាព្រឹត្តិការណ៍មួយដែលតែងកើតឡើងរៀងរាល់៥ឆ្នាំម្ដងសម្រាប់កម្ពុជា ហើយយើងក៏ធ្លាប់ឆ្លងកាត់មក៥ដងហើយដែរ តែក្រោយពីការបោះឆ្នោតយើងសង្កេតឃើញថា សេដ្ឋកិច្ចកម្ពុជានៅតែបន្ដបោះជំហានទៅមុខល្អរហូត»។

និយាយពីទំនាក់ទំនងជាមូលដ្ឋានគ្រឹះដ៏សំខាន់សម្រាប់ការប្រតិបត្តិអាជីវកម្ម លោក គួច ម៉េងលី បានលើកឡើងប្រាប់ទស្សនាវដ្តីពាណិជ្ជកម្មកម្ពុជា ថា ការប្រកបអាជីវកម្មមួយជោគជ័យ ត្រូវមានធាតុផ្សំជាច្រើនចូលរួម តែអ្វីដែលផ្ដើមចេញសំខាន់បំផុតនោះគឺខ្លួនឯង។ លោកគូសបញ្ជាក់ថា ការចេះប្រើប្រាស់នូវវិធីសាស្ត្រទំនាក់ទំនងល្អ គឺជាគ្រឹះដ៏សំខាន់មួយដែលសហគ្រិន ក៏ដូចជាអ្នកដឹកនាំត្រូវមានជាចាំបាច់។

លើកិច្ចសហការក្នុងកិច្ចការងារសង្គម លោកបានមានប្រសាសន៍ថា៖ «ក្នុងនាមជាសហគ្រិនល្អ និងក្នុងនាមជាអ្នកធ្វើអាជីវកម្មដែលទទួលបានផលប្រយោជន៍ពីសង្គម យើងត្រូវចាំថា បើយើងប្រមូលផលចំណេញពីសង្គមណា យើងត្រូវដាក់ផលទៅឱ្យសង្គមនោះវិញ ពោលគឺចេះបរិច្ចាគដល់សង្គមតាមរយៈកិច្ចការសប្បុរសធម៌ជាដើម»។

ក្រៅពីការបើកសាលារៀនបណ្តុះបណ្តាល ឧកញ៉ាចិត្តធម៌រូបនេះ បានបំពេញតួនាទីយ៉ាងច្រើនដើម្បីសង្គម ជាពិសេសយុទ្ធនាការជួយដល់កុមារក្រីក្រនៅតាមទីជនបទ។ កាលពីពេលថ្មីៗកន្លងមកនេះ លោកបានកម្មវិធីសប្បុរសធម៌ “កង់មួយជីវិតមួយ” សម្រាប់ចែកជូនដល់សិស្សក្រីក្រ។

ទាក់ទងនឹងធនធានមនុស្ស លោកមើលឃើញថា កម្ពុជានៅតែខ្វះខាតនៅឡើយ បើទោះបីជាសេដ្ឋកិច្ចកំពុងលូតលាស់ក៏ដោយ។ បើតាមលោក គួច ម៉េងលី រដ្ឋាភិបាល ក៏ដូចជាក្រសួងអប់រំ គួរតែបន្ថែម និងពង្រឹងកម្មវិធីសិក្សាឲ្យត្រូវតាមតម្រូវការការងារជាក់ស្ដែង។ ការដកបទពិសោធន៍នាពេលអំឡុងពេលសិក្សា និងការផ្តល់ការងារស្ម័គ្រចិត្ត គឺជារឿងដ៏សំខាន់បំផុតក្នុងការពង្រឹងធនធានមនុស្សដើម្បីឆ្លើយនឹងតម្រូវការងារក្នុងសង្គម និងតំបន់អាស៊ាន។

ចំណែកបរិយាកាសជុំវិញវិស័យអចលនទ្រព្យវិញ លោក គួច ម៉េងលី វាយតម្លៃថា មិនទាន់មានភាពច្បាស់លាស់នៅឡើយ ដោយវាហាក់ដូចជាកំពុងដើរទៅរកចំណុចកក្អម។ លោកកត់សម្គាល់ថា មានការសាងសង់សំណង់ជាច្រើន ជាពិសេសខុនដូ និងអាផាតមិន ប៉ុន្តែវាហាក់ដូចជាមិនស្របតាមតម្រូវការរបស់ប្រជាជនខ្មែរនោះឡើយ ខណៈអតិថិជនបរទេសនៅមានកម្រិត។

ទោះបីជាយ៉ាងណាក៏ដោយ លោក គួច ម៉េងលី បានផ្តល់យោបល់ថា កម្ពុជាគួរមានការសាងសង់អន្តេវាសិកដ្ឋានឲ្យបានច្រើនសម្រាប់និស្សិតក្រីក្រ ពីព្រោះពួកគាត់ជាធនធានដ៏សំខាន់ដែលត្រូវទទួលបាននូវការយកចិត្តទុកដាក់ បន្ថែមពីលើនេះ លោកចង់ឲ្យមានការពង្រឹងហេដ្ឋារចនាសម្ព័ន្ធតាមតំបន់ព្រំដែន ដើម្បីកាត់បន្ថយការចំណាកស្រុក។

សម្រាប់ទិដ្ឋភាពនៃការប្រកួតប្រជែងអាជីវកម្មយីហោក្នុងស្រុក និងក្រៅស្រុក លោក គួច ម៉េងលី បែរជាមើលឃើញផលវិជ្ជមានទៅវិញ។ លោកចង់ឃើញការចូលមកវិនិយោគពីយីហោអាជីវកម្មបរទេសកាន់តែច្រើនបន្ថែមទៀតមកកម្ពុជា។ «ការប្រកួតប្រជែងគឺជាការជំរុញឲ្យមានគុណភាពកាន់តែប្រសើរ ថែមទាំងផ្ដល់នូវជម្រើសនិងបទពិសោធថ្មីសម្រាប់អតិថិន ពិសេសជាឱកាសដើម្បីពង្រឹងសមត្ថភាពបន្ថែមផងដែរ»។ នេះជាការកត់សម្គាល់របស់លោក។

ទាក់ទងនឹងសេវាសុខាភិបាល ឧកញ៉ារូបនេះ មើលឃើញថា ការអប់រំអំពីការថែទាំសុខភាពនៅតាមសហគមន៍ គឺនៅមានកម្រិត ខណៈដែលសេវាព្យាបាលសាធារណៈមិនសូវមានភាពច្បាស់លាស់ ដែលជាហេតុធ្វើឲ្យសេដ្ឋកិច្ចខ្មែរពិបាកលូតលាស់ទៅមុខ។ លោកបានសម្តែងពីកង្វល់ទាក់ទងនឹងការនិយមសេពគ្រឿងស្រវែង គ្រឿងញៀន និងការជក់បារី ជាដើម។ លោកបានសំណូមពរដល់រដ្ឋាភិបាលឲ្យរឹតបន្តឹងចំពោះបញ្ហានេះព្រោះវាជាជំងឺសេដ្ឋកិច្ចដ៏ធំមួយ។

ចំពោះសហគ្រិនភាពវិញ លោក គួច ម៉េងលី មើលឃើញថា ការបំផុសបំផុសមួយចំនួនពីការធ្វើអាជីវកម្ម ឬក្លាយជាសហគ្រិនជោគជ័យ ហាក់គ្រាន់តែជាការអេះមិនចំកន្លែងរមាស់ប៉ុណ្ណោះ ព្រោះវាគ្មានមូលដ្ឋាន ឬវិធីសាស្ត្រជាក់លាក់ណាមួយសម្រាប់យុវវជនយកទៅអនុវត្តឡើយ។ ទាក់ទងនឹងបញ្ហានេះ លោកឧកញ៉ាបានដាស់តឿនថា យុវជនត្រូវខិតខំរៀនសូត្រ ចាប់ជំនាញឲ្យបានច្បាស់លាស់ និងធ្វើការដកពិសោធន៍ក្នុងការងារឲ្យបានឆ្អិនសិន សឹមចេញទៅឈោងចាប់ក្ដីសុបិនជាសហគ្រិន។ លោកលើកឡើងថា៖ «ដើម្បីក្លាយជាបុគ្គលមានសក្ដានុពល យុវជនត្រូវដើរឲ្យទាន់សម័យបច្ចេកវិទ្យា ត្រូវចេះទាញប្រយោជន៍ និងឱកាសពីការប្រើប្រាស់បច្ចេកវិទ្យាឲ្យបានច្រើន»។

បន្ថែមពីលើនេះ លោក គួច ម៉េងលី ចង់ឃើញស្ត្រីមានតួនាទីជាថ្នាក់ដឹកនាំបន្ថែមទៀតទាំងលើវិស័យនយោបាយ ទាំងវិស័យធុរកិច្ច ព្រោះលោកកត់សម្គាល់ថា ស្ត្រីភាគច្រើនជាមនុស្សដែលមានចិត្តអំណត់អត់ធន តស៊ូ និងហ្មត់ចត់ជាងបុរស ហើយស្ត្រីជាកម្លាំងដ៏សំខាន់ក្នុងការចូលរួមអភិវឌ្ឍន៍ប្រទេសជាតិ។

ក្រៅពីជំរុញការបណ្តុះបណ្តាលជំនាញបច្ចេកទេសទៅតាមស្តង់ដាសម្រាប់យុវជន លោក គួច ម៉េងលី បានក៏លើកឡើងផងដែរពីសារសំខាន់របស់ប្រព័ន្ធផ្សព្វផ្សាយក្នុងការចែករំលែកនូវព្រឹត្តិការណ៍ និងចំណេះដឹងនានាសម្រាប់ប្រជាជនទូទៅ។

បើតាមសម្តីរបស់លោក គួច ម៉េងលី ដែលដកស្រង់ដោយពាណិជ្ជកម្មកម្ពុជា រាល់ចំណុចដែលកម្ពុជាកំពុងប្រឈម ត្រូវការយន្តការវិជ្ជមានជាចំបាច់របស់រដ្ឋាភិបាល ដោយមានការចូលរួមយ៉ាងសកម្មពីសំណាក់ប្រជាពលរដ្ឋទាំងអស់ ជាពិសេសយុវជនដែលជាកម្លាំងស្នូល៕