ចិនដាំដើមឈើ និងផ្កាឱសថចម្រុះជាង១ពាន់ប្រភេទសម្រាប់ព្យាបាលទ័ព និងប្រជាជន

អន្តរជាតិ

ចិនដាំដើមឈើ និងផ្កាឱសថចម្រុះជាង១ពាន់ប្រភេទសម្រាប់ព្យាបាលទ័ព និងប្រជាជន

10, Dec 2016 , 8:00 pm

រូបភាព

ដោយ:

ហៃណាន, ចិន៖ ចិនបានដាំដុះដើមឈើ និងផ្កាតំបន់ត្រូពិចចម្រុះប្រមាណ ១៦០០ប្រភេទ លើផ្ទៃដីទំហំចំនួន ២២២ហិកតា ក្នុងសួនឱសថស៊ីឡុង (Xinglong Tropical Medicinal Botanical Garden) ភាគខាងត្បូងប្រទេសចិន សម្រាប់ពិសោធន៍ឱសថព្យាបាលសុខភាពកងទ័ព និងពលរដ្ឋទូទៅ រួមទាំងឱសថលើកសម្ផស្សផង។

លោក វ័រ ឈាន មគ្គទេសក៏ណែនាំក្នុងសួនឱសថស៊ីងឡុង បានឲ្យដឹងថា សួនឱសថតំបន់ត្រូពិចនេះ គឺជាកន្លែងស្រាវជ្រាវ និងផលិតវិទ្យាសាស្ត្រឱសថសម័យទំនើប និងបុរាណចិនដ៏សំខាន់មួយសម្រាប់ព្យាបាលទ័ព និងពលរដ្ឋចិន កាលពីសម័យសង្គ្រាម។

យុវជនរាងខ្ពស់ស្តើងរូបនេះ បន្តប្រាប់ក្រុមអ្នកសារព័ត៌មាន និងភ្នាក់ងារទេសចរកម្ពុជា ពេលទស្សនកិច្ចទៀតថា សួន និងមន្ទីរពិសោធន៍ឱសថដែលស្ថិតក្រោមគំនិតផ្តួចផ្តើមគំនិតរបស់សាស្ត្រាចារ្យឱសថចិនម្នាក់ ត្រូវបានរដ្ឋាភិបាលចិនគាំទ្រ តាំងពីឆ្នាំ ១៩៥៧មកម្ល៉េះ។

ពូជដើមឈើ និងផ្កាតំបន់ត្រូពិចចម្រុះស្ទើរគ្រប់ប្រភេទដែលកំពុងចេញផ្លែផ្កាក្រអូបសាយពេលធ្លាក់ខ្យល់មូសុងទាំងនេះ មាន ដើមបេង ក្រញូង ដើមធ្នង់ ផងដែរ។ ក្រៅពីកន្លែងដាំដុះឱសថ សួនដែលស្ថិតជាប់ជើងភ្នំ Xinglong ក្នុងខេត្តភាគខាងត្បូងប្រទេសចិននេះ គឺជាកន្លែងទេសចរណ៍ផងដែរ។

ទេសចរម្នាក់ត្រូវចំណាយថវិកាជាង ១០យ័ន ស្មើនឹង ១ដុល្លារអាមេរិក ទិញសំបុត្រចូលទស្សនាសួនឱសថដែលមានដើមរុក្ខាត្រជាក់ត្រឈឹងត្រឈៃ និងស្តង់ពិព័រណ៍លក់ឱសថក្នុងសួនតែម្តង ចាប់ពីម៉ោង ៨ព្រឹក ដល់ម៉ោង ៥រសៀល ជារៀងរាល់ថ្ងៃ។

យ៉ាងណា លោក វ័រ ឈាន ពុំអាចបញ្ជាក់ពីចំនួនភ្ញៀវទេសចរប៉ុន្មាននាក់ក្នុងមួយថ្ងៃៗឡើយ។

Xinglong Tropical Medicinal Botanical Garden ស្ថិតក្នុងទីក្រុងស៊ីងឡុង ចម្ងាយប្រមាណ ១៦០ គីឡូម៉ែត្រពីទីក្រុង Haikou ដែលជាទីរួមខេត្តហៃណាន និងជាង ៩០គីឡូម៉ែត្រពីទីក្រុងសាន់យ៉ាដែលប៉ូលទេសចរណ៍សំខាន់ភាគខាងត្បូងប្រទេសចិន៕