ជាតិ
បទយកការណ៍ / បទសម្ភាសន៍
×![]()
ភ្នំពេញ៖ ការលួចចម្លងអត្ថបទ និងសៀវភៅ ទៅធ្វើអាជីវកម្ម គឺកំពុងបង្អាក់ស្មារតីអ្នកនិពន្ធ ឲ្យបោះបង់ការសរសេរ និងចងក្រងឯកសារសម្រាប់ខ្មែរជំនាន់ក្រោយ។ ជាងនេះទៅទៀត និន្នាការនេះ បានទាញទម្លាក់វិស័យតែងនិពន្ធឲ្យធ្លាក់ចុះ ខណៈសៀវភៅនៅកម្ពុជាកំពុងមានតិចតួចផងនោះ។ ភិក្ខុ គូ សុភាព ដែលជាអ្នកតែងនិពន្ធ និងចងក្រងសៀវភៅ ដ៏ឆ្នើមមួយអង្គ បានមានសង្ឃដីកា ថា ការលួចចម្លងក្នុងន័យសិក្សារៀនសូត្រ គឺមិនមែនជាការខុសឆ្គងឡើយ តែប្រសិនបើការលួចចម្លងសៀវភៅទៅធ្វើអាជីវកម្មនោះ គឺអំពើខុសច្បាប់។ 
ជាបន្ត សូមអញ្ជើញស្តាប់បទសម្ភាសន៍រវាង លោក រ៉ឹម ភារី អ្នកយកព័ត៌មានរបស់គេហទំព័រថ្មីៗ ជាមួយ ភិក្ខុ គូ សុភាព សាស្ត្រាចារ្យនៅសាកលវិទ្យាល័យបញ្ញាសាស្ត្រកម្ពុជាដូចតទៅ៖
ភិក្ខុ គូ សុភាព មានសង្ឃដីកា ថា ការលួចចម្លងសៀវភៅ បានធ្វើឲ្យប៉ះពាល់យ៉ាងខ្លាំងចំពោះសតិអារម្មណ៍អ្នកនិពន្ធ ពីព្រោះ ស្នាដៃរបស់អ្នកនិពន្ធមិនត្រូវបានគោរព។ មួយវិញទៀត ការលួចចម្លងនេះ បានធ្វើឲ្យវិស័យតែងនិពន្ធកាន់តែធ្លាក់ចុះ និងបង្កភាពគ្មានសណ្តាប់ធ្នាប់នៅក្នុងសង្គមផងដែរ។ យ៉ាងណាក៏ដោយ ការចម្លង(Copy)សៀវភៅសម្រាប់យកទៅសិក្សាមួយមេរៀនម្តងៗ គឺគេអាចធ្វើបានដោយស្របច្បាប់ ប៉ុន្តែ ការលួចចម្លងសៀវភៅទាំងមូល ដោយគ្មានការអនុញ្ញាតពីអ្នកនិពន្ធ គឺជាអំពើមិនស្របច្បាប់ឡើយ។ សម្រាប់ភិក្ខុ គូ សុភាព ព្រះអង្គមិនកំណាញ់ឡើយ ចំពោះការចម្លងសៀវភៅរបស់ព្រះអង្គ ពីព្រោះ សៀវភៅរបស់ព្រះអង្គ គឺនិពន្ធ ឬ ចងក្រងឡើង ដើម្បីជាធម្មទាន ដើម្បីផ្សព្វផ្សាយចំណេះដឹងដល់សាធារណជន។
យ៉ាងណាក៏ដោយ ភិក្ខុ គូ សុភាព បានសង្កត់ធ្ងន់ថា ការលួចចម្លងក្នុងន័យរៀនសូត្រ គឺមិនមានបញ្ហាឡើយ ប៉ុន្តែ ការលួចចម្លងគ្មានការអនុញ្ញាត ដើម្បីធ្វើអាជីវកម្ម គឺមិនគួរធ្វើឡើយ ព្រោះនេះជាទង្វើផ្ទុយពីច្បាប់កម្មសិទ្ធិបញ្ញារបស់កម្ពុជា៕
Tag:
គូ សុភាព
កម្មសិទ្ធិបញ្ញា
© រក្សាសិទ្ធិដោយ thmeythmey.com
